ក្រុមហ៊ុនអាកាសចរណ៍សម្រុកកក់យន្តហោះល្បឿនលឿនជាងសំឡេងជំនាន់ថ្មី
អាមេរិក ៖ ក្រុមហ៊ុនអាកាសចរណ៍អាមេរិក American Airlines បានយល់ព្រមលើកិច្ចព្រមព្រៀងលើ
អាមេរិក ៖ ក្រុមហ៊ុនអាកាសចរណ៍អាមេរិក American Airlines បានយល់ព្រមលើកិច្ចព្រមព្រៀងលើការទិញយន្តហោះល្បឿនលឿនជាងសំឡេង ដែលអាចហោះពីទីក្រុងឡុងដ៍ ចក្រភអង់គ្លេស ទៅកាន់ទីក្រុងម៉ៃអាមី (Miami) សហរដ្ឋអាមេរិកក្នុងរយៈពេលត្រឹម៥ម៉ោងប៉ុណ្ណោះ។
ក្រុមហ៊ុន American Airlines បានទម្លាក់ប្រាក់កក់ដែលមិនអាចដកវិញបានជាមួយក្រុមហ៊ុនផលិតយន្តហោះអាមេរិក Boom Supersonic សម្រាប់បញ្ជាទិញយន្តហោះល្បឿនលឿនជាងសំឡេងចំនួន២០គ្រឿង ដែលមានឈ្មោះថា «Overture»។
American Airlines បានក្លាយជាក្រុមហ៊ុនអាកាសចរណ៍ទី៣ ដែលបានចុះឈ្មោះសម្រាប់ការទិញយន្តហោះជំនាន់ថ្មីនេះ។ តែសម្រាប់អ្នកចង់ធ្វើដំណើរតាម Overture ត្រូវចំណាយពេលរង់ចាំជាមុនសិន។ ដោយសារក្រុមហ៊ុនមិនបានកំណត់ដាក់ឱ្យដំណើរការនៅឡើយទេ រហូតដល់ឆ្នាំ ២០២៩។
លោក Derek Kerr ប្រធានផ្នែកហិរញ្ញវត្ថុរបស់ American Airlines បាននិយាយថា «ការសម្លឹងមើលអនាគត ការធ្វើដំណើរជាមួយយន្តហោះល្បឿនលឿនជាងសំឡេងនឹងក្លាយជាផ្នែកមួយដ៏សំខាន់នៃសមត្ថភាពរបស់យើងក្នុងការផ្តល់ជូនអតិថិជន។ ហើយយើងពិតជារំភើបចំពោះរបៀបដែល Boom Supersonic ដែលនឹងរៀបចំអនាគតនៃការធ្វើដំណើរជើងអាកាស»។
គួរបញ្ជាក់ថា វាមានរយៈពេលជិត២០ឆ្នាំហើយ ចាប់តាំងពីអ្នកដំណើរអាចជ្រើសរើសការហោះហើរជាមួយយន្តហោះល្បឿនលឿនជាងសំឡេង បន្ទាប់ពីយន្តហោះ Concorde ដែលផលិតដោយក្រុមហ៊ុន Sud Aviation របស់បារាំង និង British Aircraft Corporation របស់ចក្រភពអង់គ្លេសបានដាំក្បាលចេញពីទីផ្សារ ដោយសារតែតម្លៃនៃជើងហោះហើរមានតម្លៃខ្ពស់ពេក។
ទោះយ៉ាងណាក៏ដោយ លោក Blake Scholl នាយកប្រតិបត្តិ Boom Supersonic បាននិយាយថា យន្តហោះក្រុមហ៊ុនរបស់លោកនឹងមានភាពខុសប្លែកគ្នា នៅពេលដែលវាបង្ហាញខ្លួននៅឆ្នាំ ២០២៩។ ដោយសំបុត្រមានតម្លៃប្រហែល ៤,០០០ ទៅ ៥,០០០ដុល្លារ ដើម្បីហោះហើរពីទីក្រុងញូវយ៉កទៅទីក្រុងឡុងដ៍ ក្នុងរយៈពេលប្រហែល៣ម៉ោងកន្លះតែប៉ុណ្ណោះ។
ជាមួយគ្នានោះ Boom Supersonic ក៏បានអះអាងថាកម្មវិធីផលិត Overture នឹងត្រូវចំណាយប្រាក់ចន្លោះពី ៦ពាន់លាន ទៅ ៨ពាន់លានដុល្លារ។ ហើយយន្តហោះនេះមានតម្លៃ ២០០លានដុល្លារក្នុង១គ្រឿង។ រហូតមកទល់ពេលនេះ មិនទាន់មានក្រុមហ៊ុនផលិតម៉ាស៊ីនណាមួយចុះកិច្ចសន្យានៅឡើយទេ។ ប៉ុន្តែបច្ចុប្បន្ន Boom Supersonic កំពុងពិភាក្សាជាមួយក្រុមហ៊ុន Rolls-Royce និងក្រុមហ៊ុនដទៃផ្សេងៗទៀត៕ (ប្រភពពី LADbible)
ចែករំលែកព័តមាននេះ