ឡានដឹកខ្សាច់បុកគ្នាជាមួយម៉ូតូ ស្លា.ប់បុរសម្នាក់យ៉ាងអាណោចអាធ័ម
ខេត្តកណ្តាល ៖ បុរសម្នាក់បើកម៉ូតូយ៉ាងលឿនវ៉ារថយន្តកុងតឺន័រដែលចតនៅលើចិញ្ចើមថ្នល់ ស្រាប់តែជ្រុលចង្កូតទៅបុកគ្នាជាមួយរថយន្តដឹកខ្សាច់ដែលធ្វើដំណើរបញ្ច្រាស …
ខេត្តកណ្តាល ៖ បុរសម្នាក់បើកម៉ូតូយ៉ាងលឿនវ៉ារថយន្តកុងតឺន័រដែលចតនៅលើចិញ្ចើមថ្នល់ ស្រាប់តែជ្រុលចង្កូតទៅបុកគ្នាជាមួយរថយន្តដឹកខ្សាច់ដែលធ្វើដំណើរបញ្ច្រាសទិសគ្នាចំពីមុខពេញទំហឹងបណ្តាលឲ្យស្លាប់ភ្លាមនៅនឹងកន្លែង ។ ហេតុការណ៍គ្រោះថ្នាក់ចរាចរណ៍នេះបានកើតឡើងកាលពីវេលាម៉ោង១២ និង៤៥នាទីរំលងអាធ្រាត្រឈានចូលថ្ងៃទី២៤ ខែមករា ឆ្នាំ២០១៧ លើកំណាត់ផ្លូវជាតិលេខ១ ចម្លោះគីឡូម៉ែត្រលេខ៥៣-៥៤ ស្ថិតក្នុងភូមិក្បាលជ្រោយ ឃុំកំពង់ភ្នំ ស្រុកលើកដែក ខេត្តកណ្តាល ។
តាមរបាយការណ៍របស់នគរបាលជំនាញចរាចរណ៍ស្រុកលើកដែកបានឲ្យដឹងថា ជនរងគ្រោះដែលស្លាប់ក្នុងករណីគ្រោះថ្នាក់ចរាចរណ៍នេះឈ្មោះ ផុង កែវ ភេទប្រុស អាយុ៤៧ឆ្នាំ ជនជាតិខ្មែរ មានទីលំនៅភូមិពោធិ៍ ឃុំថ្កូវ ស្រុកកំពង់ត្របែក ខេត្តព្រៃវែង ជិះម៉ូតូម៉ាកសង់ប៊ិច ពណ៌ខ្មៅ ស៊េរីឆ្នាំ២០១២ ពាក់ស្លាកលេខ ភ្នំពេញ 1BF-4393។
របាយការណ៍បញ្ជាក់ថា មុនពេលកើតហេតុគេឃើញជនរងគ្រោះជិះម៉ូតូម្នាក់ឯងក្នុងទិសដៅពីភ្នំពេញទៅអ្នកលឿង លុះមកដល់ចំណុចខាងលើបានបើកវ៉ារថយន្តកុងតឺន័រមិនស្គាល់ម៉ាក១គ្រឿងដែលចតនៅស្ងៀមលើចិញ្ចើមថ្នល់ ស្រាប់តែជ្រុលចង្កូតទៅបុកគ្នាជាមួយរថយន្តដឹកខ្សាច់១គ្រឿងម៉ាកហ៊ីយ៉ាន់ដាយ ពណ៌ស ពាក់ស្លាកលេខ ហ ០១២០ ភព៣ ដែលកំពុងបើកបញ្ច្រាសទិសគ្នាចំពីមុខពេញទំហឹងជាប់ទាំងម៉ូតូទាំងមនុស្សនៅក្រោមរថយន្តអូសប្រហែល១០ម៉ែត្រទើបអស់ល្បឿន បណ្តាលឲ្យអ្នកបើកម៉ូតូដាច់ខ្យល់ស្លាប់ភ្លាមមួយរំពេចនៅនឹងកន្លែង ។ ភ្លាមៗនោះអ្នកបើករថយន្តដឹកខ្សាច់បានចុះរត់គេចខ្លួនបាត់ទុកតែរថយន្តនៅកន្លែងកើតហេតុ ។ ចំណែករថយន្តកុងតឺន័រដែលស្ងៀមលើចិញ្ចើមផ្លូវក៏បានបើកបន្តដំណើរទៅមុខបាត់ដែរ ។
ក្រោយពេលកើតហេតុ រថយន្តបង្ក និងម៉ូតូជនរងគ្រោះ ត្រូវបានជំនាញធ្វើការវាស់វែង រួចយកទៅរក្សាទុកនៅអធិការដ្ឋាននគបាលស្រុកលើកដែក ដើម្បីចាត់ការតាមនីតិវិធីច្បាប់ ចំណែកសពជនរងគ្រោះសមត្ថកិច្ចធ្វើកំណត់ហេតុប្រគល់ជូនក្រុមគ្រួសារដឹកយកទៅធ្វើបុណ្យតាមប្រពៃណី ៕
ចែករំលែកព័តមាននេះ