ខេត្តកំពង់ស្ពឺ ៖ ម្ចាស់ឧបករណ៍ភ្លេងដែលរងនូវការគប់បំផ្លាញពីសំណាក់ក្រុមបងធំជនបទ២នាក់បងប្អូន បានសំណូមពរដល់សមត្ថកិច្ចសូមជួយពន្លឿននីតិវិធីក្នុងការតាមចាប់ខ្លួនជនទាំង២យកមកទទួលខុសត្រូវចំពោះមុខច្បាប់ឲ្យបានឆាប់ផងព្រោះថា ពេលនេះគាត់រំពឹងលើសមត្ថកិច្ចហើយ។ លោក សុវណ្ណ ថេត ម្ចាស់វង់តន្ត្រីដែលរងនូវការគប់បំផ្លាញបានប្រាប់នៅរសៀលថ្ងៃទី១៣ មករា ២០១៧ថា មកដល់ពេលនេះលោកហាក់បីដូចជាមិនទាន់អស់ចិត្តនៅឡើយ ខណៈសមត្ថកិច្ចនៅមិនទាន់ចាប់ខ្លួនបងធំ២នាក់បងប្អូនដែលបានរួមគ្នាមកគប់បំផ្លាញឧបករណ៍ភ្លេងរបស់លោកបាននៅឡើយ។
លោកបន្តថា លោកមិនចង់បានអ្វីនោះទេ គឺគ្រាន់តែចង់ឲ្យសមត្ថកិច្ចចាត់ការតាមច្បាប់ហើយនឹងសងសំណងមកលោកដើម្បីយកមកទិញឧបករណ៍ភ្លេងដើម្បីលេងយកប្រាក់កម្រៃមកសងរដ្ឋវិញព្រោះ ថាឧបករណ៍ទាំងនេះគឺសុទ្ធសឹងជាលុយដែលលោកខ្ចីរដ្ឋយកមកទិញទេ។ ទោះយ៉ាងណាលោកក៏បានស្នើសុំឲ្យជនបង្កចូលខ្លួនមកដោះស្រាយគ្នាដោយសន្តិវិធីមុនរឿងឈានដល់ដំណាក់កាលតុលាការ វាប្រសើរជាង តែបើភាគីបង្កមិនចូលខ្លួនមកដោះស្រាយទេលោកមានតែសុំឲ្យសមត្ថកិច្ចជំនាញចាត់ការតាមនីតិវិធីប៉ុណ្ណោះ។ លោកវរសេនីយ៍ត្រី ទុយ ថេន អធិការរងនគរបាលស្រុកគងពិសីបានឲ្យដឹងថា ករណីនេះក្រោមការបញ្ជាផ្ទាល់ពីលោកឧត្តមសេនីយ៍ត្រីសម សាមួន ស្នងការនគរបាលខេត្ត រូបលោកបានដឹកនាំកម្លាំងឃ្លាំមើលជាប្រចាំដើម្បីឃាត់ខ្លួនយកមកចាត់ការតាមផ្លូវច្បាប់។
លោកអធិការរងបន្តថា ទោះជាជននេះរត់ទៅដល់ណាក៏មិនអាចគេចខ្លួនបានមួយជីវិតដែរ ច្បាប់គឺច្បាប់ម្យ៉ាងលោកស្នងការបានបញ្ជាដាច់ណាត់ថា ត្រូវតែចាប់ឲ្យបានដើម្បីលុបបំបាត់ក្មេងទំនើងឲ្យអស់ស្របតាមគោលការណ៍រាជរដ្ឋាភិបាលស្តីពីភូមិឃុំសុវត្ថិភាព។ ប្រជាពលរដ្ឋដែលដឹងរឿងបានស្នើសុំឲ្យលោកស្នងការធ្វើការផ្លាស់ប្តូរមេប៉ុស្តិ៍ជង្រុកចេញផង ព្រោះរយៈកាលកន្លងមកលោកមេប៉ុស្តិ៍រូបនេះមិនដែលបង្ក្រាបករណីក្មេងទំនើងបានម្តងណាឡើយព្រោះ តែហេតុដូច្នេះហើយបានជាក្មេងទំនើងកើតមានពេញស្រុកភូមិបែបនេះ។
ដោយឡែកបើតាមប្រភពពីមន្ត្រីនគរបាលព្រហ្មទណ្ឌកម្រិតស្រាល បង្ហើបប្រាប់គឺថាលោក ខេង ចាន់ថុល ដែលជានាយប៉ុស្តិ៍ហាក់បីដូចជាមិនសប្បាយចិត្តទាល់តែសោះ ខណៈដែលរឿងនេះលោកខំបិទបាំងតែបែរជាដឹងដល់លោកស្នងការទៅវិញ។ ប្រភពបន្តថា រឿងនេះបើមិនដឹងដល់លោកស្នងការទេ ម្លេះសមមិនមានវត្តមានមន្ត្រីនគររបាលណាមួយចុះធ្វើកំណត់ហេតុឡើយ។ ក្នុងនោះផងដែរប្រជាពលរដ្ឋក៏ដូចជាម្ចាស់វង់តន្ត្រីក៏បានថ្លែងអំណរគុណដល់លោក សម សាមួន ស្នងការនគរបាលខេត្តដែលបានយកចិត្តទុកដាក់ចាត់តាំងកម្លាំងបញ្ជាឲ្យតាមចាប់ក្រុមបងធំទាំងនេះយកមកផ្តន្ទាទោសដូចអ្វីដែលពួកគេបានប្រព្រឹត្ត។ បើតាមប្រភពក្រៅផ្លូវការមួយបង្ហើបថា បងធំពីរនាក់បងប្អូនដែលបានគប់បំផ្លាញឧបករណ៍ភ្លេងនេះ កំពុងតែរត់រកសាច់ញាតិបងបងប្អូនដែលជាអ្នកធ្វើការដោះស្រាយជួយសម្រួលកុំឲ្យមានការចាប់ខ្លួនពួកគេទៀតផង ជាមួយខាងប៉ុស្តិ៍រដ្ឋបាលជង្រុកដោយប្រើវិធីរាយការណ៍ទៅថ្នាក់លើថារកមិនឃើញ។
សូមរំលឹកថាក្នុងកម្មវិធីឡើងគេហដ្ឋានអ្នកភូមិមួយកន្លែងកាលពីវេលាម៉ោង១០និង៣០នាទីយប់ ថ្ងៃទី៨ មករា នៅភូមិអង្គរមាស ឃុំជង្រុក ស្រុកគងពិសី។ វង់តន្ត្រីដែលរងគ្រោះដោយសារបងធំនេះ ជាវង់តន្ត្រីរបស់លោក សុវណ្ណ ថេត ផ្សារដើមរកា។ តាមក្រុមតន្ត្រីបានឱ្យដឹងថា វង់តន្ត្រីរបស់ខ្លួនត្រូវបានម្ចាស់ផ្ទះជួលឱ្យមកប្រគំក្នុងកម្មវិធី ឡើងគេហដ្ឋាននៅភូមិឃុំខាងលើ។ ភ្លេងបានប្រគំកំដរភ្ញៀវតាំងពីហូបអាហាររហូតដល់រាំលេងកម្សាន្តមិនមានបញ្ហាអ្វីកើតឡើងនោះទេ ។
ស្រាប់តែក្រោយមកក៏លេចមុខក្មេងស្ទាវមួយក្រុមបានយកដុំថ្ម ដុំដី និងដំបងគប់មកលើក្រុមតន្ត្រី ដែលកំពុងតែច្រៀងកំដរកម្មវិធីបណ្តាលឱ្យអ្នកចម្រៀងភ័យលែងហ៊ានច្រៀងហើយភ្លេងក៏ឈប់ប្រគំដែរ។ ប្រភពបានបន្តទៀតថា បន្ទាប់ពីគប់មកលើអ្នកចម្រៀងហើយ ក្រុមក្មេងស្ទាវទាំងនោះបានគប់បំផ្លាញឧបករណ៍ភ្លេង និងវាយបំផ្លាញរថយន្ត ព្រមទាំងសម្ភារផ្សេងៗទៀត ។ ក្រោយកើតមានអំពើហិង្សាពីសំណាក់ក្រុមបងធំជនបទរួចមក ក្រុមតន្ត្រីបានរាយការណ៍ទៅនគរបាលប៉ុស្តិ៍ជង្រុក ដែលនៅជិតនោះដែរ តែពេលទៅដល់មិនឃើញមានមន្ត្រីនគរបាលណាម្នាក់នៅប្រចាំការឡើយ។
រហូតទាល់តែទូរស័ព្ទរកលោកអធិការរងនគរបាលស្រុកគងពិសី យ៉ាងយូរទើបឃើញមន្ត្រីនគរបាលព្រហ្មទណ្ឌប៉ុស្តិ៍មួយរូបទៅដល់កន្លែងកើតហេតុទាំងអាការស្រវឹងជោគ។ វត្តមានរបស់មន្ត្រីនគរបាលប៉ុស្តិ៍រូបនោះមិនត្រូវបានក្រុមបងបធំទាំងនោះខ្លាចញញើតឡើយ ពួកគេថែមទាំងបានសើចចំអកដល់មន្ត្រីនគរបាលនោះទៀតផង។ លុះមួយសន្ទុះធំ ទើបពួកបងធំជនបទទាំងនោះបានគេចខ្លួនបាត់អស់ខណៈមន្ត្រីនគរបាលស្នើសុំកម្លាំងបន្ថែមដើម្បីឃាត់ខ្លួនពួកគេ។
មន្ត្រីនគរបាលមួយរូបដែលអះអាងថា ខ្លួននៅប្រចាំការប៉ុស្តិ៍រដ្ឋបាលជង្រុកបាននិយាយថា ពួកមុខសញ្ញា ដែលបានប្រព្រឹត្តអំពើហិង្សាទាំងអស់នោះ គឺគាត់ស្គាល់អត្តសញ្ញាណខ្លះហើយ ដូច្នេះសូមឱ្យខាងក្រុមភ្លេងរៀបចំទុកដាក់អីវ៉ាន់ដឹកវិលត្រឡប់ទៅផ្ទះវិញសិន រង់ចាំព្រឹកទើបមកធ្វើកំណត់ហេតុ។ មុខសញ្ញាបងធំ២នាក់បងប្អូនត្រូវបានអ្នកភូមិស្គាល់ច្បាស់ជាងគេគឺឈ្មោះ ឌឿន និងឈ្មោះ ដា មានទីលំនៅភូមិឃុំកើតហេតុតែម្តង។ មុខសញ្ញាបងធំទាំង២នាក់នេះគឺតែងតែបង្កការអុកឡុកនៅតាមកម្មវិធីបុណ្យទាន ឬនៅពេលណាដែលមានការប្រគំតន្ត្រី ឬក៏ចាក់ធុងបាស់មិនដែលខាននោះទេ។ ជនទាំង២នាក់នេះតែងតែរត់គេចខ្លួនក្រោយបង្កហេតុម្តងៗ តែជននេះក៏ធ្លាប់ត្រូវបានសមត្ថកិច្ចចាប់ខ្លួនក្នុងបទប្រព្រឹត្តអំពើហិង្សាយកទៅដាក់គុកដែរនាពេលកន្លងមក តែមិនដែលជាប់បានយូរនោះទេ ក៏ឃើញវិលមកវិញ ហើយប្រព្រឹត្តលើសដើម។
ភ្ញៀវ និងសាច់ញាតិម្ចាស់កម្មវិធីបានរិះគន់ថា នគរបាលប៉ុស្តិ៍ជង្រុកហាក់ដូចជាខ្លាចញញើតនឹងអំណាចក្មេងពាលទាំងនោះ មិនហ៊ានហៅសួរនាំ ឬធ្វើកំណត់ហេតុឡើយ ទុកឱកាសឱ្យក្រុមក្មេងពាលដើរចេញពីកន្លែងបង្កហេតុយ៉ាងរំភើយ។ នៅក្នុងភូមិកើតហេតុឱ្យតែមានបុណ្យ ទាន ឬពិធីមង្គលការ គឺក្រុមក្មេងពាលទាំងនេះតែងតែបង្កការអុកឡុកមិនដែលខានឡើយ ហើយក៏មានការរិះគន់ទៅដល់លោកនាយប៉ុស្តិ៍ផងដែរ ពាក់ព័ន្ធនឹងក្រុមក្មេងពាលទាំងនេះ ដោយអ្នកខ្លះលើកឡើងថា លោកនាយប៉ុស្តិ៍ហាក់មិនមានសមត្ថភាពក្នុងការបង្ក្រាបក្រុមបងធំជនបទទាំងនេះឡើយ មិនដឹងថាតើមានមូលហេតុអ្វីនោះទេ បានជាមិនដែលសូវឃើញចាប់ខ្លួនជនល្មើស។ ម្ចាស់វង់ភ្លេងរង់ចាំមើលថា តើសមត្ថកិច្ចនគរបាលជង្រុក និងជំនាញព្រហ្មទណ្ឌស្រុកគងពីសី អាចចាប់ខ្លួនក្រុមបងធំទាំងនេះ យកមកចាត់ការតាមផ្លូវច្បាប់បានដែរឬយ៉ាងណាដើម្បីឱ្យគាត់ទទួលបានសំណងការខូចខាតមកវិញ៕
ចែករំលែកព័តមាននេះ