សាច់កណ្តុរ មានភាពពេញនិយមជាខ្លាំងចំពោះបងប្អូនដែលចូលចិត្តទទួលទាន ដោយគេ អាចយកទៅធ្វើម្ហូបដូចជា ឆ្អើរ អាំង ឬក៏ឆាគ្រឿងជាដើម ។ អតីតកម្មករសំណង់ចំណាកស្រុកនៅឯប្រទេសថៃម្នាក់
សព្វថ្ងៃនេះ សាច់កណ្តុរ មានភាពពេញនិយមជាខ្លាំងចំពោះបងប្អូនដែលចូលចិត្តទទួលទាន ដោយគេ អាចយកទៅធ្វើម្ហូបដូចជា ឆ្អើរ អាំង ឬក៏ឆាគ្រឿងជាដើម ។ អតីតកម្មករសំណង់ចំណាកស្រុកនៅឯប្រទេសថៃម្នាក់ លោក មុយ រើន បានចាប់យកអាជីពចិញ្ចឹមសត្វកណ្តុរនេះ រយៈពេលជាង២ឆ្នាំមកហើយ ដោយលោកចាប់ផ្តើមចិញ្ចឹមតាំងពីឆ្នាំ២០១៩ ដើម្បីលក់ទៅឲ្យអ្នកនិយមសាច់កណ្តុរជាអាហារ និងយកទៅចិញ្ចឹមលក់បន្តផងដែរ ។
លោក មុយ រើន បានរៀបរាប់អោយដឹងថា ពីមុនលោកធ្វើជាកម្មករសំណង់នៅឯប្រទេសថៃ កាលពីឆ្នាំ២០១៥ ក្នុងពេលនោះលោកក៏បានរៀនពីការបង្កាត់ពូជកណ្តុរពីប្រទេសគេ លុះពេលត្រឡប់មកវិញ លោកក៏បានចាប់ផ្តើមសាកល្បងចិញ្ចឹមសត្វកណ្តុរយកសាច់ ដោយលោកបានបង្កើតកសិដ្ឋានខ្លួនឯងមួយឈ្មោះ «សុវណ្ណរចនា» ដែលស្ថិតនៅក្នុងភូមិសួនស្លា ឃុំក្តុលតាហែន ស្រុកបវេល ខេត្តបាត់ដំបង ។
លោកបន្តថា សម្រាប់សត្វកណ្តុរ គឺលោកយកពូជមកពីប្រទេសថៃ គឺកណ្តុរស្រែ ឬកណ្តុរប្រែង ដែលកណ្តុរឈ្មោលមានរាងតូចរហូតដល់ទម្ងន់១គីឡូជាង និងកណ្តុរញីរហូតដល់៧ឬ៨ខាំ ហើយដងខ្លួនរបស់វាមានពណ៌ប្រផេះខ្មៅ ឬពណ៌ទង់ដែង ចំណែកបរិវេណពោះមានពណ៌សប្រផេះ ។ ចំពោះការបង្កាត់ពូជ គឺលោកបានរៀនពីថៃខ្លះ និងមានបទពិសោធន៍ខ្លួនឯងខ្លះ ក៏ចាប់ផ្តើមបង្កើតរហូតមកដល់ពេលបច្ចុប្បន្ននេះតែម្តង ។
លោក រើន បន្តថា សព្វថ្ងៃនេះ លោកក៏តែងតែធ្វើសំណង់ធម្មតា ហើយឆ្លៀតពីការងារសំណង់ គឺការចិញ្ចឹមកណ្តុរ ដែលបានធ្វើឲ្យគ្រួសាររបស់លោកមានភាពធូរស្រាលមួយកម្រិត ព្រោះក្នុងមួយខែៗលោកអាចលក់កណ្តុរបានប្រាក់ពី២០០$ ទៅ៣០០$ ជាប្រចាំខែ ដោយក្នុងកណ្តុរបា១ក្បាល និងមេពូជ១ក្បាល លក់បានក្នុងតម្លៃ២០ដុល្លារ ហើយជាមធ្យមក្នុង១ខែ លោកលក់ចេញបានចន្លោះពី២០ទៅ៣០គូ ។
លោករើន និយាយបន្តថា ការចិញ្ចឹមកណ្តុរមានភាពងាយស្រួលជាងគេ បើធៀបនឹងការចិញ្ចឹមសត្វដទៃទៀត ព្រោះកណ្តុរមិនសូវមានជំងឺ ហើយរហ័សបានផលមកវិញ និងចំណាយដើមទុនតិច ។ ចំពោះការអោយផល គឺកណ្តុរឱ្យផលចន្លោះពី២ខែកន្លះទៅ៣ខែ គិតចាប់កូនកើត រហូតដល់ធំអាចហូបសាច់បាន ។
ចំពោះការចិញ្ចឹមកណ្តុរ លោក រើន បានឲ្យដឹងថា កសិដ្ឋានរបស់លោក គឺដាក់លូធ្វើជារបង ហើយយកមកផ្គុំជាប់គ្នាជាង១០០លូ ដោយទំហំលូ គឺ ៦០ X ៨០ និងកម្ពស់៨០ ហើយមានកណ្តុរជាង៥០០ក្បាល។ លោកបន្តថា ក្នុង១លូ អាចដាក់បានត្រឹម១២ក្បាលច្រើនបំផុត បើចំពោះកូនតូចៗអាចដាក់បាន២២ក្បាល ។ ដោយឡែកចំពោះការបង្កាត់ពូជវិញ គឺក្នុង១លូ អាចដាក់ត្រឹម២ក្បាល ឬ៣ក្បាលប៉ុណ្ណោះ។
លោកបានឱ្យទៀតថា ចំពោះម៉ូយភាគច្រើន គឺគាត់ទិញពូជពីលោកយកទៅចិញ្ចឹមសាកល្បង មុននឹងចាប់ផ្តើមចិញ្ចឹមបែបអាជីវកម្ម ដូចជានៅរាជធានីភ្នំពេញ ខេត្តកណ្តាល ខេត្តកំពង់ធំ ខេត្តតាកែវ ខេត្តកំពង់ចាម និងខេត្តផ្សេងៗទៀតជាច្រើន ។ ដោយឡែកចំពោះម៉ូយដែលមកទិញពូជកណ្តុរពីលោក គឺលោកជួយបង្រៀនពីរបៀបចិញ្ចឹមកណ្តុរដោយឥតគិតថ្ងៃ ។ លុះពេលចិញ្ចឹមបានផលច្រើន ហើយមិនអាចរកម៉ូយទិញបាន គឺលោកទទួលទិញវិញទាំងអស់ ដោយក្នុង១គីឡូ ក្រាម តម្លៃ១ម៉ឺនរៀល ។
លោកឱ្យដឹងទៀតថា ចំពោះការឲ្យចំណី គឺលោកឲ្យចំណីធម្មជាតិដូចជាស្រូវ ពោត និយាយរួមឲ្យតែចំណីសត្វវាស៊ីបានទាំងអស់ ។ ចំពោះដើមទុន ចង់សាកល្បងចិញ្ចឹមកណ្តុរដំបូង គឺអាចចំណាយប្រាក់ត្រឹម១០០$ ដោយត្រូវទិញកណ្តុរពូជញីឈ្មោះ១គូ និងរៀបចំដាក់លូដើម្បីចិញ្ចឹម និងចំណីរបស់វាតែប៉ុណ្ណោះ ។
ពាក់ព័ន្ធការចិញ្ចឹមកណ្តុរ លោក មុយ រើន បានបង្ហាញក្តីស្រម៉ៃថា លោកចង់ឃើញសាច់កណ្តុរមានលក់នៅគ្រប់ទីផ្សារក្នុងប្រទេសកម្ពុជា ហើយចង់ឃើញសាច់កណ្តុរ មានទីផ្សារដូចជាសាច់មាន់ សាច់ទា សាច់ជ្រូក និងសាច់គោ ដែលគេអាំងលក់នៅតាមទីកន្លែងនានា និងចង់បង្កើតការងារឲ្យកសិករខ្មែរយើងមានការងារធ្វើ ក្រៅពីការងារធ្វើការស្រែចម្ការ ឲ្យងាកមកការចិញ្ចឹមកណ្តុរបែបអាជីវកម្ម ៕
ចែករំលែកព័តមាននេះ