សហរដ្ឋអាមេរិក ៖ ការលក់រាយនៅក្នុងខែធ្នូ របស់សហរដ្ឋអាមេរិកបានកើនឡើងតិចជាងការរំពឹងទុក ដែលបង្ហាញពីការចុះខ្សោយនៃកំណើនសេដ្ឋកិច្ចនៅក្នុងត្រីមាសចុងក្រោយឆ្នាំ២០១៦ ។ នេះបើតាមក្រសួងពាណិជ្ជកម្មបានរាយការណ៍កាលពីថ្ងៃសុក្រ ។
ក្រសួងពាណិជ្ជកម្មឱ្យដឹងថា ការលក់រាយបានកើនឡើង០,៦%ពីខែមុន ឬស្មើនឹង៤៦៩,១ ប៊ីលានដុល្លារអាមេរិក ខណៈការរំពឹងទុករបស់សេដ្ឋវិទូស្មើ០,៧% ។ បើធៀបនឹងឆ្នាំមុន ការលក់រាយសរុបបានកើនឡើង៤,១%កាលពីខែមុន ។
ការទិញរថយន្ត ម៉ូតូ និងគ្រឿងបន្លាស់បានកើនឡើង២,៤%នៅខែធ្នូ ខណៈការលក់រាយតាមអនឡាញកើនឡើង១,២% ។ ផ្ទុយទៅវិញ ការលក់តាមហាងបានធ្លាក់ចុះ០,៦%កាលពីខែមុន ហើយការលក់នៅតាមបារ និងភោជនីយដ្ឋាន ក៏បានធ្លាក់ចុះ០,៨% ផងដែរ ។
ក្រសួងពាណិជ្ជកម្មឱ្យដឹងទៀតថា ដោយមិនរាប់បញ្ចូលការលក់រថយន្តគ្មានភាពរឹងមាំ ការលក់រាយសរុបបានកើនឡើង០,២%កាលពីខែមុន ដែលទាបជាងការរំពឹងទុករបស់សេដ្ឋវិទូចំនួន០,៤% ។
ការចំណាយរបស់អតិថិជន គឺជាកត្តាចម្បងមួយនៃកំណើនសេដ្ឋកិច្ចសហរដ្ឋអាមេរិក និងរបាយការណ៍ការលក់រាយទាបជាងការរំពឹងទុកនៅខែធ្នូ បានបង្ហាញពីការធ្លាក់ចុះនៃសេដ្ឋកិច្ចរបស់សហរដ្ឋអាមេរិក នៅក្នុងត្រីមាសចុងក្រោយឆ្នាំ២០១៦ ។
ធនាគារកណ្តាលនៃទីក្រុង Atlanta បានប៉ាន់ប្រមាណថា សេដ្ឋកិច្ចរបស់សហរដ្ឋអាមេរិកបានកើនឡើងក្នុងអត្រាប្រចាំឆ្នាំ២,៨%ក្នុងត្រីមាសទី៤ឆ្នាំ២០១៦ ដែលទាបជាង៣,៥% កាលពីត្រីមាសមុន ។
នៅថ្ងៃទី២៧ មករា ក្រសួងពាណិជ្ជកម្មនឹងចេញផ្សាយការព្យាកររបស់ខ្លួនអំពីផលិតផលក្នុងស្រុកសរុប (GDP) របស់សហរដ្ឋអាមេរិកនៅត្រីមាសទី៤ឆ្នាំមុន ៕
ចែករំលែកព័តមាននេះ