រាជធានីភ្នំពេញ ៖ នៅលើបណ្ដាញសង្គមហ្វេសប៊ុករបស់លោកឧត្តមសេនីយ៍ទោ ឈឿន ប៊ុនឆន ប្រធាននាយកដ្ឋាននគរបាលវិទ្យុទាក់ទង បានអោយដឹងនៅព្រឹកថ្ងៃទី០៩ ខែសីហា ឆ្នាំ២០២២នេះ ថា មន្ទីរពហុព្យាបាលម្លិះដង្កោ ត្រូវតែទទួលខុសត្រូវភាពអសីលធម៌របស់ខ្លួន ពេលនេះ ស្ថានភាពជំងឺរបស់ក្មេងប្រុសអាយុ១៤ឆ្នាំ បានជួបគ្រោះថ្នាក់ចរាចរណ៍ ស្ថិតនៅគ្រោះថ្នាក់នៅឡើយ ដោយសារការសង្គ្រោះបឋមមានភាពយឺតយ៉ាវ ។ ឈាមកកក្នុងខួរក្បាល បែកលលាដ៍ ផ្នែកខាងក្រោយ បែកឆ្អឹងក បាក់ដៃ ខ្ទាំសួតខ្លាំង និងមានឈាមហូរតាមត្រចៀក ។ មន្ទីរពហុព្យាបាល និងសម្ភព ម្លិះដង្កោ ត្រូវតែទទួលខុសត្រូវភាពអសីលធម៌របស់ខ្លួន ។
តាមរយៈការបញ្ចេញមតិជាច្រើននាក់ នៅលើបណ្ដាញសង្គមហ្វេសប៊ុកបង្ហាញថា មន្ទីរពហុព្យាបាល ម្លិះដង្កោ នេះ មានបញ្ហាច្រើនលើក ច្រើនសារមកហើយ ចុះហេតុអ្វីនៅដំណើរការបានយ៉ាងរលូន នៅផ្តល់ឲ្យពួកគេបង្កើតភាពឈឺចាប់ដល់ប្រជាជនបន្តទៀត ? នេះជាការលើកឡើងរបស់លោកឧត្តមសេនីយ៍ទោ ឈឿន ប៊ុនឆន ។
លោកឧត្តមសេនីយ៍ទោ ឈឿន ប៊ុនឆន អោយដឹងថា ខាងមន្ទីរពហុព្យាបាលមួយនេះ បានបញ្ជាឲ្យលោកលុបអ្វីៗបានបង្ហោះ ចេញពីលើហ្វេសប៊ុក ។ ទៅមិនរួចទេ លោកដឹងថា កំពុងធ្វើអ្វី! លោកនឹងរងចាំទទួលខុសត្រូវគ្រប់បែបគ្រប់យ៉ាង ប្រសិនការបង្ហោះរបស់លោកខុសច្បាប់ ឬខុសក្រមសីលធម៌ ឬខុសពីការពិត ។ល។
លោកឧត្តមសេនីយ៍ទោ ឈឿន ប៊ុនឆន បានជូនទៅមន្ទីរពហុព្យាបាល ចំនួន ២០០ដុល្លារ និងស្នើសុំបញ្ជូនក្មេងរងគ្រោះរូបនោះ ទៅពេទ្យគន្ធបុប្ផា ទាំងម្តាយក្មេងប្រុស សំពះអង្វរទៀត ប៉ុន្តែអស់លោក លោកស្រីមិនព្រមឡើយ ។ អស់លោកគិតមើល តើអស់លោកបានធ្វើអ្វីខ្លះ បានជាអស់លោកទាមទារ ថ្លៃពីគ្រួសារជនរងគ្រោះ រហូត ៤២០ដុល្លារ តើមន្ទីរពេទ្យរបស់អស់លោកជាស្តង់ដាពេទ្យសិង្ហបុរី មែនទេ ? តែដោយសារឃើញក្មេងឈឺ ទ្រហ៊ោយំ និងភ័យខ្លាចជួយសង្គ្រោះលែងបាន លោកឧត្តមសេនីយ៍ទោ សុខចិត្តបង់ប្រាក់គ្រប់ចំនួន ៤២០ ដុល្លារអាមេរិក បែរជាខាងមន្ទីរពហុព្យាបាល មិនអនុញ្ញាតិ ឲ្យដឹកកុមារនោះទៅពេទ្យគន្ធបុប្ផាឡើយ ដោយពួកគេ ទាមទារឲ្យលោកលុបអ្វីដែលបានបង្ហោះលើហ្វេសបុកជាមុនសិន ។ លោកបានសុំការ ជំនួយពីកម្លាំងនគរបាលខណ្ឌដង្កោ មានលោកអធិការស្តីទីដឹកនាំចុះទៅផ្ទាល់ ទើបអស់លោកយល់ព្រមឲ្យដឹកយកទៅពេទ្យគន្ធបុប្ផា តើអស់លោកមានចេតនាអ្វី ? អាយុជីវិតណា អស់លោក ។
លោកឧត្តមសេនីយ៍ទោ ឈឿន ប៊ុនឆន សង្ឃឹមថា ករណីនេះនឹងមានយុត្តិធម៌ដល់ក្មេង និងគ្រួសាររងគ្រោះ ពិសេសមានយុត្តិធម៌សង្គមមួយ ដែលនឹងជាគំរូមួយដល់មន្ទីរព្យាបាលឯកជននានា នៅទូទាំងប្រទេស ។ ប្រជាជនខ្មែររងចាំយុត្តិធម៌មួយនេះ ប៉ុន្តែបើលោកជាអ្នកខុស លោកសុខចិត្តទទួលខុសត្រូវចំពោះមុខច្បាប់ ។
សូមជម្រាបថា លោកឧត្តមសេនីយ៍ទោ ឈឿន ប៊ុនឆន ប្រធាននាយកដ្ឋាននគរបាលវិទ្យុទាក់ទង នៃអគ្គស្នងការដ្ឋាននគរបាលជាតិ នៅយប់ថ្ងៃទី០៨ ខែសីហា ឆ្នាំ២០២២ បានធ្វើការរិះគន់នៅលើហ្វេសប៊ុកផ្លូវការរបស់លោក លើម្ចាស់មន្ទីរពហុព្យាបាល និងសម្ភព ម្លិះ ដង្កោ ថា បើម្ចាស់មន្ទីរពហុព្យាបាលនេះ ជាជនជាតិខ្មែរ១០០ភាគរយ មិនអសីលធម៌ និងមិនអាក្រក់ឈា.មខ្មៅបែបនេះឡើយ ។
ឧត្តមសេនីយ៍ទោ ឈឿន ប៊ុនឆន បានថ្លែងថា កុមាររូបនេះ ជាកូនបុគ្គលិករបស់លោក ហើយកុមាររូបនេះ លួចទៅធ្វើជាងសំណង់ទាំងខ្លួនឯងអាយុទើបតែ១៤ឆ្នាំ ដោយសារជីវភាពគ្រួសារក្រីក្រ ។
ឧត្តមសេនីយ៍ទោ ឈឿន ប៊ុនឆន បន្តថា ថ្ងៃទី០៨ ខែសីហានេះ ក្មេងរូបនេះបានជួបគ្រោះថ្នាក់ចរាចរណ៍ តាំងពីថ្ងៃមេឃ នៅមានពន្លឺថ្ងៃ និងត្រូវដឹកទៅសង្គ្រោះនៅមន្ទីរពហុព្យាបាល និងសម្ភព ម្លិះ ដង្កោ ស្ថិតនៅផ្លូវ២១៧ ភូមិខ្វា សង្កាត់ដង្កោ ខណ្ឌដង្កោ ។ ហើយក្មេងរងគ្រោះម្នាក់ ក្នុងចំណោម២នាក់ បានបាត់បង់ជីវិតទៅហើយ នៅសល់តែកុមារម្នាក់នេះ រងរបួសធ្ងន់ ដែលត្រូវបញ្ជូនទៅកាន់មន្ទីរពេទ្យគន្ធបុប្ផា ។ ប៉ុន្ទែមន្ទីរពហុព្យាបាលនេះ មិនព្រមបញ្ជូនកុមាររូបនោះចេញឡើយ ដោយសារម្តាយជនរងគ្រោះពុំមានប្រាក់បង់គ្រប់ចំនួន ៤២០ដុល្លារអាមេរិក តាមការចេញវិក័យប័ត្រ ហើយម្តាយក្មេងរងគ្រោះសំពះអង្វរសុំបង់ត្រឹម ២០០ដុល្លារ ៕
ចែករំលែកព័តមាននេះ