ហួសហេតុ ! អូសបែកផ្កាភ្លើងតាំងពីទួលស្វាយព្រៃ២ដល់អូឡាំពិក
រាជធានីភ្នំពេញ ៖ បុរសម្នាក់បើករថយន្តស៊េរីទំនើបយ៉ាងលឿនទៅបុកម៉ូតូ១គ្រឿងទាំងកម្រោល ហើយព្យាយាមបើករត់ទាំងអូសម៉ូតូក្រោមរថយន្តបែកផ្កាភ្លើងពេញផ្លូវពីស្តុប …
រាជធានីភ្នំពេញ ៖ បុរសម្នាក់បើករថយន្តស៊េរីទំនើបយ៉ាងលឿនទៅបុកម៉ូតូ១គ្រឿងទាំងកម្រោល ហើយព្យាយាមបើករត់ទាំងអូសម៉ូតូក្រោមរថយន្តបែកផ្កាភ្លើងពេញផ្លូវពីស្តុបអាងទឹកអូឡាំពិក ផ្លូវព្រះមុនីរ៉េតកែងផ្លូវព្រះសីហនុ សង្កាត់ទួលស្វាយព្រៃ២ ខណ្ឌចំការមន រហូតដល់ក្រោយវត្តមហាមន្ត្រី ផ្លូវលេខ៤៨៤កែងផ្លូវលេខ១៦៣ សង្កាត់អូឡាំពិក ខណ្ឌចំការមន ទម្រាំសមត្ថកិច្ច និងប្រជាពលរដ្ឋនាំគ្នាដេញចាប់បាន បង្កឲ្យមានការភ្ញាក់ផ្អើលកាលពីវេលាម៉ោង១០យប់ ថ្ងៃទី១៨ ខែមករា ឆ្នាំ២០១៧ ។
តាមសម្ដីអ្នកឃើញហេតុការណ៍បានឲ្យដឹងថា មុនពេលកើតហេតុគេបានឃើញបុរស៣នាក់ អាយុប្រហែល២០ឆ្នាំ ជិះម៉ូតូម៉ាក ZOOMER-X ពណ៌ខ្មៅ ពាក់ស្លាកលេខ ភ្នំពេញ 1CN-5305 ធ្វើដំណើរតាមផ្លូវព្រះមុនីរ៉េតក្នុងទិសដៅពីកើតទៅលិច ខណៈមកដល់ចំណុចកើតហេតុបានបត់ឆ្វេងឡើងទៅផ្លូវព្រះសីហនុ ស្របពេលនោះស្រាប់តែបុរសម្នាក់អាយុប្រហែល៤០ឆ្នាំ មិនដឹងថាចេញពីផឹកស៊ីនៅកន្លែងណានោះទេ បានបើករថយន្ត ស៊េរីទំនើប ម៉ាកឡង់គ្រីស័រ ពណ៌ខ្មៅ ពាក់ស្លាកលេខ រដ្ឋ២០ ២.៣៣៣៣ ធ្វើដំណើរតាមផ្លូវព្រះសីហនុក្នុងទិសដៅពីជើងទៅត្បូងក្នុងល្បឿនយ៉ាងលឿន បានជ្រុលទៅបុកម៉ូតូនោះពីក្រោយពេញទំហឹងទាំងកំរោលបណ្ដាលឲ្យអ្នកជិះម៉ូតូទាំង៣នាក់ខ្ទាតចេញរងរបួសរលាត់ដៃជើងស្រាល ភ្លាមៗនោះអ្នកបើកបររថយន្តមិនបានឈប់ដោះស្រាយនៅកន្លែងកើតហេតុនោះទេ គឺបានព្យាយាមបើករត់អូសទាំងម៉ូតូជាប់ក្រោមរថយន្ត បែកផ្កាភ្លើងពេញផ្លូវរហូតដល់ក្រោយវត្តមហាមន្ត្រី ផ្លូវលេខ២៨៤កែងផ្លូវលេខ១៦៣ សង្កាត់អូឡាំពិក ខណ្ឌចំការមន ទើបសមត្ថកិច្ច និងប្រជាពលរដ្ឋដេញឃាត់បានទាំងអ្នកបើកបរ និងរថយន្ត រួចនាំខ្លួនទៅសាកសួរទៅប៉ុស្តិ៍នគរបាលអូឡាំពិក ។
ប្រភពពីសមត្ថកិច្ចប៉ុស្តិ៍អូឡាំពិកបានឲ្យដឹងថា ពេលវាស់ជាតិអាល់កុលទៅឃើញថា អ្នកបើកបររថយន្តមានជាតិអាកុល០.៩២មីល្លីក្រាមក្នុង១លីត្រខ្យល់ ។ ចំណែកម៉ូតូរងគ្រោះត្រូវរថយន្តកិនខ្ទេចទាំងស្រុង ។
ក្រោយពេលកើតហេតុ ទាំងរថយន្ត ទាំងម៉ូតូ និងអ្នកបើកបររថយន្ត ត្រូវបានសមត្ថកិច្ចធ្វើការវាស់វែង រួចយកទៅរក្សាទុកនៅការិយាល័យចរាចរណ៍ផ្លូវគោករាជធានីភ្នំពេញ ដើម្បីធ្វើការដោះស្រាយនៅពេលក្រោយ ៕
ចែករំលែកព័តមាននេះ