លោក VLADIMIR PALANCICA សន្យាស្វែងរកការឧបត្ថម្ភពីខាងក្រៅ ជួយដល់កីឡាប្រដាល់សកលឱ្យកាន់តែរីកចម្រើន
- ភ្នំពេញ
រាជធានីភ្នំពេញ ៖ លោក VLADIMIR PALANCICA ដែលទើបតែត្រូវបានប្រកាសតែងតាំងជាអនុប្រធានសហព័ន្ធកីឡាប្រដាល់សកល កាលពីថ្ងៃទី១៦ ខែកញ្ញា ឆ្នាំ២០២៦ បានសន្យានឹងជួយស្វែងរកការជួយឧបត្ថម្ភពីសប្បុរសជននានា ដើម្បីពង្រឹងសមត្ថភាពកីឡាប្រដាល់សកលកម្ពុជាឱ្យកាន់តែមានការរីកចម្រើន។
លោកប៊ុយ សុភ័ណ្ឌ ប្រធានសហព័ន្ធកីឡាប្រដាល់សកលកម្ពុជា បានថ្លែងឱ្យដឹងថារយៈពេលប៉ុន្មានឆ្នាំចុងក្រោយមកនេះ ដោយទទួលបានកិច្ចសហការពីសប្បុរសជន ដែលជាដៃគូឯកជនគឺមានការរីកចម្រើនគួរឱ្យកត់សម្គាល់ ។ ទន្ទឹមជាមួយគ្នានេះដែរសហព័ន្ធមានឱកាសរៀបចំការប្រកួតប្រដាល់សកលអាជីពរយៈពេលមួយឆ្នាំពេញ ធ្វើឱ្យសមត្ថភាពកីឡាករ កីឡាការិនីប្រដាល់សកលជម្រើសជាតិកាន់ទទួលបាននូវសមត្ថភាពបច្ចេកទេសល្អប្រសើរជាងមុនមួយកម្រឹតថែមទៀត។
ជាមួយគ្នានេះដែរ សហព័ន្ធក៏មានទិសដៅអភិវឌ្ឍកីឡាករ កីឡាការិនីប្រដាល់សកលអាជីពកម្ពុជា ឆ្ពោះទៅកម្រិតអាជីពអន្តរជាតិនាថ្ងៃអនាគត ។ បន្ថែមពីលើនេះទៀត សហព័ន្ធកីឡាប្រដាល់សកលកម្ពុជាបានធ្វើកំណែទម្រង់របស់ខ្លួនក្នុងការពង្រឹងការរៀបចំការប្រកួតឱ្យស្របទៅតាមបទបញ្ជាបច្ចេកទេសអន្តរជាតិ រហូតបានធ្វើឱ្យកម្មវិធីប្រកួតនេះមានការទទួលស្គាល់ជាផ្លូវការពីស្ថាប័ន BOXREC ដែលជាស្ថាប័នកត់ត្រា និងចាត់ថ្នាក់កីឡាករប្រដាល់អាជីពដ៏ធំបំផុតនៅលើពិភពលោក។
លោកប៊ុយ សុភ័ណ្ឌ បានបន្តឱ្យដឹងទៀតថា ការតែងតាំងលោក Vladimir Palancica ជាអនុប្រធានសហព័ន្ធប្រដាល់សកលកម្ពុជានាពេលនេះបានរួមចំណែកអភិវឌ្ឍកីឡាប្រដាល់សកលកម្ពុជាឱ្យកាន់តែមានការរីកចម្រើនទៅមុខ។ទន្ទឺមជាមួយគ្នានេះដែរលោកក៏សូមធ្វើការអំពាវនាវទៅដល់បងប្អូនប្រជាពលរដ្ឋ ក្រុមហ៊ុនសប្បុរសជននានា និងបណ្ដាស្ថានីយទូរទស្សន៍ទាំងអស់សូមចូលរួមគាំទ្រដល់កីឡាប្រដាល់សកលកម្ពុជាដើម្បីអាចសម្រេចបានចក្ខុវិស័យក្នុងការនាំយកកីឡាប្រដាល់សកលកម្ពុជាត្រឡប់ទៅចូលរួមប្រកួតកីឡាអូឡាំពិក ដូចក្នុងក្នុងព្រឹត្តិការណ៍កីឡាអូឡាំពិកក្នុងឆ្នាំ១៩៦៤ នៅទីក្រុងតូក្យូប្រទេសជប៉ុននាពេលកន្លងមក។
គួរម្លឹកថា ការប្រកួតកីឡាអាស៊ីលើកទី២០ នៅប្រទេសជប៉ុន ដែលនឹងប្រព្រឹត្តទៅនាខែកញ្ញា ឆ្នាំ២០២៦នេះ សហព័ន្ធបានបញ្ជូនកីឡាករជម្រើសជាតិចំនួន២រូបឱ្យទៅចូលរួមប្រកួតគឺកីឡាករ Nasredinov Anvar ប្រភេទទម្ងន់៨០គីឡូក្រាម និងកីឡាករវី សុភ័សទម្ងន់៧០គីឡូក្រាម ៕
ចែករំលែកព័តមាននេះ