ខេត្តឧត្តរមានជ័យ ៖ ស្របពេលដែលប្រទេសកម្ពុជាយើង ដែលកំពុងទទួលរងជ្រលងសម្ពាធទាបឥណ្ឌា និងប្រព័ន្ធសម្ពោធទាប (ITCZ) ដែលកើតឡើងជាថ្មីអូសបន្លាយនៅភាគខាងជើងនៃប្រទេសកម្ពុជា ស្ថិតនៅក្នុងប្រទេសថៃ-វៀតណាម និងប្រទេសឡាវ បានធ្វើឲ្យខេត្តមួយចំនួនក្នុងប្រទេសកម្ពុជាយើង ហើយក្នុងនោះក៏មានខេត្តឧត្តរមានជ័យ ដែលមានស្ថានភាពភ្លៀងធ្លាក់នៅទូទាំងខេត្តផងដែរ។
នេះបើតាមសេចក្ដីប្រកាសរបស់ក្រសួងធនធានទឹក និងឧតុនិយម កាលពីថ្ងៃទី១៩ ខែសីហា ឆ្នាំ២០២២ ដែលជ្រលងសម្ពាធទាបឥណ្ឌា និងប្រព័ន្ធសម្ពាធទាប (ITCZ) នឹងអូសបន្លាយចាប់ពីថ្ងៃទី២០ ដល់ថ្ងៃទី២៣ ខែសីហា ឆ្នាំ២០២២។
បើតាមលោក ញើន កួន ប្រធានមន្ទីរធនធានទឹក និងឧតុនិយម បានប្រាប់នៅថ្ងៃទី២១ ខែសីហា ឆ្នាំ២០២២នេះថា បរិមាណទឹកភ្លៀងដែលបានធ្លាក់ចាប់ពីថ្ងៃទី២០-២១ ខែសីហា ឆ្នាំ២០២២ ក្នុងកម្រិត ១៧៦,៥ មម នៅតាមបណ្ដោយជួរភ្នំដងរែក និងភ្លៀងបានគ្របដណ្តប់តាមបណ្តាលក្រុង-ស្រុក នៅក្នុងខេត្តឧត្តរមានជ័យ។ ក្នុងនោះដែរ ស្រុកត្រពាំងប្រាសាទ ខេត្តឧត្តរមានជ័យ ដែលជាប់នឹងតំបន់ជួរភ្នំដងរែក បានទទួលរងសម្ពោធលំហូរទឹកធ្លាក់ពីលើភ្នំ និងលំហូរទឹកមកពីតំបន់នានា ផ្នែកខាងលើ នៃខេត្តព្រះវិហារ ដោយបានបង្កជាជំនន់ទឹកភ្លៀង ជន់លិចតំបន់មួយចំនួននៅក្នុងស្រុកត្រពាំងប្រាសាទ តែពុំទាន់មានបង្កលក្ខណៈធ្ងន់ធ្ងរនោះឡើយ។
ទោះបីជាយ៉ាងណាក៏ដោយ មន្ទីរធនធានទឹក និងឧតុនិយម ខេត្តឧត្ដរមានជ័យ លោក និងក្រុមការងារ បានត្រៀមលក្ខណៈជាស្រេច នូវសម្ភារៈបច្ចេកទេសគ្រឿងចក្រ និងមធ្យោបាយ ដើម្បីអន្តរាគមន៍រំដោះទឹកនៅតំបន់ដែលរងគ្រោះដោយសារជំនន់ទឹកភ្លៀង ឬក៏អាងស្តុកទឹក និងប្រព័ន្ធធារាសាស្ត្រផ្សេងៗទៀត ក្នុងខេត្តឧត្តរមានជ័យ ក្នុងការបញ្ចៀសពីផលប៉ះពាល់ធ្ងន់ធ្ងរ ដែលស្របពេលបច្ចុប្បន្ននេះ មេឃនៅតែបន្តធ្លាក់នៅឡើយ៕
ចែករំលែកព័តមាននេះ