ក្រុមសីដក់ និងឈិនឡូនកម្ពុជា នឹងទៅហាត់នៅ២ប្រទេសផ្សេងគ្នារយៈពេលវែងត្រៀមស៊ីហ្គេម២០២៣
- ភ្នំពេញ
រាជធានីភ្នំពេញ ៖ សហព័ន្ធកីឡាសីដក់ និងឈិនឡូនកម្ពុជា នឹងចេញទៅហ្វឹកហាត់នៅក្រៅប្រទេស
រាជធានីភ្នំពេញ ៖ សហព័ន្ធកីឡាសីដក់ និងឈិនឡូនកម្ពុជា នឹងចេញទៅហ្វឹកហាត់នៅក្រៅប្រទេស
រាជធានីភ្នំពេញ ៖ សហព័ន្ធកីឡាសីដក់ និងឈិនឡូនកម្ពុជា នឹងចេញទៅហ្វឹកហាត់នៅក្រៅប្រទេសនាខែសីហា ឆ្នាំ២០២២ ក្នុងរយៈពេលវែងដើម្បីត្រៀមខ្លួនសម្រាប់ស៊ីហ្គេម ឆ្នាំ២០២៣ ដែលកម្ពុជាធ្វើជាម្ចាស់ផ្ទះ។
ក្រុមសីដក់ និងឈិនឡូនជម្រើសជាតិកម្ពុជាទើបតែបញ្ចប់ភារកិច្ចនៅប្រទេសថៃ ដោយដណ្ដើមបានមេដាយចំនួន៣គ្រឿងគឺប្រាក់២ និងសំរឹទ្ធ១ពីព្រឹត្តិការណ៍ King Cup World Championship ដែលបញ្ចប់នៅថ្ងៃទី៣០ ខែកក្កដា ឆ្នាំ២០២២ ។ យ៉ាងណាក្រោយពេលបញ្ចប់ភារកិច្ចនេះ ក្រុមសីដក់ និងឈិនឡូនកម្ពុជា ត្រូវវិលត្រឡប់មកទឹកដីកំណើតវិញនាថ្ងៃទី១ ខែសីហា ឆ្នាំ២០២២ ដើម្បីត្រៀមខ្លួនចូលរួមប្រកួតកីឡាជាតិ។
ក្រោយពេលបញ្ចប់ការប្រកួតកីឡាជាតិ ក្រុមសីដក់ និងឈិនឡូនកម្ពុជានឹងចេញទៅហាត់នៅប្រទេសថៃ រួចបន្តទៅហ្វឹកហាត់នៅប្រទេសមីយ៉ាន់ម៉ាបន្ថែមទៀត ។ ការហ្វឹកហាត់នេះរហូតជិតដល់ស៊ីហ្គេម២០២៣ទើបត្រឡប់មកវិញ ពីព្រោះដើម្បីឲ្យកីឡាករ-កីឡាការិនីប្រាកដច្បាស់ថា នឹងយកមេដាយជូនជាតិឲ្យបានសម្រាប់ស៊ីហ្គេមឆ្នាំ២០២៣។
លោក ជាតិ ខេមរា គ្រូបង្វឹកក្រុមកីឡាសីដក់ និងឈិនឡូនកម្ពុជា បានប្រាប់ថា ៖«យើងត្រឡប់ទៅវិញសិន ដើម្បីបំពេញឯកសារមកហាត់នៅថៃ ហើយនឹងទៅវិញពេលប្រកួតកីឡាជាតិខែ១១ ។ យើងនឹងបន្តចេញទៅហាត់នៅមីយ៉ាន់ម៉ាទៀត។ សម្រាប់ការហ្វឹកហាត់នេះ យើងនឹងហាត់នៅមីយ៉ាន់
ម៉ារហូតដល់កៀកស៊ីហ្គេម២០២៣ទើបយើងមកខ្មែរវិញ»។
លោកបន្ថែមថា បើមើលសមត្ថភាពកីឡាករ កីឡាការិនីនៅមានចំណុចខ្វះខាតខ្លះៗ។ ពិសេសគឺអារម្មណ៍ក្នុងពេលប្រកួត ដែលទាមទារឲ្យក្រុមការងារដាច់ខាតត្រូវតែពង្រឹង ពីព្រោះកន្លងមកក្រុមការងារសិក្សាមើលទៅពេលប្រកួត កីឡាករ កីឡាការិនីហាក់នៅភ័យខ្លាចនៅឡើយ ។ ដូច្នេះដើម្បីសម្រេចឲ្យបាននូវគោលដៅដែលបានកំណត់(ហោចណាស់មេដាយមាស១ឬ២គ្រឿង) សម្រាប់ស៊ីហ្គេមឆ្នាំ២០២៣ ។ ក្រុមស៊ីដក់បានដាក់ចិត្តកាយក្នុងការហ្វឹកហាត់ ពិសេសនោះគឺសម្លឹងមើលការហ្វឹកហាត់ក្រៅប្រទេសឲ្យបានយូរអង្វែង។ លោកគិតថា បើហាត់នៅប្រទេសខ្លាំងៗខាងផ្នែកវិស័យកីឡានេះ កម្ពុជាពិតជាអាចសម្រេចគោលដៅបានជាក់ជាមិនខាន។
ជុំវិញការទៅហាត់រយៈពេលវែងនេះ លោក ជាតិ ខេមរា បានសង្កត់ធ្ងន់ថា កន្លងមកក្រុមកីឡាករ កីឡាការិនីកម្ពុជាធ្លាប់បានចេញទៅហាត់នៅក្រៅប្រទេសរយៈពេល៣ខែរួចមកហើយ ក្នុងការត្រៀមការប្រកួតព្រឹត្តិការណ៍ផ្សេងៗ ។ ប៉ុន្តែលោកសង្កេតឃើញថា ការហ្វឹកហាត់ត្រឹម៣ខែកីឡាករ កីឡាការិនីនៅមានភាពស្រពេចស្រពិលទើបលើកនេះលោកសម្រេចចេញទៅហាត់រយៈពេលវែង ៕
ចែករំលែកព័តមាននេះ