ប្រទេសថៃ ៖ អគ្គនាយកសភាពាណិជ្ជកម្មថៃ លោក Isara Vongkusolkit ថ្លែងថា វិស័យអាជីវកម្មបានបង្កើនការព្យាករក្នុងការនាំចេញនៅឆ្នាំ២០១៧ ខណៈទិដ្ឋភាពសេដ្ឋកិច្ចក្នុងស្រុក និងលើពិភពលោកល្អប្រសើរឡើង ។
លោក Isara តំណាងក្រុមប្រឹក្សាអចិន្ត្រៃយ៍កណ្តាលនៃពាណិជ្ជកម្ម ឧស្សាហកម្ម និងធនាគារកិច្ច (JSCCIB) ឱ្យដឹងថា ការព្យាករលើការនាំចេញក្នុងឆ្នាំនេះនឹងកើនពី១ទៅ៣% ព្រោះតែការកើនឡើងនៃតម្លៃប្រេង ។
លោកឱ្យដឹងថា ពីដំបូង JSCCIB ព្យាករថា នឹងកើនឡើងតែ០ទៅ២%ប៉ុណ្ណោះ ។ ការកើនឡើងនៃតម្លៃកសិផលបានជួយដល់ការនាំចេញ និងបង្កើនប្រាក់ចំណូលដល់ប្រទេសផងដែរក្នុងឆ្នាំនេះ។ លោកថ្លែងថា ៖ « គ្រោះរាំងស្ងួតកាលពីឆ្នាំមុនបានបញ្ចប់ហើយ។ ដូច្នេះវានឹងបើកផ្លូវដល់កសិករអាចផលិតច្រើនជាងមុន និងរកប្រាក់ចំណូលបានច្រើនជាងមុនផងដែរ » ។
លោកបន្តថា ដោយមានការកើនឡើងនៃការនាំចេញ JSCCIB ព្យាករថា GDP នឹងកើនឡើងពី៣,៥ទៅ៤% ក្នុងឆ្នាំនេះ ។
ការចំណាយរបស់រដ្ឋាភិបាល ក៏ត្រូវបានគិតថា នឹងជួយជំរុញដល់សេដ្ឋកិច្ចផងដែរក្នុងឆ្នាំ២០១៧ ព្រោះតែមានការងារជាច្រើនត្រូវបានបង្កើតដោយគម្រោងហេដ្ឋារចនាសម្ព័ន្ធធំៗ។ JSCCIB ក៏មើលឃើញពីហានិភ័យមួយចំនួនផងដែរ ដោយភាគច្រើនមកពីក្រៅប្រទេស ដែលនឹងប៉ះពាល់ដល់តម្រូវការនិងការនាំចេញ ព្រមទាំងបង្កផលប៉ះពាល់ដល់សេដ្ឋកិច្ចជាតិ ។
លោក Isara បន្តថា រដ្ឋាភិបាលគួរតាមដានរាល់កត្តាក្រៅប្រទេសទាំងអស់ឲ្យបានដិតដល់ និងត្រៀមខ្លួនសម្រាប់ផ្តល់ជំនួយភ្លាមៗដល់វិស័យអាជីវកម្ម ប្រសិនបើក្រុមហ៊ុនទាំងនោះត្រូវបានប៉ះពាល់ ។
លោកបន្ថែមថា ផ្នែកអាជីវកម្មសង្ឃឹមថា រដ្ឋាភិបាលនឹងបន្តគម្រោងរបស់ខ្លួនដើម្បីទាក់ទាញវិនិយោគិនពីបរទេស និងជំរុញដល់សេដ្ឋកិច្ចក្នុងរយៈពេលវែងខាងមុខ ៕
ចែករំលែកព័តមាននេះ