ម្នាក់ៗផ្ទុះកំហឹង ក្រោយពីឃើញហេតុការណ៍បែបនេះ
រាជធានីភ្នំពេញ ៖ ប្រជាពលរដ្ឋដែលឃើញហេតុការណ៍បាននាំគ្នាផ្ទុះកំហឹងគ្រប់គ្នា ដោយយកដុំថ្មគប់បំបែកកញ្ចក់រថយន្តខ្ទេចអស់ និងផ្លោងដុំថ្មចូលក្នុងរថយន្ត …
រាជធានីភ្នំពេញ ៖ ប្រជាពលរដ្ឋដែលឃើញហេតុការណ៍បាននាំគ្នាផ្ទុះកំហឹងគ្រប់គ្នា ដោយយកដុំថ្មគប់បំបែកកញ្ចក់រថយន្តខ្ទេចអស់ និងផ្លោងដុំថ្មចូលក្នុងរថយន្ត បន្ទាប់ពីរថយន្តនោះបានបុក និងអូសម៉ូតូជាប់ពីក្រោមជិត២គីឡូម៉ែត្ររហូតដល់ជិតស្ពានអាកាសក្បាលថ្នល់ ។ ហេតុការណ៍នេះ បង្កឲ្យមានការភ្ញាក់ផ្អើលកាលពីវេលាម៉ោង១០ និង៣០នាទីយប់ ថ្ងៃទី៥ ខែមករា ឆ្នាំ២០១៧ ចំណុចផ្លូវលេខ៣៩០កែងផ្លូវលេខ១១៣ ស្ថិតក្នុងសង្កាត់បឹងកេងកង៣ ខណ្ឌចំការមន ។
តាមសម្តីជនរងគ្រោះទាំង៣នាក់បាននិយាយថា មុនពេលកើតហេតុ ពួកគេចេញពីដើរលេងនៅកោះពេជ្រគោលបំណងត្រឡប់ទៅផ្ទះវិញនៅម្តុំផ្សារហេងលី ដោយបានជិះម៉ូតូម៉ាក MSX ពណ៌ខ្មៅ មិនចាំស្លាកលេខ បានធ្វើដំណើរតាមផ្លូវលេខ១១៣ ក្នុងទិសដៅពីត្បូងទៅជើង ខណៈមកដល់ចំណុចកើតហេតុដែលជាផ្លូវបំបែកជាបួន ស្រាប់តែបុរសម្នាក់ ប្រហែលអាយុ៤០ឆ្នាំ បានបើករថយន្តម៉ាក CRV ពណ៌ស ពាក់ស្លាកលេខ ភ្នំពេញ 2X-6958 ធ្វើដំណើរតាមផ្លូវលេខ៣៩០ ក្នុងទិសដៅពីកើតទៅលិច ក្នុងល្បឿនលឿន និងស្រវឹង បានបួងចង្កូតបត់ឆ្វេងឡើងទៅផ្លូវលេខ១១៣ ក៏ជ្រុលទៅបុកម៉ូតូដែលកំពុងជិះគ្នា៣នាក់ចំពីមុខពេញទំហឹង ភ្លាមៗនោះរថយន្តបង្កមិនបានឈប់ដោះស្រាយនៅកន្លែងកើតហេតុនោះទេ បានបន្ថែមល្បឿនបើករត់អូសទាំងម៉ូតូនៅជាប់ក្រោមរថយន្តអូសរហូតដល់ក្នុងស្ថានីយប្រេងឥន្ធនៈសូគីមិច ទើបសមត្ថកិច្ចឃាត់រថយន្ត និងអ្នកបើកបរបាន ។
ប្រភពព័ត៌មានបានឲ្យដឹងទៀតថា ខណៈពេលឃាត់រថយន្តបង្កបានហើយ ប្រជាពលរដ្ឋដែលឃើញហេតុការណ៍បានផ្ទុះកំហឹង ដោយយកដុំថ្មគប់កំទេចរថយន្តបែកកញ្ចក់ខ្ទេចអស់គ្មានសល់ ហើយផ្លោងដុំថ្មចូលក្នុងរថយន្តបណ្ដាលឲ្យម្ចាស់រថយន្តរងរបួសហើមមុខហើមមាត់ជាំភ្នែកខាងឆ្វេង ទើបត្រូវសមត្ថកិច្ចជម្លៀសទៅឃុំខ្លួននៅអធិការដ្ឋាននគរបាលខណ្ឌចំការមនដើម្បីធ្វើការសាកសួរ ។
ក្រោយពេលកើតហេតុ ជនរងគ្រោះបាននាំគ្នាជិះរ៉ឺម៉កម៉ូតូទៅលាងរបួសនៅមន្ទីរពេទ្យ ចំណែកម៉ូតូ និងរថយន្តត្រូវបានសមត្ថកិច្ចស្ទូចយកទៅរក្សាទុកនៅអធិការដ្ឋាននគរបាលខណ្ឌចំការមនដើម្បីធ្វើការដោះស្រាយ ៕
ចែករំលែកព័តមាននេះ