សហរដ្ឋអាមេរិក ៖ ប្រធានាធិបតីឈ្នះឆ្នោត Donald Trump បានមានប្រសាសន៍កាលពីថ្ងៃពុធថា លោកនឹងដកខ្លួនចេញពីការរកស៊ីលំដាប់ពិភពលោក ដោយទុកឲ្យកូនប្រុសកាន់ជំនួសវិញ ធ្វើឲ្យអ្នកឃ្លាំមើលគិតថា
សហរដ្ឋអាមេរិក ៖ ប្រធានាធិបតីឈ្នះឆ្នោត Donald Trump បានមានប្រសាសន៍កាលពីថ្ងៃពុធថា លោកនឹងដកខ្លួនចេញពីការរកស៊ីលំដាប់ពិភពលោក ដោយទុកឲ្យកូនប្រុសកាន់ជំនួសវិញ ធ្វើឲ្យអ្នកឃ្លាំមើលគិតថា វាមិនអាចគ្រប់គ្រាន់ក្នុងការការពារកុំឲ្យមានជម្លោះផលប្រយោជន៍ ពេលលោកឡើងកាន់អំណាចបានទេ ។
លោក Trump បាននិយាយនៅក្នុងសន្និសីទកាសែតមួយថា លោកនឹងលាលែងពីមុខតំណែងទាំងអស់ដែលលោកមាននៅក្នុងសណ្ឋាគារ កន្លែងវាយកូនហ្គោល និងអាជីវកម្មរាប់រយទៀត ដើម្បីបង្ហាញថា លោកនឹងមិនយកនយោបាយមកចំណេញផលប្រយោជន៍ផ្ទាល់ខ្លួនឡើយក្នុងពេលឡើងកាន់តំណែងនាពេលខាងមុខ ។
មេដឹកនាំគណបក្សសាធារណរដ្ឋរូបនេះកំពុងតែស្ថិតនៅក្រោមសម្ពាធឲ្យមានការដកខ្លួនពីការធ្វើអាជីវកម្មឯកជន មុនពេលចូលកាន់តំណែងនៅ White House នាថ្ងៃទី២០ មករា ខាងមុខ ។
លោកនិយាយថា ៖ « តាមពិតទៅ ខ្ញុំក៏អាចកាន់អាជីវកម្មរបស់ខ្ញុំ និងធ្វើជាប្រធានាធិបតី ក្នុងពេលតែមួយក៏បានដែរ តែខ្ញុំមិនចូលចិត្តធ្វើដូច្នេះទេ ព្រោះវាអាក្រក់មើលបន្តិច ។ ប្រសិនបើខ្ញុំចង់ធ្វើនោះ ខ្ញុំនឹងធ្វើបាន » ។
តាមគេមើលទៅលោក Trump ក៏នៅតែលូកដៃចូលក្នុងអាជីវកម្មរបស់ខ្លួនដែរ ខណៈពេលកំពុងរៀបចំចូលកាន់មុខតំណែងជាប្រធានាធិបតី ។ លើសពីនេះទៀត លោកបានធ្វើកិច្ចព្រមព្រៀងអាជីវកម្មមួយជាមួយឌូបៃ ដែលមានតម្លៃដល់ទៅ២ប៊ីលានដុល្លារសហរដ្ឋអាមេរិកឯណោះកាលពីសប្តាហ៍មុន ។
លោកស្រី Sheri Dillon មេធាវីរបស់លោក Trump បានមានប្រសាសន៍ថា ប្រាក់ចំណេញដែលបានមកពីសណ្ឋាគាររបស់លោក Trump នឹងត្រូវបរិច្ចាគទៅឲ្យរតនាគារអាមេរិក ។
លោកស្រី Dillon បន្តថា គ្រប់អាជីវកម្មរបស់លោក Trump នឹងមិនចូលទៅថ្នាក់អន្តរជាតិទេ ពេលលោក Trump កំពុងកាន់តំណែង ។ អាជីវកម្មទាំងអស់នឹងត្រូវបានធ្វើនៅក្នុងស្រុក។ លោក Trump នឹងអាចដឹងពីអាជីវកម្មរបស់លោក តាមរយៈព័ត៌មានតែប៉ុណ្ណោះ ព្រោះលោកនឹងមិនលូកដៃឡើយ ។
លោកស្រីបន្ថែមថា កូនស្រីរបស់លោក Trump គឺ Ivanka ក៏មិនអាចប្រឡូកចូលក្នុងអាជីវកម្មរបស់គ្រួសារបានដែរ ព្រោះលោក Trump នឹងប្រគល់តំណែងដល់ស្វាមីរបស់នាង ជាទីប្រឹក្សានៅក្នុង White House ៕
ចែករំលែកព័តមាននេះ