ភ្នំពេញ៖ ក្នុងពេលរដ្ឋមន្ត្រីការបរទេសមហាអំណាចកំពូលៗលើលោក បានមកដល់កម្ពុជា ដើម្បីចូលរួមកិច្ចប្រជុំ ក្នុងពេលកម្ពុជា ធ្វើជាប្រធានអាស៊ាន នាយប់ថ្ងៃទី៣ ខែសីហានេះ លោកឧត្តមសេនីយ៍ឯក ហ៊ុន ម៉ាណែត កូនប្រុសច្បងសម្តេចតេជោ ហ៊ុន សែន និងជាបេក្ខជននាយករដ្ឋមន្ត្រីបន្តវេន បានចេញសារសំឡេងតាមហ្វេសប៊ុកផ្លូវការរបស់លោក ដោយសំដែងការហួសចិត្តនឹងលោកសមរង្ស៊ី ដែលលោកថា ជាមនុស្សចាស់ម្នាក់ ដែលតាំងខ្លួនជាបញ្ញវ័ន្ត និងជាអ្នកនយោបាយចាស់វស្សាម្នាក់។
លោក ហ៊ុន ម៉ាណែត ដែលទើបជួបរដ្ឋមន្ត្រីការបរទេសចិន លោក វ៉ាង យី កាលពីរសៀលថ្ងៃទី៣សីហានេះ បានលើកឡើងថា «វាជាការហួសចិត្តមួយ ដែលមនុស្សចាស់ម្នាក់ គឺលោក សម រង្សី ដែលតាំងខ្លួនជាបញ្ញវ័ន្ត និងជាអ្នកនយោបាយចាស់វស្សា បានធ្វើការវាយប្រហារ មាក់ងាយរូបខ្ញុំ ដែលជាក្មេងជំនាន់ក្រោយ ដោយគ្មានការទទួលខុសត្រូវ មួយលើក ជាពីរលើករួចមកហើយ អំពីរឿងសញ្ញាបត្ររបស់ខ្ញុំ។ ខ្ញុំបានបបួលគាត់ភ្នាល់ប៉ុន្តែគាត់មិនហ៊ានភ្នាល់។ ខ្ញុំស្មានថា ការវាយប្រហាររបស់គាត់ មកលើក្មេងម្នាក់ដូចជា រូបខ្ញុំពីរដង បានល្មមហើយ ប៉ុន្តែខ្ញុំនឹកស្មានមិនដល់សោះ ដោយប៉ុន្មានម៉ោងមុននេះ គាត់បានចេញមក វាយប្រហារខ្ញុំរឿងដដែលទៀត ដោយគ្មានការខ្មាស់អៀន គ្មានគុណធម៌ និងគ្មានភាពជាចាស់ទុំ ឬជាបញ្ញវ័ន្តម្នាក់ ដែលទទួលបានការបណ្តុះបណ្តាលកម្រឹតខ្ពស់ រួមទាំងការបណ្តុះបណ្តាលនៅក្រៅប្រទេសផង»។
លោក ហ៊ុន ម៉ាណែត បន្ថែមថា «ជាធម្មតា អ្នករៀនសូត្រ គេមិនដែលមើលងាយអ្នករៀនសូត្រដទៃទេ វាខុសតែគាត់ម្នាក់នេះ ដែលនិយាយគ្មានការទទួលខុសត្រូវ។ ហ៊ានថាអោយគេ តែមិនហ៊ានទទួលខុសត្រូវចំពោះសម្តីរបស់ខ្លួន។ ឬមួយក៏លោក សម រង្ស៊ី អស់អ្វីនិយាយហើយ បានជាខំបង្កើតរឿង ដើម្បីចាប់យកការទាក់ទាញ កុំអោយគេភ្លេច។ ឬមួយក៏លោក ខំប្រឹងវាយប្រហារខ្ញុំ ដើម្បីអោយខ្ញុំផ្តល់តម្លៃអោយលោក តាមរយៈការឆ្លើយតប? ពីមុនវាយប្រហារឪពុកខ្ញុំ រហូតដល់ឪពុកខ្ញុំ គាត់ខ្ជិលនឹងឆ្លើយតប ព្រោះគ្មានតម្លៃអ្វីដែលគាត់ត្រូវឆ្លើយតប។ ប្រហែលជាអញ្ចឹងហើយ បានជាឥឡូវ លោកបែរជាមកវាយដល់ក្មេងជំនាន់ក្រោយទៀត ដោយសង្ឃឹមថា ក្មេងនឹងផ្តល់តម្លៃឆ្លើយតបជាមួយលោក។ ហេតុដូច្នេះ ខ្ញុំសុំអនុញ្ញាតបន្តិច ដើម្បីបកស្រាយអំពីមូលហេតុអ្វី ដែលខ្ញុំបបួលលោក សម រង្ស៊ី ភ្នាល់នោះ?»៕ សុខ សារ៉ាយ
ចែករំលែកព័តមាននេះ