ប្រទេសចំនួន២ ស្នើសុំធ្វើជាម្ចាស់ផ្ទះរៀបចំការប្រកួតប្រដាល់គុនខ្មែរ ក្រោយម្ចាស់ផ្ទះវៀតណាមទទួលជោគជ័យយ៉ាងត្រចះត្រចង់
- ភ្នំពេញ
រាជធានីភ្នំពេញ ៖ ក្រោយពីទទួលបានជោគជ័យយ៉ាងត្រចះត្រចង់ក្នុងព្រឹត្តិការណ៍ប្រកួតកីឡាប្រដាល់គុនខ្មែរជើងឯកអាស៊ីលើកទី១ នៅប្រទេសវៀតណាម ឆ្នាំ២០២៦ ពេលនេះធ្វើឱ្យប្រទេសចំនួនពីរផ្សេងទៀតដណ្ដើមគ្នាសុំធ្វើជាម្ចាស់ផ្ទះរៀបចំការប្រកួតគុនខ្មែរជាបន្តបន្ទាប់។
តាមការឱ្យដឹងពីលោកខូវ ឆាយ ប្រធានសហព័ន្ធកីឡាប្រដាល់គុនខ្មែរនិងជាអគ្គលេខាធិការគុនខ្មែរអន្តរជាតិបានឱ្យដឹងថា ក្រោយពីបានបញ្ចប់ការប្រកួតគុនខ្មែរជើងឯកអាស៊ីលើកទី១ នៅប្រទេសទេសវៀតណាមរួចមកនោះ ពេលនេះ មានប្រទេសចំនួនពីរផ្សេងទៀត បានត្រៀមខ្លួនរួចរាល់ក្នុងការធ្វើជាម្ចាស់ផ្ទះក្នុងព្រឹត្តិការណ៍ផ្សេងចំនួនពីរដាច់ដោយឡែកពីគ្នា។
តាមការបញ្ជាក់របស់លោកបានឱ្យដឹងថា ប្រទេសឥណ្ឌូនេស៊ីបានស្នើសុំធ្វើជាម្ចាស់ផ្ទះរៀបចំព្រឹត្តិការណ៍ប្រកួតប្រដាល់ជើងឯកអាស៊ីលើកទី២ នៅក្នុងឆ្នាំ២០២៧ ។ ខណៈប្រទេសម៉ាឡេស៊ីឯណោះវិញបានត្រៀមខ្លួនរួចជាស្រេចក្នុងការធ្វើជាម្ចាស់ផ្ទះគុនខ្មែរជើងឯកអាស៊ីអាគ្នេយ៍លើកទី១ឆ្នាំ២០២៧ផងដែរ។
ទន្ទឹមជាមួយគ្នានេះដែរ លោកខូវ ឆាយ ប្រធានប្រធានសហព័ន្ធកីឡាប្រដាល់គុនខ្មែរក៏បានប្រកាសរួចហើយថាកម្ពុជាក៏នឹងត្រៀមខ្លួនរួចរាល់ក្នុងការធ្វើជាម្ចាស់ផ្ទះការប្រកួតគុនខ្មែរពិភពលោកលើកទី៧នៅរាជធានីភ្នំពេញ ដែលនឹងប្រព្រឹត្តិទៅចាប់ពីថ្ងៃទី២៥ ដល់ថ្ងៃទី៣០ ខែវិច្ឆិកា ឆ្នាំ២០២៦ ។ ខណៈប្រទេសវៀតណាមដែលទើបតែទទួលបានជោគជ័យយ៉ាងត្រចះត្រចង់ក្នុងការធ្វើជាម្ចាស់ផ្ទះជើងឯកគុនខ្មែរអាស៊ីលើកទី១នោះ គេមានបំណងធ្វើជាម្ចាស់ផ្ទះជើងឯកគុនខ្មែរពិភពលោកលើកទី៨ ឆ្នាំ២០២៧ ព្រោះសហព័ន្ធគុនខ្មែរនៅប្រទេសវៀតណាមបានដាក់ពាក្យរួចរាល់អស់ហើយ។
លោកខូវ ឆាយ បានបញ្ជាក់ឱ្យដឹងបន្ថែមទៀតថា ក្នុងនាមសហព័ន្ធគុនខ្មែរអន្តរជាតិ ខ្ញុំបានសូមអញ្ជើញយ៉ាងកក់ក្ដៅដល់សហព័ន្ធគុនខ្មែរជាតិទាំងអស់ទាំងប្រតិភូដឹកនាំកីឡាករ កីឡាការិនី គ្រូបង្វឹកនិងមន្ត្រីបច្ចេកទេសមកពីជុំវិញពិភពលោកចូលរួមក្នុងព្រឹត្តិការណ៍ប្រកួតជើងឯកពិភពលោកដ៏សំខាន់នេះនៅរាជធានីភ្នំពេញ ។ ដូច្នេះកម្ពុជាបានត្រៀមខ្លួនរួចជាស្រេចក្នុងការទទួលស្វាគមន៍យ៉ាងកក់ក្ដៅពីមហាគ្រួសារគុនខ្មែរអន្តរជាតិប្រកបដោយមិត្តភាព បដិសណ្ឋារកិច្ច និងសាមគ្គីភាព។
ជាមួយគ្នានេះដែរលោកខូវ ឆាយ បានកោតសរសើរដល់ប្រទេសម៉ាឡេស៊ីដែលផ្ដួចផ្ដើមគំនិតដាក់សំណើសុំធ្វើជាម្ចាស់ផ្ទះព្រឹត្តិការណ៍ប្រកួតគុនខ្មែរជើងឯកអាស៊ីអាគ្នេយ៍លើកទី១ ឆ្នាំ២០២៧ និងប្រទេសឥណ្ឌូនេស៊ីបានដាក់សំណើសុំធ្វើជាម្ចាស់ផ្ទះជើងឯកគុនខ្មែរអាស៊ីលើកទី២ ឆ្នាំ២០២៧។
លោកខួវ ឆាយ បានបញ្ជាក់ឱ្យដឹងបន្ថែមទៀតថា ជុំវិញសំណើទាំងលើនេះបានបង្ហាញឱ្យឃើញយ៉ាងច្បាស់ ជាការប្ដេជ្ញាចិត្តកាន់តែខ្លាំងឡើងរបស់បណ្ដាប្រទេសក្នុងតំបន់ជាសមាជិក ជាពិសេសការរីកចម្រើនយ៉ាងឆាបរហ័សរបស់កីឡាប្រដាល់គុនខ្មែរនៅក្នុងតំបន់អាស៊ីអាគ្នេយ៍ ទ្វីបអាស៊ីនិងសហគមន៍អន្តរជាតិ ។ ដូច្នេះការបិទបញ្ចប់ព្រឹត្តិការណ៍គុនខ្មែរជើងឯកអាស៊ីលើកទី១ មិនមែនទីបញ្ចប់នៃដំណើររបស់យើងនោះទេ ប៉ុន្តែវាជាការចាប់ផ្ដើមទំព័រប្រវត្តិសាស្ត្រថ្មីមួយកាន់តែធំធេងនិងមានមហិច្ឆតាខ្ពស់សម្រាប់កីឡាប្រដាល់គុនខ្មែរ ៕
ចែករំលែកព័តមាននេះ