ប្រទេសមីយ៉ាន់ម៉ា ៖ កិច្ចព្រមព្រៀងនេះទាក់ទងនឹងរដ្ឋាភិបាលឥណ្ឌាស្នើទិញសណ្តែកខៀវ និងបៃតងចំនួន៩០ម៉ឺនតោនពីមីយ៉ាន់ម៉ា ។
ជំនួយការលេខាធិការនៃក្រសួងពាណិជ្ជកម្ម លោក Khin Maung Lwin បានប្រាប់កាសែត The Myanmar Times កាលពីពេលថ្មីៗថា ៖ « យើងបានជូនដំណឹងដល់ពួកគេពីជំហររបស់យើង ប៉ុន្តែពួកគេមិនទាន់បានឆ្លើយតបចំពោះការចុះហត្ថលេខាលើកិច្ចព្រមព្រៀងរវាងរដ្ឋាភិបាលនៃប្រទេសទាំងពីរទេ ។ យើងមិនអាចធ្វើអ្វីបានទេ រហូតដល់មានការឆ្លើយតបពីពួកគេសិន » ។
ប្រទេសឥណ្ឌា គឺជាអតិថិជនទិញសណ្តែក និងគ្រាប់ធញ្ញជាតិដ៏សំខាន់របស់មីយ៉ាន់ម៉ា។ ពួកគេទិញភាគច្រើនពីពាណិជ្ជករសណ្តែកឯកជន ។ កាលពីឆ្នាំមុន ប្រទេសនេះបានទាក់ទងរដ្ឋាភិបាលមីយ៉ាន់ម៉ាសម្រាប់កិច្ចព្រមព្រៀងទិញសណ្តែកនៅឆ្នាំ២០១៧ ។
លោក Khin Maung Lwin ឱ្យដឹងថា ឥណ្ឌាចង់ទិញសណ្តែកខៀវតម្លៃ៧០០ដុល្លារក្នុង១តោន គឺជាតម្លៃទាបបំផុតមិនធ្លាប់មាន។ ក្រសួងពាណិជ្ជកម្មឆ្លើយតបថា មីយ៉ាន់ម៉ាអាចលក់សណ្តែកខៀវបានដូចនឹងតម្លៃទីផ្សារប៉ុណ្ណោះ។ លិខិតរបស់ក្រសួងពាណិជ្ជកម្មបានកំណត់លក្ខខណ្ឌនៃកិច្ចព្រមព្រៀងនេះ ដែលរួមមានទាំងភាពខុសគ្នានៃសណ្តែក និងបញ្ហាពាក់ព័ន្ធ ។ លោកថ្លែងថា ៖ « យើងបានជូនដំណឹងទៅកាន់ប្រទេសឥណ្ឌាថា មីយ៉ាន់ម៉ាចង់លក់សណ្តែកក្នុងតម្លៃទីផ្សារ » ។
ឥណ្ឌាចង់បានលិខិតនៃប្រព័ន្ធឥណទានកំណត់ការទូទាត់ បន្ទាប់ពីការដឹកសណ្តែកដល់ឥណ្ឌា ប៉ុន្តែភាគីមីយ៉ាន់ម៉ាចង់ឲ្យមានការបង់ប្រាក់មុន តាមរយៈការផ្ទេរប្រាក់តាមធនាគារ ។
លោក Soe Win Maung ទីប្រឹក្សានៃសមាគមនេះឱ្យដឹងថា ៖ « យើងបានចរចាជាមួយរដ្ឋាភិបាលឥណ្ឌាសម្រាប់ការទិញ ប៉ុន្តែយើងនៅមានរឿងជាច្រើនដើម្បីដោះស្រាយ ជាពិសេសតម្លៃ ខណៈឈ្មួញជាច្រើនចង់លក់ក្នុងតម្លៃបច្ចុប្បន្ន » ។
មីយ៉ាន់ម៉ាបាននាំចេញសណ្តែក និងគ្រាប់ធញ្ញជាតិទៅកាន់ប្រទេសជាង៥០ដូចជា ប៉ាគីស្ថាន អារ៉ាប់រួម ម៉ាឡេស៊ី និងវៀតណាម។ កាលពីឆ្នាំ២០១៦ ប្រទេសនេះបាននាំចេញសណ្តែកជិត៩៦ម៉ឺនតោន បើធៀបនឹងឆ្នាំមុនត្រឹមតែ៨៦ម៉ឺនតោន ។ នេះបើតាមក្រសួងពាណិជ្ជកម្ម ៕
ចែករំលែកព័តមាននេះ