បើករថយន្ដមិនប្រយ័ត្ន បុកអ្នកជិះម៉ូតូរបួសធ្ងន់ ហើយរត់ចោលរថយន្ត
ខេត្តពោធិ៍សាត់ ៖ បុរសមិនស្គាល់អត្តសញ្ញាណម្នាក់បានបើករថយន្តទៅបុកម៉ូតូ បណ្ដាលឲ្យអ្នកបើកម៉ូតូរងរបួសធ្ងន់បញ្ជូនទៅសង្គ្រោះនៅមន្ទីរពេទ្យខេត្ត
ខេត្តពោធិ៍សាត់ ៖ បុរសមិនស្គាល់អត្តសញ្ញាណម្នាក់បានបើករថយន្តទៅបុកម៉ូតូ បណ្ដាលឲ្យអ្នកបើកម៉ូតូរងរបួសធ្ងន់បញ្ជូនទៅសង្គ្រោះនៅមន្ទីរពេទ្យខេត្ត រីឯអ្នកបើកបរមិនទទួលខុសត្រូវបែរជារត់ចោលរថយន្ដទៅបាត់។ គ្រោះថ្នាក់ចរាចរណ៍នេះបានកើតឡើងលើកំណាត់ផ្លូវជាតិលេខ៥ ចន្លោះគីឡូម៉ែត្រលេខ១៩៥ ១៩៦ស្ថិតក្នុងភូមិក្រពើរោទិ៍ ឃុំស្នាមព្រះ ស្រុកបាកាន ខេត្តពោធិ៍សាត់ កាលពីវេលាម៉ោង០៨ព្រឹក ថ្ងៃទី១៦ ខែមករា ឆ្នាំ២០១៧។
លោកវរៈសេនីយ៍ទោ រស់ ចំរើន ប្រធានការិយាល័យចរាចរណ៍ផ្លូវគោកនៃស្នងការដ្ឋាននគរបាលខេត្តពោធិ៍សាត់បានឲ្យដឹងថា រថយន្ដបង្កគ្រោះថ្នាក់ ជាប្រភេទតូយ៉ូតាស៊ីណា ពណ៌ស ពាក់ស្លាកលេខភ្នំពេញ 2AF-2926 ធ្វើដំណើរពីលិចទៅកើត។ ទៅដល់ចំណុចកើតហេតុបានបុកអ្នកជិះម៉ូតូដែលកំពុងធ្វើដំណើរស្របទិសគ្នា ហើយរថយន្ដបានធ្លាក់ចូលទៅក្នុងទឹកស្រែជាប់នៅទីនោះ ប៉ុន្តែមិនក្រឡាប់ទេ។ អ្នកបើកម៉ូតូឈ្មោះ ម៉ាត់ ចូត ភេទប្រុស អាយុ៣១ឆ្នាំ ជនជាតិខ្មែរអឥស្លាម រស់នៅឃុំស្នាមព្រះ ស្រុកបាកាន របួសធ្ងន់បញ្ជូនទៅសង្គ្រោះនៅមន្ទីរពេទ្យបង្អែកខេត្ត។
ចំណែកអ្នកបើកបររថយន្តមិនស្គាល់អត្តសញ្ញាណ ខណៈពដែលមនុស្សអ៊ូអរនោះ ស្រាប់តែគេចខ្លួនបាត់តែម្ដង។ ម៉ូតូជនរងគ្រោះម៉ាកហុងដាសេ១២៥ ពណ៌ខ្មៅ គ្មានស្លាកលេខ ខូចខាតយ៉ាងដំណំ។ រថយន្ត និងម៉ូតូសមត្ថកិច្ចបានយកទៅរក្សាទុកនៅការិយាល័យចរាចរណ៍ផ្លូវគោកនៃស្នងការដ្ឋាននគរបាលខេត្តដើម្បីដោះស្រាយទៅតាមច្បាប់ចរាចរណ៍ផ្លូវគោក៕
ចែករំលែកព័តមាននេះ