ខេត្តមណ្ឌលគិរី ៖ ការពង្រីកផ្ទៃដីសម្រាប់ដាំដុះដំណាំកសិកម្ម កាន់តែរាលដាលដល់តំបន់អភិរក្សរបស់រដ្ឋ និងបានបង្កើតជាបញ្ហាថ្មីមួយ នោះគឺជម្លោះរវាងដំរីព្រៃនិងមនុស្ស បានកើតមានក្នុងរយៈពេលប៉ុន្មានឆ្នាំចុងក្រោយនេះ ដោយសារមានសេចក្តីត្រូវការជាបន្តបន្ទាប់ ព្រោះតែកំណើនប្រជាជនត្រូវការដីសង់ផ្ទះសម្បែង និងអភិវឌ្ឍជីវភាពប្រចាំថ្ងៃ ។
ក្នុងយុទ្ធនាការអន្ទាក់សូន្យនៅខេត្តមណ្ឌលគិរី លោករដ្ឋលេខាធិការក្រសួងបរិស្ថាន បានឲ្យដឹងនាព្រឹកថ្ងៃទី២៩ ខែកក្កដា ឆ្នាំ២០២២ថា នៅខេត្តរតនគិរី និងខេត្តមណ្ឌលគិរី បច្ចុប្បន្នកំពុងមានបញ្ហា ដោយសារបងប្អូនប្រជាពលរដ្ឋបានរុករានដីព្រៃដើម្បីបង្កបង្កើនផលដល់កន្លែងដែលដំរីព្រៃធ្លាប់រកស៊ីវិលជុំ ។ សត្វដំរី គឺវាតែងធ្វើដំណើររកស៊ីទៅតាមរដូវ វិលទៅវិលមក ហើយកន្លែងដែលពួកវាធ្លាប់ចេញចូលស៊ីចំណីនិងផឹកទឹក ត្រូវបាត់បង់ដោយសារការកាប់រានយកដីដាំដំណាំ ទើបបង្កឲ្យមានវិវាទរវាងដំរី និងមនុស្ស ដ្បិតកន្លែងដែលដំរីធ្លាប់មានរុក្ខជាតិជាចំណីសម្រាប់ស៊ី បែរជាមានដើមវា.យចន្ទី ឬដំណាំផ្សេងៗរបស់កសិករទៅវិញ ។
ឯកឧត្តមរដ្ឋលេខាធិការបន្តថា នៅពេលដល់រដូវដំរីត្រូវចូលទៅទីតាំងចាស់របស់វា ដើម្បីផឹកទឹក ឬស៊ីចំណីតាមទម្លាប់នៅទីតាំងដែលប្រជាពលរដ្ឋបានដាំដំណាំ វាបានប៉ះពាល់និងបំផ្លាញដល់ដំណាំពួកគាត់ ។ ដូច្នេះហើយ ដើម្បីទប់ទល់នឹងការបំផ្លាញដំណាំពីសំណាក់ដំរីព្រៃ កសិករខ្លះបានប្រើមធ្យោយបាយដូចជា ដំដែកគោលលើបន្ទះក្តារបង្កប់តាមផ្លូវដំរីដើរដើម្បីឲ្យវាមុតជើងត្រឡប់ថយក្រោយ ។ ចំណែកកសិករខ្លះទៀត បានទិញផាវផ្ទុះសំឡេងឮខ្លាំងដុតបន្លាចដំរី ឬប្រើកាំភ្លើងកែច្នៃជាដើម ។
នៅប្រទេសកម្ពុជា មានដំរីព្រៃពូជអាស៊ីប្រមាណពី៤៥០ទៅ៦០០ក្បាល ហើយដំរីព្រៃទាំងនេះមាននៅខេត្តមណ្ឌលគិរីច្រើនជាងគេ គឺជិត២០០ក្បាល ។ ក្រុមមន្ត្រីជំនាញបានអំពាវនាវដល់ប្រជាពលរដ្ឋទាំងអស់ ដែលរស់នៅជុំវិញតំបន់អភិរក្ស ត្រូវចូលរួមជួយថែរក្សាជម្រកសត្វព្រៃ និងមិនត្រូវកា.ប់រុករានដីព្រៃធ្វើជាកម្មសិទ្ឋឡើយ ។ កាលណាបាត់បង់ព្រៃឈើ វាបានបង្កផលប៉ះពាល់យ៉ាងធ្ងន់ធ្ងរលើប្រព័ន្ឋអេកូឡូស៊ី ហើយថែមទាំងត្រូវទទួលខុសត្រូវចំពោះមុខច្បាប់ទៀតផង ៕
ចែករំលែកព័តមាននេះ