ស្ថានីយបង្កាត់ពូជត្រី និងផលិតពូជវារីសត្វមេគង្គលើនៅខេត្តស្ទឹងត្រែង សម្ភោធជាផ្លូវការ
- ស្ទឹងត្រែង
ខេត្តស្ទឹងត្រែង ៖ មជ្ឈមណ្ឌលស្រាវជ្រាវ និងផលិតពូជវារីសត្វមេគង្គលើនៅខេត្តស្ទឹងត្រែង ត្រូវបាន
ខេត្តស្ទឹងត្រែង ៖ មជ្ឈមណ្ឌលស្រាវជ្រាវ និងផលិតពូជវារីសត្វមេគង្គលើនៅខេត្តស្ទឹងត្រែង ត្រូវបាន
ខេត្តស្ទឹងត្រែង ៖ មជ្ឈមណ្ឌលស្រាវជ្រាវ និងផលិតពូជវារីសត្វមេគង្គលើនៅខេត្តស្ទឹងត្រែង ត្រូវបានសម្ភោធដាក់ឲ្យប្រើប្រាស់ជាផ្លូវការ នៅរសៀលថ្ងៃទី១០ ខែសីហា ឆ្នាំ២០២២ ក្រោមអធិបតីលោក
វេង សាខុន រដ្ឋមន្ត្រីក្រសួងកសិកម្ម ព្រមទាំងលោកស្រី Maryam Salim នាយិកាធនាគារពិភពលោក ប្រចាំនៅកម្ពុជា ។
ក្នុងពិធីជាប្រវត្តិសាស្ត្រនេះ ក៏មានវត្តមានឯកឧត្តម លោកជំទាវតំណាងក្រសួង-ស្ថាប័នពាក់ព័ន្ធ ឯកឧត្តមប្រធានក្រុមប្រឹក្សាខេត្ត ឯកឧត្តម លោកជំទាវ លោក លោកស្រី អ្នកនាងកញ្ញា ភ្ញៀវកិត្តិយសជាតិ-អន្តរជាតិ សិស្សានុសិស្ស និងបងប្អូនប្រជាពលរដ្ឋយ៉ាងច្រើនកុះករផងដែរ ។
លោក វេង សាខុន រដ្ឋមន្ដ្រីបានថ្លែងអំណរគុណចំពោះរដ្ឋបាលខេត្តស្ទឹងត្រែង ដែលបានចូលរួម និងផ្តល់កិច្ចសហការជាមួយក្រសួងកសិកម្ម រុក្ខាប្រមាញ់ និងនេសាទក្នុងការអភិវឌ្ឍន៍វិស័យកសិកម្មដោយទទួលបានលទ្ធផលគួរជាទីមោទនៈ ។ គ្រានោះ លោករដ្ឋមន្ត្រីក៏បានថ្លែង អំណរគុណចំពោះលោកស្រី Maryam Salim ដែលបានចូលរួមចំណែកយ៉ាងសកម្មក្នុងការអភិវឌ្ឍន៍វិស័យកសិកម្មនៅកម្ពុជា ដែលធនាគារពិភពលោកបានគាំទ្រដល់ការអនុវត្តគម្រោងគ្រប់គ្រងធនធានទឹកចម្រុះដំណាក់កាលទី៣ សមាសភាគទី១ នៅក្នុងខេត្តក្រចេះ និងខេត្តស្ទឹងត្រែងនេះ ។
លោករដ្ឋមន្ត្រីបានលើកឡើងថាៈការកសាងមជ្ឈមណ្ឌលនេះ ស្របពេលដែលរដ្ឋបាលជលផលត្រូវការជាចាំបាច់ក្នុងការអភិវឌ្ឍន៍វិស័យវារីវប្បកម្មនៅភូមិភាគឦសាន ក្នុងនោះរួមមាន ខេត្តស្ទឹងត្រែង ខេត្តក្រចេះ ខេត្តមណ្ឌលគិរី ខេត្តរតនគិរី និងខេត្តព្រះវិហារ ដោយឆ្លើយតបទៅនឹងផែនការយុទ្ធសាស្ត្រជាតិអភិវឌ្ឍន៍វារីវប្បកម្មឆ្នាំ២០១៦-២០៣០ និងផែនការអភិវឌ្ឍន៍វិស័យកសិកម្មឆ្នាំ២០២២-២០៣០ផងដែរ ។
លោករដ្ឋមន្ត្រី បានមានប្រសាសន៍បញ្ជាក់ថាៈមជ្ឈមណ្ឌល នឹងដើរតួនាទីផលិត និងផ្សព្វផ្សាយពូជវារីសត្វ ជាកន្លែបណ្តុះបណ្តាលបច្ចេកទេសចិញ្ចឹម កន្លែងបង្កាត់ និងអភិរក្សពូជវារីសត្វ ឆ្លើយតបឲ្យ
បានទាន់ពេលវេលា និងតម្រូវការជាចាំបាច់ក្នុងការលើកកម្ពស់ប្រសិទ្ធភាព នៃការគ្រប់គ្រងធនធានជលផលនៅតំបន់ទន្លេមេគង្គលើឲ្យបានកាន់តែប្រសើរឡើង ។
លោករដ្ឋមន្ដ្រីសង្ឃឹម និងជឿជាក់យ៉ាងមុតមាំថា មជ្ឈមណ្ឌលនេះនឹងបំពេញតួនាទីជាសេនាធិការផ្សព្វផ្សាយបច្ចេកទេស និងពូជវារីសត្វរបស់រដ្ឋបាលជលផលថ្នាក់តំបន់ក្នុងភូមិភាគឦសាន ហើយរំពឹងថានាពេលអនាគតដ៏ខ្លីអនុវិស័យវារីវប្បកម្មនៅតំបន់នេះនឹងមានការអភិវឌ្ឍន៍បានដល់គ្រប់មូលដ្ឋាន និងធ្វើឲ្យជីវភាពរបស់បងប្អូនប្រជាពលរដ្ឋ ពិសេសបងប្អូនជនជាតិភាគតិច នឹងត្រូវបានលើកកម្ពស់ឲ្យកាន់តែល្អប្រសើរជាលំដាប់ រក្សាការពារ និងបង្កើតពូជត្រីកម្រ និងជិតផុតពូជឲ្យមានក្នុងអាង បឹង ស្ទឹង និងទន្លេ នៅទូទាំងតំបន់នេះឡើងវិញ ។
លោករដ្ឋមន្ដ្រីបានសំណូមពរឲ្យធនាគារពិភពលោក អាជ្ញាធរខេត្ត ស្រុក កងកម្លាំងទាំងបី ក្រសួង ស្ថាប័នពាក់ព័ន្ធ មេត្តាបន្តជួយផ្តល់កិច្ចសហការ ដើម្បីឲ្យមជ្ឈមណ្ឌលដំណើរការមុខងាររបស់ខ្លួនប្រកបដោយនិរន្តរភាព និងទទួលបានជោគជ័យ ។
លោក ពុំ សុថា ប្រតិភូរាជរដ្ឋាភិបាលកម្ពុជា ទទួលបន្ទុកជាប្រធានរដ្ឋបាលជលផលបានឲ្យដឹងថា នៅឆ្នាំ២០១៦ រាជរដ្ឋាភិបាលបានសម្រេចទទួលយកប្រាក់កម្ចីពីធនាគារពិភពលោក ដើម្បីគាំទ្រដល់ការអនុវត្តគម្រោងស្តីពី « ការគ្រប់គ្រងធនធានទឹកចម្រុះទន្លេមេគង្គ » ដំណាក់កាលទី៣ ក្នុងនោះរដ្ឋបាលជលផលទទួលអនុវត្តសមាសភាគទី១ ផ្តោតលើការគ្រប់គ្រងធនធានជលផល និងវារីសត្វ នៅភូមិភាគឦសាន ហើយសមិទ្ធិផលដែលនឹងដាក់ឲ្យប្រើប្រាស់នៅថ្ងៃនេះ គឺជាផ្នែកមួយនៃគម្រោងដែលបានអនុវត្តក្នុងរយៈពេលកន្លងមក ។
គួររំលឹកថា ដោយមានការអនុញ្ញាតពីឯកឧត្តមរដ្ឋមន្ត្រី និងការគាំទ្រថវិកាពីគម្រោងខាងលើ មជ្ឈមណ្ឌល ដែលស្ថិតក្នុងភូមិបាដើម ឃុំសាមឃួយ ស្រុកសេសាននេះ ចាប់ផ្តើមសាងសង់ឡើងនៅថ្ងៃទី២៣ ខែតុលា ឆ្នាំ២០២០ និងបានបញ្ចប់ការសាងសង់រួចរាល់ជាស្ថាពរ នៅថ្ងែទី២៧ ខែកញ្ញា ឆ្នាំ២០២១លើផ្ទៃដីសរុប១០.៤ហិកតា ដោយចំណាយថវិកាសរុបចំនួន ១.៧៥០.២៥២ដុល្លារអាមេរិក ៕
ចែករំលែកព័តមាននេះ