ខេត្តកំពង់ស្ពឺ ៖ កាលពីពេលថ្មីៗនេះ សារសំឡេងចំនួន០៤ឃ្លីបដែលគេស្គាល់ច្បាស់ថា ជាសំឡេងរបស់លោកឧត្តមសេនីយ៍ទោ សម សាមួន ស្នងការនគរបាលខេត្តកំពង់ស្ពឺដែលហាក់បីដូចជាធ្វើការស្ដីបន្ទោសទៅលើលោកមេប៉ុស្តិ៍ព្រៃវិហារ ស្រុកគងពិសីមួយរូប គឺលោកវរសេនីយ៍ត្រី…
ខេត្តកំពង់ស្ពឺ ៖ កាលពីពេលថ្មីៗនេះ សារសំឡេងចំនួន០៤ឃ្លីបដែលគេស្គាល់ច្បាស់ថា ជាសំឡេងរបស់លោកឧត្តមសេនីយ៍ទោ សម សាមួន ស្នងការនគរបាលខេត្តកំពង់ស្ពឺដែលហាក់បីដូចជាធ្វើការស្ដីបន្ទោសទៅលើលោកមេប៉ុស្តិ៍ព្រៃវិហារ ស្រុកគងពិសីមួយរូប គឺលោកវរសេនីយ៍ត្រី គិត វៃ ដែលហ៊ានចេញលិខិតបញ្ជាក់កិរិយាមាយាទឲ្យជនជាប់សង្ស័យក្នុងករណីគ្រឿងញៀនចំនួន04រូបក្នុងសារសំឡេងបានបញ្ជាក់ថា«លោកព្រៃវិហារគងពិសី លោកមានអំណះអំណាងស្អី ដែលលោកហ៊ានបញ្ជាក់មួយហើយមួយទៀត លោកគិតយ៉ាងម៉េចពេលនេះ?
អ្នកណាមួយដែលឲ្យលោកធ្វើរបៀបហ្នឹងបញ្ជាក់ថា អត់មានជាប់គ្រឿងញៀន ខណៈដែលអយ្យការ(ព្រះរាជអាជ្ញា)បានចោទប្រកាន់រួចទៅហើយ ។ បញ្ជាក់ហើយផ្ញើឯកសារទៅអយ្យការទៀត «លោកស្នងការបានសង្កត់ធ្ងន់ថា»តើអ្នកណាមួយបញ្ជាឲ្យលោកធ្វើ? ឬក៏លោកធ្វើដោយចិត្តឯងជ្រុលហួសហេតុពេកហើយ។
សាលាឃុំបញ្ជាក់វាជារឿងមួយផ្សេងនេះ នគរបាលប៉ុស្តិ៍បញ្ជាក់ចុះលេខនគរបាលប៉ុស្តិ៍ទៀតធ្វើអីធ្វើយ៉ាងហ្នឹង? ក្នុងនោះផងដែរ លោកស្នងការក៏បានបញ្ជាទៅលោកស្នងការរង គឺឧត្តមសេនីយ៍ត្រីម៉ាត់ ធុច ដែលទទួលបន្ទុកករណីគ្រឿងញៀនឲ្យពិនិត្យមើលលើសំណុំរឿងនេះផងដែរថា តើលិខិតបញ្ជាក់ធ្វើឡើងស្របពេលជាមួយសំណុំរឿងឬមួយយ៉ាងណាហើយខ្ញុំស៊ីញ៉េរដែរអត់ទេ ។ ហើយបើអត់ទេ អានេះបញ្ជាក់នៅពេលក្រោយហើយដាក់ទៅតុលាការខ្លួនគាត់ហើយ ។ លោកស្នងការបានបញ្ជាក់តាមប្រព័ន្ធតេលេក្រាមចុងក្រោយថា «បើសិនជាសំណុំរឿងមានលិខិតបញ្ជាក់មកជាមួយដែរលោកស្នងការរង ក៏មានរួមចំណែកខុសក្នុងរឿងនេះដែរ» ។
ដោយឡែក យោងតាមប្រភពពីមន្ត្រីនគរបាលស្រុកគងពិសីឯណោះវិញបានបង្ហើបថា លោកគិត វៃ គឺជាមន្ត្រីប៉ូលិសទើបតែចូលថ្មីតែមានសំណាងបានធ្វើជាមេប៉ុស្តិ៍ឡើងកាន់តំណែងទាំងក្មេងខ្ចីបែបនេះ ហើយខ្វះការពិចារណាងុបងល់នឹងលាភសក្ការទើបគាត់ហ៊ានចេញលិខិតបញ្ជាក់ឲ្យជនជាប់សង្ស័យករណីគ្រឿងញៀននេះ ហើយការបញ្ជាក់នេះ ក៏ទំនងជាលោក គិត វៃ បានទទួលលាភសក្ការៈពីក្រុមគ្រួសារជនសង្ស័យទាំងនោះមិនតិចឡើយ ទើបហ៊ានចេញលិខិតបញ្ជាក់ឲ្យរបៀបនេះ។
ករណីនេះគឺមានតែថ្នាក់លើនោះទេទើបសម្រេចទោសបែបណាចំពោះលោកមេប៉ុស្តិ៍ព្រៃវិហាររូបនេះបណ្ដែតបណ្ដោយទុកឲ្យនៅកាន់តំណែងតទៅទៀតនោះមិនដឹងជាមានរឿងអ្វីកើតឡើងតទៅទៀតនោះទេនៅថ្ងៃក្រោយ។
ដោយឡែកលោកឧត្តមសេនីយ៍ត្រីអៀង អុល ស្នងការរងទទួលផែនបុគ្គលិកបានប្រាប់ផងដែរថាបើសិនជាលោកគិតវៃ នាយប៉ុស្តិ៍ព្រះវិហារហ៊ានចេញលិខិតបញ្ជាក់កិរិយាមាយាទឲ្យជនសង្ស័យក្នុងករណីគ្រឿងញៀនមែននោះគឺខុសច្បាប់ទាំងស្រុង។
សូមបញ្ជាក់ថាកាលពីពេលកន្លងទៅថ្មីៗនេះនគរបាលស្រុកបរសេដ្ឋបានធ្វើការឃាត់ខ្លួនមុខសញ្ញាជួញដូរគ្រឿងញៀនមួយក្រុមក្រោយពេលធ្វើការសាកសួរគឺជាប់មានឈ្មោះជនសង្ស័យទាំង4នាក់ខាងលើផងដែរ ។ ពេលនោះតំណាងអយ្យការក៏បានចោទប្រកាន់ជនសង្ស័យ4រូបនេះផងដែរតែក្រោយមកមិនដឹងថាមានហេតុផលឬក៏គេរត់ការចង់ដោះបន្ទុកក្រុមជនទាំងនេះឬយ៉ាងណាទេទើបបានជាមានការស៊ុំគ្រលំធ្វើលិខិតបញ្ជាក់កិរិយាមាយាទដែលទំនងជាការធ្វើលិខិតបញ្ជាក់កិរិយាមាយាទនេះពួកគេសង្ឃឹមថាអាចជួយសម្រាលបន្ទុកហើយដោះស្រាយកុំឲ្យជនសង្ស័យ 4 នាក់បានជាប់ពាក់ព័ន្ធក្នុងករណីគ្រឿងញៀនដែលនគរបាលស្រុកបរសេដ្ឋបង្ក្រាបបាននោះឬយ៉ាងណាឡើយ។
ពាក់ព័ន្ធករណីនេះដែរ លោកវរសេនីយ៍ត្រីគិតវៃនាយប៉ុស្តិ៍នគរបាលរដ្ឋបាលព្រៃវិហារបានបញ្ជាក់ប្រាប់តាមទូរស័ព្ទថាចំពោះលិខិតបញ្ជាក់នេះគឺធ្វើឡើងក្រោយពេលដែលជនសង្ស័យទាំង4រូបបានចូលខ្លួនទៅតាមដីកាបញ្ជាអោយចូលខ្លួនរបស់លោកចៅក្រមស៊ើបសួរតុបឈុនសុង។ជនសង្ស័យទាំង4រូបត្រូវបានចៅក្រមស៊ើបសួរបញ្ជាអោយចូលខ្លួនកាលពីថ្ងៃទី 3 សីហាឆ្នាំ 2022 ក្រោយមកមួយថ្ងៃជនសង្ស័យទាំង4 រូបបានមកជួបលោកដើម្បីឲ្យជួយធ្វើលិខិបញ្ជាក់កិរិយាមាយាទតែពេលនោះលោកបានប្រាប់ថាការធ្វើលិខិបញ្ជាក់កិរិយាមាយាទនេះគឺបានតែយកទៅធ្វើការងារផ្សេងៗនោះទេ មិនអាចយកទៅបង្ហាញដល់តុលាការបានឡើយ។
ជនសង្ស័យដែលពាក់ព័ន្ធករណីគ្រឿងញៀននេះទីមួយឈ្មោះទូចថេម ភេទប្រុសកើតថ្ងៃទី 13 ខែ 4 ឆ្នាំ 1979 នៅភូមិព្រៃដំណាក់ឃុំព្រៃវិហារស្រុកគងពិសីខេត្តកំពង់ស្ពឺថ្ងៃទី 2 ឈ្មោះ ប៉ុស ផាន់និតប្រុសកើតថ្ងៃទី 7 ខែ 6 ឆ្នាំ 1997 នៅភូមិព្រៃដំណាក់ឃុំព្រៃវិហារស្រុកគងពិសីជាមួយគ្នាចំណែកជនសង្ស័យទី 3 ឈ្មោះ គឹមចំរើនភេទប្រុសកើតថ្ងៃទី 10 ខែ 11 ឆ្នាំ 1998 នៅភូមិព្រៃដំណាក់ឃុំព្រៃវិហារស្រុកគងពិសីរីឯជនសង្ស័យទី 4 ឈ្មោះ សោ ធីម ភេទប្រុសកើតថ្ងៃទី 15 ខែ 11 ឆ្នាំ 1990 នៅភូមិព្រៃដំណាក់ឃុំព្រៃវិហារស្រុកគងពិសី។
ដំបូងលោកបានណែនាំថា បើមានភូមិឃុំបញ្ជាក់ដែរ លោកក៏អាចចូលរួមបញ្ជាក់បានដូចគ្នា ដោយសារតែក្រុមជនសង្ស័យទាំង4 ព្រមទាំងឪពុកម្ដាយរបស់គេអះអាងថា ខាងតុលាការជាអ្នកប្រាប់អោយធ្វើរបៀបនេះ។ ចំពោះរឿងទទួលលាភសក្ការៈពីក្រុមជនសង្ស័យក្នុងការធ្វើលិខិតបញ្ជាក់នេះគឺលោកបានទទួលត្រឹមម្នាក់35000៛ប៉ុណ្ណោះក្រោយពេលបែកធ្លាយរឿងនេះថ្នាក់លើ បានហៅលោកទៅធ្វើការសួរនាំដែរ។
លោកមេប៉ុស្តិនៅតែអះអាងថា មូលហេតុដែលលោកហ៊ានចេញលិខិតបញ្ជាក់ឲ្យនេះ ដោយសារតែក្រុមជនសង្ស័យ 4នាក់រួមទាំងឪពុកម្ដាយបានអះអាងថា តុលាការជាអ្នកប្រាប់អោយធ្វើរបៀបនេះ ទើបលោកចេញឲ្យដោយរួមជាមួយអាជ្ញាធរភូមិ-ឃុំតែម្ដងទៅ។
ចំណែកលោកសម សាមួន ស្នងការនគរបាលខេត្តកំពង់ស្ពឺ មិនបានធ្វើអត្ថាធិប្បាយពាក់ព័ន្ធនឹងករណីនេះទេ កាលពីរសៀលថ្ងៃអាទិត្យទី១៤ សីហា ២០២២ ៕
ចែករំលែកព័តមាននេះ