ប្រទេសកូរ៉េខាងត្បូង ៖ ក្រុមហ៊ុនផលិតនាវារបស់កូរ៉េបានធ្លាក់ចំណាត់ថ្នាក់មកក្រោមដៃគូប្រកួតប្រជែងជប៉ុន ជាលើកដំបូងក្នុងរយៈពេល១៧ឆ្នាំកន្លងមក ។
យោងតាមទិន្នន័យពី Clarkson Research
ប្រទេសកូរ៉េខាងត្បូង ៖ ក្រុមហ៊ុនផលិតនាវារបស់កូរ៉េបានធ្លាក់ចំណាត់ថ្នាក់មកក្រោមដៃគូប្រកួតប្រជែងជប៉ុន ជាលើកដំបូងក្នុងរយៈពេល១៧ឆ្នាំកន្លងមក ។
យោងតាមទិន្នន័យពី Clarkson Research កាលពីថ្ងៃពុធកន្លងមកឲ្យដឹងថា ចំនួននាវារបស់កូរ៉េដែលបានលក់ចេញសរុបមានតែ១៩,៩១លានCGTប៉ុណ្ណោះក្នុងខែធ្នូ និងតិចជាងជប៉ុន ដែលសរុបមានដល់២០,៦៤លាន CGT ។
គួរបញ្ជាក់ថា កាលពីឆ្នាំ២០១៥ វិស័យផលិតនាវារបស់កូរ៉េបានលក់ចេញដល់ទៅ៣១,០៨លានCGTឯណោះ ខណៈជប៉ុនលក់បាន២៥,៥៥លានCGT ។ នេះជាលើកទីមួយហើយក្នុងរយៈពេល១៧ឆ្នាំមកនេះសម្រាប់ក្រុមហ៊ុនផលិតនាវាក្នុងស្រុករបស់កូរ៉េ ដែលផលិតនាវាតិចជាងដៃគូប្រកួតប្រជែងរបស់ខ្លួន ។
តាំងពីឆ្នាំ១៩៩៩មក ក្រុមហ៊ុនផលិតនាវាកូរ៉េបានទទួលការផលិតនាវាច្រើនជាងក្រុមហ៊ុនជប៉ុន ប៉ុន្តែក្នុងឆ្នាំ២០១៦ ក្រុមហ៊ុនក្នុងស្រុកបែរជាជួបប្រទះភាពលំបាកទៅវិញ ដោយចំនួននាវាដែលត្រូវផលិតរបស់ខ្លួនបានធ្លាក់ចុះលឿនជាងខាងជប៉ុន ។
មន្ត្រីម្នាក់ក្នុងក្រុមហ៊ុនផលិតនាវាមួយ ក្នុងចំណោមក្រុមហ៊ុនផលិតនាវាធំៗទាំងបីរបស់កូរ៉េ និយាយថា៖ « ហេតុការណ៍មិនគួរឲ្យជឿនេះកំពុងតែបង្ហាញថា ស្ថានការណ៍សម្រាប់ក្រុមហ៊ុនផលិតនាវាកូរ៉េ គឺកាន់តែអាក្រក់ឡើងហើយ។ ក្នុងរយៈពេល២០ឆ្នាំកន្លងមក កូរ៉េបាននាំមុខលើវិស័យផលិតនាវា ប៉ុន្តែបច្ចុប្បន្ន ប្រទេសនេះបែរជានៅក្រោមប្រទេសចិន និងជប៉ុនវិញ។ ក្រុមហ៊ុនផលិតនាវាក្នុងស្រុកត្រូវតែខិតខំប្រឹងប្រែងទ្វេដងដើម្បីទាក់ទាញការកុម្មង់ថ្មីៗក្នុងឆ្នាំ២០១៧នេះ » ។
ដោយទទួលការប៉ះពាល់ពីការធ្លាក់ចុះនៃការលក់ ក្រុមហ៊ុនផលិតនាវាក្នុងស្រុកបានបញ្ឈប់ការងាររបស់បុគ្គលិករាប់ពាន់នាក់ក្នុងរយៈពេល២ឆ្នាំមកនេះ ។ ក្នុងឆ្នាំ២០១៦ ក្រុមហ៊ុន Hyundai Heavy Industries បានកាត់បន្ថយបុគ្គលិករបស់ខ្លួនមកត្រឹម១.៧០០នាក់ប៉ុណ្ណោះ ខណៈ Samsung Heavy Industries បន្ថយមកត្រឹម១.៥០០នាក់ និង Daewoo Shipbuilding & Marine Engineering បន្ថយត្រឹម១.៣០០នាក់ ។
បុគ្គលិករាប់ពាន់នាក់ទៀត ក៏ត្រូវបានគេគិតថា នឹងបញ្ឈប់ពីការងារក្នុងឆ្នាំនេះផងដែរ ប្រសិនបើស្ថានការណ៍មិនល្អឡើងវិញសម្រាប់វិស័យនេះ ។
យោងតាមក្រសួងពាណិជ្ជកម្ម ឧស្សាហកម្ម និងថាមពលកូរ៉េឲ្យដឹងទៀតថា បុគ្គលិកមួយចំនួនដែលមានជំនាញផ្នែកច្នៃម៉ូដនាវា វិស្វកម្ម និងអាជីវកម្មជាដើម ត្រូវបានទាក់ទាញដោយក្រុមហ៊ុនផលិតនាវាជប៉ុន និងចិនទៀតផង ។
ដោយមានភាពព្រួយបារម្ភពីការចាកចេញទៅកាន់បរទេសរបស់អ្នកមានជំនាញផ្នែកផលិតនាវា ក្រសួងខាងលើបានតាមដានមនុស្សទាំងនោះតាំងពីខែវិច្ឆិកាមុនមកម្ល៉េះ ដើម្បីដឹងថា ពួកគេនៅទីណា ។
មន្ត្រីខាងលើនិយាយថា ៖ « ខ្ញុំឮថា បុគ្គលិកដែលត្រូវបានបញ្ឈប់មួយចំនួនរកបានការងារធ្វើក្នុងប្រទេសចិន និងជប៉ុន ។ ប៉ុន្តែខ្ញុំមិនព្រួយបារម្ភពីរឿងនេះពេកទេ ។ ក្រុមហ៊ុនផលិតនាវាចិន និងជប៉ុន ដែលបានជួបប្រទះភាពអន់ថយអស់រយៈពេលយ៉ាងយូរនេះ ក៏កំពុងបញ្ឈប់ការងារបុគ្គលិករបស់ខ្លួនរាប់ពាន់នាក់ផងដែរ ។ ពួកគេមិនអាចផ្តល់ការងារច្រើនពេកដល់វិស្វករ និងបុគ្គលិកមានជំនាញមកពីកូរ៉េនោះទេ » ៕
ចែករំលែកព័តមាននេះ