បើតាមការអង្គេតឃើញថា កុមារតូចៗជាច្រើនដែលត្រូវបានម្តាយនាំទៅព្យាបាលទាំងនៅតាមមន្ទីរពេទ្យឯកជននិងរដ្ឋ ច្រើនតែកើតមានជំងឺរលាកទងសួត បើទោះបីជាបានចាក់ថ្នាំបង្ការជំងឺរលាកទងសួតហើយក៏ដោយ។
បើតាមក្រុមគ្រូពេទ្យមួយចំនួនបាននិយាយថា ជាការពិតការចាក់ថ្នាំបង្ការជំងឺរលាកទងសួត មិនអាចទប់ស្កាត់មិនឲ្យកើតមានជំងឺប្រភេទនេះបានទេ តែថ្នាំនេះវាមានសារប្រយោជន៍ក្នុងការទប់ស្កាត់ជំងឺរលាកទងសួតមិនឲ្យវិវត្តន៍ទៅរកសភាពធ្ងន់ធ្ងរ គឺការពារការស្លាប់ដោយសារតែជំងឺរលាកទងសួត ។
កោះសន្តិភាពមិនអាចសុំការបភ្លឺពីក្រុមគ្រូពេទ្យទទួលបន្ទុកផ្នែកវ៉ាក់សាំងជំងឺនេះបានទេ ដោយបានលើកឡើងថាទាល់តែទទួលបានការអនុញ្ញាតពីថ្នាក់លើ ទើបហ៊ានទម្លាយបាន ។ បើតាមការអះអាងពីអ្នកឯកទេស ជំងឺរលាកទងសួតច្រើនតែកើតមាននៅលើកុមារដែលមានអាយុក្រោម១ឆ្នាំ ។
ជំងឺរលាកទងសួតកុមារគឺជាជំងឺដែលបណ្តាលមកពីវីរុស ហើយវាបានឆ្លងពីមនុស្សម្នាក់ទៅមនុស្សម្នាក់ទៀតតាមរយៈផ្លូវដង្ហើម ជាពិសេសតាមរយៈការប៉ះពាល់ ការលេងជាមួយក្មេងដែលមានជំងឺរលាកទងសួត ឬការប៉ះពាល់ប្រដាប់ប្រដាដែលប្រឡាក់ទឹកមាត់ សំបោររបស់អ្នកជំងឺជាដើម ។ ជាទូទៅរោគសញ្ញាដំបូងនៃជំងឺនេះមានដូចជា ៖
-កុមារអាចមានអាការៈផ្ដាសាយធម្មតា ហើយអាចហៀរសំបោរ ក្អក និងក្ដៅខ្លួន
-បន្ទាប់ពីមានជំងឺផ្តាសាយ បានមួយថ្ងៃឬពីរថ្ងៃ កុមារអាចមានអាការៈក្អកកាន់តែខ្លាំង ដង្ហើមឮសូរញាប់ ព្រមទាំងមានផតនៅចន្លោះទ្រូង និងបរិវេណក្បាលពោះ ។
ជួនកាលកុមារមានការពិបាកក្នុងការដកដង្ហើម និងមិនអាចបៅបានគ្រប់គ្រាន់ ឬគេងមិនបានស្កប់នោះទេ
-ដង្ហើមឮសូរខ្លាំងនិងពិបាកដកដង្ហើម ជាទូទៅមានរយៈពេលពីរឬបីថ្ងៃ។
លោកអ្នកត្រូវចាំថា ក្នុងករណីដែលកុមារមានអាការៈមួយចំនួនដូចជា ៖
-មិនអាចបៅបានគ្រប់គ្រាន់ ដោយពិបាកបៅ មិនព្រមបៅ
-នោមតិចជាងធម្មតា
-កាន់តែពិបាកដកដង្ហើម
-មានសភាពល្ហិតល្ហៃ
-រញ៉ាំរញ៉ូវ, មិនព្រមគេង,
-បបូរមាត់ឡើងស្វាយ ត្រូវប្រញាប់នាំកុមារទៅជួបគ្រូពេទ្យឱ្យបានទាន់ពេលវេលា ព្រោះអាចមានគ្រោះថ្នាក់ធ្ងន់ធ្ងរដល់កូនរបស់លោកអ្នក ៕
ចែករំលែកព័តមាននេះ