យោងតាមក្រុមហ៊ុនធានារ៉ាប់រងរបស់អាល្លឺម៉ង់ Munich RE ឲ្យដឹងថា គ្រោះធម្មជាតិដែលកើតឡើងនៅជប៉ុន ទឹកជំនន់លង់លិចនៅចិន និងខ្យល់ព្យុះនៅហៃទី បានធ្វើឲ្យមានការខូចខាតសរុបអស់ទឹកប្រាក់
យោងតាមក្រុមហ៊ុនធានារ៉ាប់រងរបស់អាល្លឺម៉ង់ Munich RE ឲ្យដឹងថា គ្រោះធម្មជាតិដែលកើតឡើងនៅជប៉ុន ទឹកជំនន់លង់លិចនៅចិន និងខ្យល់ព្យុះនៅហៃទី បានធ្វើឲ្យមានការខូចខាតសរុបអស់ទឹកប្រាក់១៧៥ពាន់លានដុល្លារអាមេរិកក្នុងឆ្នាំ២០១៦ ។
ការខូចខាតនៅឆ្នាំ២០១៦ដោយគ្រោះធម្មជាតិ គឺមានលក្ខណៈធ្ងន់ធ្ងរជាង៤ឆ្នាំកន្លងមក។ តាម Munich RE ឲ្យដឹងថា មានត្រឹមតែ៣០%នៃការខូចខាតប៉ុណ្ណោះ (៥០ពាន់លានដុល្លារ) ដែលត្រូវបានបង់ដោយប្រាក់ធានារ៉ាប់រង ។
ការខូចខាតខ្លាំងជាងគេ គឺនៅអាស៊ី ។ គ្រោះរញ្ជួយដីនៅជប៉ុនទាំងពីរលើកធ្វើឲ្យអស់ទឹកប្រាក់៣១ពាន់លានដុល្លារ ខណៈគ្រោះទឹកជំនន់នៅចិនបង្កឲ្យខូចខាតសរុបជាទឹកប្រាក់អស់២០ពាន់លានដុល្លារ ។
ចំពោះអាមេរិកខាងជើងវិញ ការខូចខាតអស់ថ្លៃជាងគេ គឺដោយសារតែខ្យល់ព្យុះ Matthew ដែលបានសម្លាប់ជីវិតមនុស្សនៅហៃទី អស់រាប់រយនាក់ ហើយធ្វើឲ្យខាតប្រាក់អស់១០ពាន់លានដុល្លារ ។
អាមេរិកខាងជើងតែម្នាក់ឯង ត្រូវទទួលរងគ្រោះធម្មជាតិដល់ទៅ១៦០ករណីឯណោះក្នុងឆ្នាំ២០១៦ ដែលច្រើនខ្លាំងជាងឆ្នាំដទៃទៀតតាំងពីឆ្នាំ១៩៨០មក ។
លោក Peter Hoppe ប្រធានផ្នែកស្រាវជ្រាវហានិភ័យភូមិសាស្ត្ររបស់ Munich RE មានប្រសាសន៍ថា ៖ « គ្រោះធម្មជាតិកើតឡើងនៅឆ្នាំ២០១៦ បានបង្ហាញពីឥទ្ធិពលនៃការផ្លាស់ប្តូរអាកាសធាតុដែលមិនបានត្រួតពិនិត្យជាមុន » ។
ប៉ុន្តែភ្នាក់ងារធានារ៉ាប់រងខាងលើបាននិយាយទៀតថា ចំនួនមនុស្សស្លាប់ដោយសារគ្រោះធម្មជាតិនៅឆ្នាំ២០១៦ មានត្រឹមតែ ៨.៧០០នាក់ប៉ុណ្ណោះ ដែលតិចជាងកាលពីឆ្នាំ២០១៥ (២៥.៤០០នាក់) ៕
ចែករំលែកព័តមាននេះ