ចាប់ខ្លួនស្ត្រីជាមេឆ្នោតកន្ទុយលេខនៅស្រុកកែវសីមា ក្រោយរកឃើញភស្តុតាង
- មណ្ឌលគិរី
ស្ត្រីមេឆ្នោតកន្ទុយលេខនៅស្រុកកែវសីមាម្នាក់ ត្រូវបានសមត្ថកិច្ចបញ្ជូនទៅសាលាដំបូងខេត្តមណ្ឌលគិរី
ស្ត្រីមេឆ្នោតកន្ទុយលេខនៅស្រុកកែវសីមាម្នាក់ ត្រូវបានសមត្ថកិច្ចបញ្ជូនទៅសាលាដំបូងខេត្តមណ្ឌលគិរី
ខេត្តមណ្ឌលគិរី ៖ បើតាមសេចក្តីរាយការណ៍បានឱ្យដឹងថា ស្ត្រីមេឆ្នោតកន្ទុយលេខនៅស្រុកកែវសីមាម្នាក់ ត្រូវបានសមត្ថកិច្ចបញ្ជូនទៅសាលាដំបូងខេត្តមណ្ឌលគិរី នារសៀលថ្ងៃទី០៣ ខែសីហា ឆ្នាំ២០២២នេះ ។
សេចក្តីរាយការណ៍បន្តថា មេកន្ទុយលេខរូបនោះមានឈ្មោះ ជា រដ្ឋា អាយុ៣៤ឆ្នាំ រស់នៅភូមិឡាប៉ាខេ ឃុំស្រែខ្ទុម ស្រុកកែវសីមា ត្រូវបានកម្លាំងជំនាញឃាត់ខ្លួនតាមបញ្ជារបស់លោក អ៊ាង សុគន្ធ ព្រះរាជអាជ្ញារងអមសាលាដំបូងខេត្តមណ្ឌលគិរី នាល្ងាចថ្ងៃទី២ ខែសីហា ដើម្បីបញ្ជូនទៅកាន់ស្នងការដ្ឋាននគរបាលខេត្តមណ្ឌលគិរី ក្រោយពេលរកឃើញភស្តុតាងដូចជា សៀវភៅកត់កន្ទុយលេខនៅផ្ទះចំនួន២ក្បាល និងទូរស័ព្ទដៃ១គ្រឿងជាមធ្យោបាយផ្ញើលេខដើម្បីស៊ីសង។
ក្នុងប្រតិបត្តិការបង្ក្រាបល្បែ.ងស៊ីសងខាងលើនេះ សមត្ថកិច្ចក៏បានឃាត់ខ្លួនបុគ្គលិកក្រុមហ៊ុនល្បែ.ងឆ្នោតកោសចំនួន៤នាក់ផ្សេងទៀតផងដែរ ប៉ុន្តែក្រោយពិនិត្យ គឺជាក្រុមហ៊ុនស្របច្បាប់ សមត្ថកិច្ចក៏អនុញ្ញាតឲ្យត្រឡប់ទៅផ្ទះវិញ។
ក្រោយពេលចាប់ខ្លួនជនសង្ស័យឈ្មោះ ជា រដ្ឋា បានសារភាពថា ខ្លួនបានលក់ឆ្នោតរយៈពេល៣ឆ្នាំមកហើយ ពេលខ្លួនកត់កន្ទុយលេខ គឺបាញ់ឲ្យឈ្មោះ ស៊យ ថារិទ្ធ និងមានកូនកញ្ច្រែងចំនួន២នាក់ទៀត។ ក្នុងរយៈពេលនេះ ខ្លួននិងកូនកញ្ច្រែងកត់កន្ទុយលេខ បាញ់ឲ្យមេឈ្មោះ P3 ដោយឆ្នោតទាំងអស់ គឺកត់ផ្ទាល់ដៃ មានប៉ុស្តិ៍រង់ចាំផ្ទៀងលទ្ធផល A B C D ជាឆ្នោតវៀតណាម ចំណែកប្រាក់ដែលកត់បានក្នុង១ថ្ងៃ គឺបានពី៨០ទៅ៩០ម៉ឺនរៀល។
សមត្ថកិច្ចនៃនគរបាលព្រហ្មទណ្ឌកម្រិតស្រាលបញ្ជាក់ថា យោងតាមការបំភ្លឺពីសាក្សី និងភស្តុតាង រួមទាំងចម្លើយសារភាពរបស់ជនសង្ស័យ សមត្ថកិច្ចអាចសន្និដ្ឋានបានថា ឈ្មោះ ជា រដ្ឋា ពិតជាបានបើកលក់ឆ្នោត ឬកន្ទុយលេខពិតប្រាកដមែន៕
ចែករំលែកព័តមាននេះ