ខេត្តឧត្តរមានជ័យ ៖ ពិតជារន្ធត់ខ្លាំងណាស់ ខណៈក្មេងប្រុសតូចម្នាក់បានខ្ទាតចូលទៅក្រោមរថយន្តតែសំណាងល្អគ្រាន់តែបណ្ដាលឲ្យរងរបួសស្រាលប៉ុណ្ណោះ ប៉ុន្តែស្ត្រី២នាក់ …
ខេត្តឧត្តរមានជ័យ ៖ ពិតជារន្ធត់ខ្លាំងណាស់ ខណៈក្មេងប្រុសតូចម្នាក់បានខ្ទាតចូលទៅក្រោមរថយន្តតែសំណាងល្អគ្រាន់តែបណ្ដាលឲ្យរងរបួសស្រាលប៉ុណ្ណោះ ប៉ុន្តែស្ត្រី២នាក់ទៀតបានរងរបួសធ្ងន់ ក្នុងហេតុការណ៍គ្រោះថ្នាក់ចរាចរណ៍កាលពីវេលាម៉ោង៤ និង១០នាទីល្ងាច ថ្ងៃទី១២ ខែមករា ឆ្នាំ២០១៧ នៅតាមបណ្តោយផ្លូវជាតិលេខ PR១៧៤ ចំណុចមុខសាលាបឋមសិក្សាអន្លង់វែង ស្ថិតក្នុងភូមិអូរចិញ្ចៀន ឃុំអន្លង់វែង ស្រុកអន្លង់វែង ខេត្តឧត្តរមានជ័យ។
ស្ត្រីរងគ្រោះម្នាក់ឈ្មោះ ភួង សុភ័ណ្ឌ អាយុ៣២ឆ្នាំ រងរបួសលើផ្ទៃមុខ និងដៃជើងធ្ងន់ និងកូនបង្កើតឈ្មោះ មុយ សុលាប ទើបតែមានអាយុ៨ខែ រងរបួសរបកស្បែកដៃជើងស្រាល រីឯស្ត្រីម្នាក់ទៀតឈ្មោះ សាន្ត សុភា អាយុ២៤ឆ្នាំ រងរបួសផុងលលាដ៍ក្បាល និងផ្ទៃមុខដៃជើងធ្ងន់ធ្ងរ ត្រូវជាប្អូនថ្លៃស្ត្រីរងគ្រោះខាងលើ ជាអ្នកបើកម៉ូតូម៉ាកហុដាឌ្រីម សេ១២៥ ស៊េរីឆ្នាំ២០០៨ ពណ៌ខ្មៅ គ្មានស្លាកលេខ ។ ដោយឡែកស្ត្រីជាជនជាតិថៃម្នាក់មិនបានស្គាល់អត្តសញ្ញាណបើកបររថយន្តម៉ាក ISUZU ពណ៌ទឹកប្រាក់ ពាក់ស្លាកលេខ ថៃ ខេត្តសុរិន្ទ ៦៤៤៦ ត្រូវបាននគរបាលនៃអធិការដ្ឋានស្រុកអន្លង់វែង ចាប់ឃាត់ទាំងមនុស្សទាំងរថយន្ត ។
សាក្សីនៅកន្លែងកើតហេតុឱ្យដឹងថា មុនពេលកើតហេតុគេបានឃើញស្ត្រីម្នាក់ជិះម៉ូតូឌុបស្ត្រីម្នាក់និងក្មេងប្រុសម្នាក់ ធ្វើដំណើរតាមផ្លូវជាតិពីកើតទៅលិច ខណៈមកដល់ចំណុចកើតហេតុស្រាប់តែរថយន្តបង្កម៉ាក ISUZU បើកមកបុកម៉ូតូពីក្រោយពេញទំហឹង បណ្តាលឱ្យស្ត្រីទាំង២នាក់រងរបួសធ្ងន់ ដោយឡែកក្មេងប្រុសតូចខ្ទាតចូលទៅក្រោមរថយន្តមើលទៅគួរឱ្យរន្ធត់ណាស់ តែសំណាងល្អនៅមានអាយុជីវិតគ្រាន់តែរងរបួសស្រាលប៉ុណ្ណោះ ។
នគរបាលចរាចរណ៍ស្រុកអន្លង់វែងបានឱ្យដឹងថា បន្ទាប់ពីកើតមានករណីគ្រោះថ្នាក់ចរាចរណ៍ភ្លាម មន្ត្រីជំនាញបានចុះទៅដល់កន្លែងកើតហេតុ ដោយកម្លាំងមួយផ្នែកនាំស្ត្រីរងគ្រោះទៅមន្ទីរពេទ្យបង្អែកស្រុកអន្លង់វែងដើម្បីសង្គ្រោះ ឯកម្លាំងមួយផ្នែកទៀតតាមចាប់ឃាត់ខ្លួនស្ត្រីជនជាតិថៃជាអ្នកបើករថយន្តបង្កយកមកអធិការដ្ឋាននគរបាលស្រុក ដើម្បីធ្វើដោះស្រាយតាមផ្លូវច្បាប់ ។
នគរបាលចរាចរណ៍បញ្ជាក់ថា ស្ត្រីជនជាតិថៃដែលបើករថយន្តបង្កបានអះអាងថា នឹងទទួលខុសត្រូវទៅតាមផ្លូវច្បាប់ចំពោះស្ត្រីរងគ្រោះ២នាក់ និងកូនតូច ។
ប្រភពពីក្រុមគ្រូពេទ្យបង្អែកស្រុកអន្លង់វែងបានឱ្យដឹងថា ស្ត្រីរងគ្រោះទាំង២នាក់មានអាការៈធ្ងន់ធ្ងរពេក គ្រូពេទ្យបានបញ្ជូនបន្តទៅធ្វើការសង្គ្រោះនៅឯមន្ទីរពេទ្យខេត្តសៀមរាប ចំណែកក្មេងប្រុសទើបមានអាយុ៨ខែនោះគ្រូពេទ្យមិនទាន់ដឹងថា ផ្នែកក្បាល និងដងខ្លួនក្មេងនោះដែលបោកទៅនឹងផ្លូវជាតិយ៉ាងដូចម្តេចនៅឡើយទេ ពីព្រោះនៅក្នុងមន្ទីរពេទ្យខ្វះសម្ភារៈសម្រាប់ឆ្លុះមើល ៕
ចែករំលែកព័តមាននេះ