ខេត្តសៀមរាប ៖ ពាក់ព័ន្ធករណីមនុស្សប្រុស-ស្រីបីនាក់ (មានប្តី-ប្រពន្ធ និងប្អូន) ដែលត្រូវបានឃាតករអារ.កសម្លាប់២នាក់ និងរបួសធ្ងន់ម្នាក់នោះ ត្រូវប្រភពទម្លាយថា គិតមកដល់រសៀលថ្ងៃទី០២ ធ្នូ នេះ មានតម្រុយខ្លះៗហើយ ។ ជនសង្ស័យដែលកំពុងរត់គេចខ្លួននោះ អាចមានគ្នាប្រមាណជិត១០នាក់ ដោយបានចូលទៅសម្លាប់ដល់ក្នុងបន្ទប់ដេកកាលពីយប់ឆ្លងឆ្នាំសកល ឈានចូលថ្ងៃទី១ មករា ស្ថិតនៅក្នុងក្រុមទី៦ ភូមិសាលាកន្សែង សង្កាត់ស្វាយដង្គំ ក្រុងសៀមរាប ។
ជនរងគ្រោះប្រុស-ស្រីទាំង៣នាក់មាន ទី១-ឈ្មោះ ឃុយ សុឃឹន ភេទប្រុស អាយុ២៧ឆ្នាំ មុខរបរបុគ្គលិកក្រុមហ៊ុនអាហារបំប៉នមានស្រុកកំណើតរស់នៅភូមិស្រែស្រូវ ឃុំល្បើក ស្រុកឈូក ខេត្តកំពត (ស្លាប់) ។ ទី២-ឈ្មោះវេត រដ្ឋា ភេទប្រុស អាយុ២៥ឆ្នាំ មុខរបរបុគ្គលិកក្រុមហ៊ុនអាហារបំប៉នដូចគ្នា មានស្រុកកំណើតនៅភូមិគោកព្រិច ឃុំសូភី ស្រុកអូជ្រៅ ខេត្តបន្ទាយមានជ័យ
(ស្លាប់) និងទី៣-ឈ្មោះឡេង ស្រីពៅ ភេទស្រី អាយុ១៨ឆ្នាំ មុខរបរបុគ្គលិកក្រុមហ៊ុនអាហារបំប៉នជាមួយគ្នាមានស្រុកកំណើតនៅភូមិការ៉េនជោ ឃុំអង្គាញ់ ស្រុកទ្រាំង ខេត្តតាកែវ (របួសធ្ងន់លើផ្ទៃមុខ) ។ ពួកគេទាំង៣ ស្នាក់នៅបន្ទប់ជួលកន្លែងកើតហេតុខាងលើ ដែលមានម្ចាស់ផ្ទះឈ្មោះប៉ូច ធិន ភេទស្រី អាយុ៥២ឆ្នាំ មានទីលំនៅភូមិសាលាកន្សែង សង្កាត់ស្វាយដង្គំ ក្រុង សៀមរាប ។
បើតាមការរៀបរាប់ពីកូនស្រីម្ចាស់ផ្ទះជួលឈ្មោះម៉ៅ ស្រីអែម អាយុ២៧ឆ្នាំ បានប្រាប់កោះសន្តិភាព នៅវេលាម៉ោង១១ និង៤០នាទីព្រឹកថ្ងៃដដែលនេះថា មុនដំបូងជនរងគ្រោះប្រុស-ស្រីទាំង៣នាក់ បានមកជួលផ្ទះគាត់ កាលពីថ្ងៃទី១២ វិច្ឆិកា កន្លងមក រហូតមកដល់ថ្ងៃកើតហេតុ គឺមានរយៈជាង១ខែ ។ ផ្ទះជួលរបស់គាត់ពីមុនៗមក មិនដែលមានរឿងអ្វីកើតឡើងទាល់តែសោះ ។ ជនរងគ្រោះដែលស្លាប់ មុនមកជួលផ្ទះនេះ បានប្រាប់ខ្ញុំថា ពួកគេទើបមកពីធ្វើការនៅប្រទេសថៃ របស់ក្រុមហ៊ុន (B.H.I.P) អាហារបំប៉នសុខភាព តែក្រុមហ៊ុនមកបំបែកសាខានៅក្នុងខេត្តសៀមរាបនេះ ទើបពួកគេមកធ្វើការនៅស្រុកខ្មែរវិញទៅ ។
នៅមុនពេលកើតហេតុ១ថ្ងៃ ពួកគេទាំង៣នាក់ ធ្វើខ្លួនស្អាតៗហើយត្រូវគាត់សួរថា តើថ្ងៃនេះបងនាំគ្នាទៅណាដែរ? ពួកគេឆ្លើយវិញថា ទៅចូលរួមក្នុងកម្មវិធីរបស់ក្រុមហ៊ុន ដើម្បីឆ្លងឆ្នាំសកលនៅឯភោជនីយដ្ឋាន «មហានគរ» ដែលមានចម្ងាយពីផ្ទះជួល ប្រហែល២០០ម៉ែត្រ ស្ថិតក្នុងភូមិកើតហេតុខាងលើ ។
ប្រភពន្តទៀតថា ដល់ម៉ោង១២ និង៣០នាទីយប់ឆ្លងឆ្នាំសកល ពួកគេក៏ចេញពីហាងនោះ ហើយបបួលអ្នកគ្រប់គ្រងទៅហាងផ្សេងទៀត ដោយប្រាប់អ្នកគ្រប់គ្រងថា ម្ហូបហាងនេះអត់ឆ្ងាញ់ទេ គិតនាំគ្នាទៅហូបនៅហាងខាងក្រៅវិញ ។ ខណៈពេលនោះ ពួកគេទាំង២នាក់ប្តី-ប្រពន្ធក៏ជិះម៉ូតូកង់៣ ទៅហូបនៅហាងផ្សេង រួចក៏ត្រឡប់មកនៅផ្ទះជួលវិញ ។
ដោយឡែក អ្នកជួលបន្ទប់ជិតខាងគ្នា ក៏បានប្រាប់សមត្ថកិច្ចដែរថា ពួកគេមិនបានឮសូរសូម្បីតែបន្តិច មិនដឹងថា ពួកឃាតករចូលសម្លាប់បានយ៉ាងណាម៉េចនោះទេ ។
សមត្ថកិច្ចសន្និដ្ឋានជំហានដំបូងថា ករណីនេះជាករណីគំនុំ ហើយពលរដ្ឋគិតថា អាចឃាតកម្មគិតទុកជាមុនច្រើនជាង ។ ប្រភពពីសមត្ថកិច្ចបានប្រាប់នៅរសៀលថ្ងៃទី២ មករា នេះដែរថា បន្ទាប់ពីចុះស៊ើបអង្គេត និងសួរនាំម្ចាស់ផ្ទះ និងអ្នកជិតខាងរួចមក ពួកគេបានឆ្លើយប្រាប់ថា នៅយប់ថ្ងៃកើតហេតុពួកគេអត់បានឮអ្វីទាំងអស់ ព្រោះម្ចាស់ផ្ទះបានទៅដេកនៅផ្ទះក្រោយផ្សារលើបាត់ទៅហើយ មកមើលតែពេលថ្ងៃទេ ។
ចែករំលែកព័តមាននេះ