វាសនាអ្នកជំនួញសង់ផ្ទះលក់ ត្រូវផ្ញើខ្លួនក្នុងពន្ធនាគារមួយរយៈរឿងលុយរាប់ម៉ឺនដុល្លារ
- ភ្នំពេញ
តំណាងអយ្យការអមសាលាដំបូងរាជធានីភ្នំពេញ នៅថ្ងៃទី២៥ ខែកក្កដា ឆ្នាំ២០២២ បានសម្រេចធ្វើការចោទប្រកាន់លើជនសង្ស័យម្នាក់ជាផ្លូវការ ពីបទ
រាជធានីភ្នំពេញ ៖ តំណាងអយ្យការអមសាលាដំបូងរាជធានីភ្នំពេញ នៅថ្ងៃទី២៥ ខែកក្កដា ឆ្នាំ២០២២ បានសម្រេចធ្វើការចោទប្រកាន់លើជនសង្ស័យម្នាក់ជាផ្លូវការ ពីបទ.ឆបោ.ក និងមិនបំពេញកាតព្វកិច្ចចំពោះឧបករណ៍អាចជួញដូរបាន នឹងបានចាត់បញ្ជូនទៅចៅក្រមស៊ើបសួរ ដើម្បីឃុំខ្លួនដាក់ពន្ធនាគារជាបណ្តោះអាសន្ន ។
ជនសង្ស័យខាងលើមានឈ្មោះ ភាគ ផាន់នី ភេទប្រុស អាយុ៣៣ឆ្នាំ មុខរបរជាអ្នករកស៊ីទិញដីលក់ផ្ទះលក់ មានទីលំនៅផ្ទះលេខD ៥៦ ផ្លូវបេតុង ស្ថិតក្នុងភូមិស្រែដូនតូច សង្កាត់ពញាពន់ ខណ្ឌព្រែកព្នៅ រាជធានីភ្នំពេញ ។
ជនសង្ស័យត្រូវបានកម្លាំងសមត្ថកិច្ចនគរបាលការិយាល័យព្រហ្មទណ្ឌកម្រិតស្រាលរាជធានីភ្នំពេញ ចាប់ខ្លួនតាមដីកាបញ្ជាឲ្យចូលខ្លួនរបស់លោក សេង ហៀង ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ ពីបទ.ឆបោ.ក និងមិនបំពេញកាតព្វកិច្ចចំពោះឧបករណ៍អាចជួញដូរបាន ដែលប្រព្រឹត្តនៅរាជធានីភ្នំពេញ ក្នុងអំឡុងខែសីហា ឆ្នាំ២០១៧ ។
ហើយការចាប់ខ្លួនជនសង្ស័យខាងលើនេះ ត្រូវបានសមត្ថកិច្ចបង្ហើបឲ្យដឹងថា រឿងផ្តើមចេញពីបុគ្គលឈ្មោះ ភាគ ផាន់នី បានទទួលប្រាក់កក់គេចំនួន៥ម៉ឺនដុល្លារអាមេរិក ដើម្បីយកទៅសង់ផ្ទះលក់ឲ្យគេមួយកន្លែង នៅក្នុងសង្កាត់ពាន់សាំង ខណ្ឌព្រែកព្នៅ រាជធានីភ្នំពេញ លុះដល់ថ្ងៃកំណត់តាមកិច្ចសន្យា បែរជាគ្មានផ្ទះប្រគល់ឲ្យគេ ថែមទាំងគេចវេសពីម្ចាស់លុយទៀតផង និងចេះតែសន្យាខ្យល់ ដូច្នោះហើយទើបធ្វើឲ្យដើមបណ្តឹងគេសម្រេចចិត្តប្តឹងសមត្ថកិច្ចឲ្យចាត់ការតាមផ្លូវច្បាប់ ។
ចុងក្រោយ វាសនាអ្នកសង់ផ្ទះលក់រូបនេះ នឹងត្រូវផ្ញើខ្លួនក្នុងពន្ធនាគារមួយរយៈ ដោយសារមូលហេតុគ្មានប្រាក់សម្រាប់ដាក់តម្កល់ធានាខ្លួនឲ្យរួចផុតពីការចោទប្រកាន់នោះ ។
ចែករំលែកព័តមាននេះ