ផ្លូវលំជាច្រើនខ្សែដែលស្ថិតនៅក្រុងសំរោង និងស្រុកអន្លង់វែង ទឹកភ្លៀងនៅតែធ្លាក់ជាបន្តបន្ទាប់ ហើយបណ្តាលឱ្យទឹកជំនន់ភ្លៀងហូរកាត់លិចផ្លូវច្រោះដាច់ផ្លូវឱ្យបង្កឱ្យរងការខូតខាតយ៉ាងធ្ងន់ធ្ងរ និងប៉ះពាល់ដល់
ខេត្តឧត្តរមានជ័យ ៖ ផ្លូវលំជាច្រើនខ្សែដែលស្ថិតនៅក្រុងសំរោង និងស្រុកអន្លង់វែង ទឹកភ្លៀងនៅតែធ្លាក់ជាបន្តបន្ទាប់ ហើយបណ្តាលឱ្យទឹកជំនន់ភ្លៀងហូរកាត់លិចផ្លូវច្រោះដាច់ផ្លូវឱ្យបង្កឱ្យរងការខូតខាតយ៉ាងធ្ងន់ធ្ងរ និងប៉ះពាល់ដល់ផលដំណាំស្រូវអស់ជាច្រើនហិកតាថែមទាំង។
មិនត្រឹមតែប៉ុណ្ណោះក៏នាំឱ្យពិបាកក្នុងការធ្វើដំណើរទៅប្រកបមុខរបរធ្វើស្រែចំការរបស់បងប្អូនប្រជាពលរដ្ឋ ដែលត្រូវឆ្លងកាត់តំបន់ផ្លូវ នៅត្រង់ចំណុចទឹកកំពុងហូរលិចកាត់ផ្តាច់ផ្លូវ ។ ម្យ៉ាងវិញទៀត រដូវនេះ គឺជារដូវដែលប្រជាកសិករទូទៅសម្រុកនាំគ្នាធ្វើស្រែ និងខ្លះទៀតដាំដំណាំដំឡូងមី ពោត សណ្តែក និងបន្លែបង្ការផ្សេងៗជាដើម។
បើតាមប្រភពពីប្រជាពលរដ្ឋម្នាក់មានឈ្មោះ ហូរ សារ៉េត ភេទប្រុស ដែលមានវ័យ៧០ឆ្នាំ រស់នៅភូមិឈូក សង្កាត់សំរោង ក្រុងសំរោង ខេត្តឧត្តរមានជ័យ បានរៀបរាប់ឱ្យដឹងនៅថ្ងៃទី១៦ ខែសីហា ឆ្នាំ២០២២នេះថា ផ្លូវជាច្រើនខ្សែដែលជំនន់ទឹកភ្លៀងកំពុងហូរកាត់លិចផ្លូវនេះដែរ គឺស្ថិតនៅត្រង់ផ្លូវទៅទំនប់ស្តុបទឹកបឹងត្រពាំងវែង ភូមិត្រពាំងវែង សង្កាត់សំរោង ក្រុងសំរោង ខេត្តឧត្តរមានជ័យ។
ពលរដ្ឋដដែលបានអះអាងបន្តថា ផ្លូវដែលត្រូវទឹកហូរលិចនេះ គឺកើតឡើងនៅក្នុងថ្ងៃទី១៤ រហូតមកទល់ថ្ងៃទី១៦ ខែសីហា ឆ្នាំ២០២២នេះ ហើយបើតាមរូបគាត់ដឹង មូលហេតុដែលនាំឱ្យជន់លិចផ្លូវបែបនេះ គឺបណ្តាលមកពីខាងមន្ត្រីជំនាញរបស់មន្ទីរធនធានទឹក បានបើកបង្ហូរទឹកចេញពីទំនប់ស្តុបទឹក ធ្លាក់មកច្រើនពេក ទើបបានជាធ្វើឱ្យជន់លិចផ្លូវ ហើយស្របពេលយប់នេះ មេឃនៅតែមានភ្លៀងធ្លាក់បន្តទៀត ប្រាកដជាផ្លូវជាច្រើនខ្សែនៅតំបន់នេះច្បាស់ជាត្រូវរងការខូតខាតខ្លាំងជាងនេះបន្តទៀតមិនខាន។
សូមបញ្ជាក់ថា បើតាមការលើកឡើងពីបងប្អូនប្រជាពលរដ្ឋដែលរស់នៅក្បែរចំណុចទីតាំងផ្លូវដែលជំនន់ទឹកភ្លៀងកំពុងហូរខ្លាំងលិចផ្លូវថ្មីនេះ កាលពីឆ្នាំចាស់កន្លងទៅ ពុំមានការលិចដូចនេះទេ ទោះបីជាបើកទំនប់បឹងត្រពាំងវែងយ៉ាងណាក៏ដោយ ទើបតែឆ្នាំនេះ ដោយសារមានការបើកទំនប់បង្ហូរមកផង ធ្វើឱ្យផ្លូវត្រូវជន់លិច ហើយបញ្ហាសំខាន់បំផុតនោះ ជំនន់ទឹកភ្លៀងឆ្នាំនេះ បណ្តាលឱ្យរងផលប៉ះពាល់ដល់ផ្លូវថ្នល់ ពិបាកធ្វើដំណើរ ហើយថែមទាំងខូតខាតដំណាំស្រូវ និងដំណាំផ្សេងៗមួយចំនួនអស់ជាច្រើនហិចតាផងដែរ។
ដោយឡែកនៅឯស្រុកអន្លង់វែងវិញ យោងទៅតាមរបាយការណ៍របស់មូលរដ្ឋានអាវុធហត្ថស្រុកអន្លង់វែង បានឱ្យដឹងថា ទឹកភ្លៀងបានធ្លាក់ផ្ទួនៗនៅភូមិប្រលានទឹក លិចផ្លូវប្រវែង២០ម៉ែត្រ កំពស់ទឹក០.២៥ម៉ែត្រ និងលិចស្ពានឈើប្រវែង១៥ម៉ែត្រ កំពស់ទឹក០.២០ម៉ែត្រ ជាហេតុមិនអាចធ្វើចរាចរណ៍បានក្នុងឃុំអន្លង់វែង និងឃុំត្រពាំងតាវ ។ ចំណែកភូមិទំនប់ ទំនប់បង្ហៀរ៣០០ម៉ែត្រ កំពស់ទឹក០.៣០ម៉ែត្រ មិនអាចធ្វើចរាចរណ៍បាន ។ រីឯឃុំថ្លាត ភូមិទួលប្រាសាទ ទឹកលិចផ្លូវប្រវែង៣០ម៉ែត្រ កំពស់ទឹក០.៤០ម៉ែត្រ និងលិចស្ពានឈើប្រវែង៣០ម៉ែត្រ កំពស់ទឹក០.៥២ម៉ែត្រ ជាហេតុមិនអាចធ្វើចរាចរណ៍បាន៕
ចែករំលែកព័តមាននេះ