ខេត្តពោធិ៍សាត់ ៖ បុរសម្នាក់បានជិះម៉ូតូឌុបព្រះសង្ឃ២ អង្គហើយបានជ្រុលចង្កូតទៅបុកគោយន្តបណ្ដាលឲ្យសុគតមួយអង្គរបួសស្រាលមួយអង្គ អ្នកបើកម៉ូតូរបួសធ្ងន់ រីឯភាគីខាងគោយន្ដដែលត្រូវជាឪពុក និងកូនរបួសស្រាល។ គ្រោះថ្នាក់ចរាចរណ៍នេះបានកើតឡើងនៅលើផ្លូវគ្រួសក្រហមមួយខ្សែស្ថិតក្នុងភូមិកំរ៉ែង ឃុំស្វាយស ស្រុកក្រគរ ខេត្តពោធិ៍សាត់ កាលពីថ្ងៃទី០៧ ខែមករា ឆ្នាំ២០១៧វេលាម៉ោង៦និង៣០នាទីល្ងាច។
សមត្ថកិច្ចនៅទីនោះឲ្យដឹងថា គ្រោះថ្នាក់នេះបង្កឡើងដោយម៉ូតូហុងដាសេ១២៥ពណ៌ខ្មៅ ពាក់ស្លាកលេខ ពោធិ៍សាត់1C-7334 បើកបរដោយឈ្មោះ ហៃ ហ៊ុនភេទប្រុស អាយុ៣៣ឆ្នាំ រស់នៅភូមិឃុំកើតហេតុខាងលើ បានឌុបព្រះសង្ឃ០២អង្គ ទៅបុកគោយន្ដកន្ដ្រៃដឹកបង្គោលរបង០២នាក់ឪពុក និងកូន។ នៅថ្ងៃនោះគោយន្ដធ្វើដំណើរពីលិចទៅកើត ទៅដល់ចំណុចកើតហេតុបានបែកកង់ក៏ឈប់លើផ្លូវ ដើម្បីរកវិធីសាស្ត្រប៉ះឬក៏ដូរកង់។
ទើបតែចុះពីលើគោយន្ដមិនទាន់បានធ្វើអ្វីផងនោះ ស្រាប់តែមានម៉ូតូមួយគ្រឿងបើកមកបុកពីក្រោយយ៉ាងពេញទំហ៊ឹងបណ្ដាលឲ្យព្រះសង្ឃមួយអង្គជង់នឹងបង្គោលរបងចំដើមទ្រូងសុគតភ្លាមៗនៅនឹងកន្លែងកើតហេតុ។ ព្រះសង្ឃដែលសុគតនោះព្រះនាម គា ភក្ដី ព្រះជន្ម១៧ព្រះវស្សា គង់នៅវត្តទួលអណ្ដែត ឃុំស្វាយស មួយអង្គទៀតរបួសស្រាលព្រះនាម ឈឿន ហើម ព្រះជន្ម១៥ព្រះវស្សា គង់នៅវត្តកោះអណ្ដែត ឃុំស្វាយស និងអ្នកបើកម៉ូតូឈ្មោះ ហៃ ហ៊ុន ភេទប្រុស អាយុ៣៣ឆ្នាំ រស់នៅភូមិកំរ៉ែង ឃុំស្វាយសរបួសធ្ងន់។
ចំណែកភាគីខាងគោយន្ត ឪពុកឈ្មោះ កែ ណាម អាយុ៤៤ឆ្នាំ និងកូនប្រុសឈ្មោះ គុន ណាក់ អាយុ២៨ឆ្នាំ រស់នៅភូមិត្រពាំងព្រីង ឃុំស្វាយជុប ស្រុកសាមគ្គីមានជ័យ ខេត្តកំពង់ឆ្នាំង របួសស្រាលទាំង០២នាក់។ សមត្ថកិច្ចឲ្យដឹងថា គ្រោះថ្នាក់ចរាចរណ៍នេះបណ្ដាលមកពីអ្នកបើកម៉ូតូប្រើល្បឿនលឿន ហើយគោយន្ដដឹកបង្គោលនោះក៏នៅចំកណ្ដាលផ្លូវទៀតគួបផ្សំនឹងព្រលប់ៗផងមើលមិនសូវឃើញក៏ជួបគ្រោះថ្នាក់បែបនេះទៅ។
ព្រះសពត្រូវបានយកទៅធ្វើបុណ្យនៅវត្ត ហើយជនរងគ្រោះដែលរបួសធ្ងន់បញ្ជូនទៅសង្គ្រោះនៅមន្ទីរពេទ្យបង្អែកខេត្ត។ ចំណែកម៉ូតូ និងគោយន្ដបង្កគ្រោះថ្នាក់នោះសមត្ថកិច្ចបានយកទៅដោះស្រាយនៅប៉ុស្តិ៍រដ្ឋបាលតាមច្បាប់ចរាចរណ៍ផ្លូវគោក៕
ចែករំលែកព័តមាននេះ