ផ្លូវអាក្រក់អ្នកភូមិនាំគ្នាជួសជុលក្រាលធាងត្នោតរាយចំបើង
ខេត្តព្រៃវែង ៖ ប្រជាពលរដ្ឋនៅភូមិលើ ឃុំមេសរប្រចាន់ ស្រុកពារាំង បាននាំគ្នាយកធាងត្នោតនិងចំបើងទៅក្រាលនៅលើផ្លូវចាស់
ខេត្តព្រៃវែង ៖ ប្រជាពលរដ្ឋនៅភូមិលើ ឃុំមេសរប្រចាន់ ស្រុកពារាំង បាននាំគ្នាយកធាងត្នោតនិងចំបើងទៅក្រាលនៅលើផ្លូវចាស់
ខេត្តព្រៃវែង ៖ ប្រជាពលរដ្ឋនៅភូមិលើ ឃុំមេសរប្រចាន់ ស្រុកពារាំង បាននាំគ្នាយកធាងត្នោតនិងចំបើងទៅក្រាលនៅលើផ្លូវចាស់ ដែលបច្ចុប្បន្នកំពុងរងការខូចខាតយ៉ាងខ្លាំងរហូតមិនអាចធ្វើដំណើរឆ្លងកាត់បាន ។
អ្នកភូមិបានឲ្យដឹងថា ផ្លូវលំក្នុងភូមិរបស់ពួកគាត់នេះបានរងការខូចខាតច្រើនឆ្នាំមកហើយ ពេលមានភ្លៀងធ្លាក់ម្តងៗ តួផ្លូវទាំងមូលបែកភក់ល្បាប់ ធ្វើដំណើរឆ្លងកាត់មិនបានទេ គឺត្រូវជិះកង់ម៉ូតូវាងចូលតាមដីភូមិ ឬក្រោមផ្ទះគេទើបអាចឆ្លងកាត់ទៅមកបាន ។ ជាពិសេសគឺកូនៗពួកគាត់ជាសិស្សសាលា ទៅរៀនមិនដែលទាន់ម៉ោងទេ ពេលខ្លះរអិលដួលប្រឡាក់ភក់ទៅរៀនលែងកើតក៏មាន ។ ឯរឿងដែលសំខាន់មួយទៀតនោះគឺ នៅពេលដល់រដូវប្រមូលផលស្រូវបានហើយត្រូវដឹកមកផ្ទះ ឬដឹកទៅលក់ម្តងៗវេទនាខ្លាំងណាស់ ព្រោះផ្លូវខូចបើករថយន្តចូលមិនបាន ត្រូវចំណាយលុយជួលគោយន្តដឹកជាច្រើនជើងអស់លុយយ៉ាងច្រើន ទម្រាំឆ្លងផុតផ្លូវភក់ល្បាប់១ខ្សែនេះ ហើយពួកគាត់មិនចង់នៅវេទនាបែបនេះទៀតឡើយ ។
ពួកគាត់រៀបរាប់ទៀតថា កន្លងមកពួកគាត់ធ្លាប់បានធ្វើលិខិតស្នើសុំទៅអាជ្ញាធរឃុំជាច្រើនដងមកហើយ ឲ្យជួយជួសជុលផ្លូវនេះដែលមានទទឹងត្រឹមតែ៤ម៉ែត្រ និងបណ្តោយ២០០ម៉ែត្រប៉ុណ្ណោះ តែលោកមេឃុំសម្ងំស្ងាត់ឈឹងមិនឃើញធ្វើអ្វីសោះ សូម្បីតែចុះទៅអើតមើលក៏មិនទៅដែរ ហេតុនេះហើយទើបពេលនេះពួកគាត់នាំគ្នាធ្វើការជួសជុលដោយខ្លួនឯងតែម្តងទៅ។
ពួកគាត់បញ្ជាក់ថា ការជួសជុលផ្លូវនេះគឺពួកគាត់នាំគ្នាកាប់ដីពីក្នុងស្រែយកមកចាក់លុបកន្លែងដែលមានភក់ល្បាប់និងជង្ហុកជ្រៅៗឱ្យស្មើគ្នា រួចយកធាងត្នោតស្លឹកត្នោតមកក្រាលធ្វើបាតហើយក្រាលចំបើងពីលើ រួចទើបដឹកដីយកមកចាក់ក្រាលពីលើចំបើងនោះទៀត ។ ការធ្វើបែបនេះពួកគាត់ជឿថា មិនអាចជាប់បានយូរទេ ប៉ុន្តែពួកគាត់គ្មានជម្រើសឡើយ ។ ផ្លូវខូច រាស្ត្រវេទនា បើអាជ្ញាធរមិនគិតគូរមានតែរាស្ត្រដោះស្រាយដោយខ្លួនឯង ទោះតាមរូបភាពណាក៏ដោយ ។
ដោយឡែក លោក ចែម រិន មេភូមិលើបានឲ្យដឹងថា រឿងផ្លូវខូចនេះលោកបានរាយការណ៍ទៅលោកមេឃុំយូរហើយ តែលោកមេឃុំគ្មានការឆ្លើយតបសោះ ដូច្នេះលោកមិនដឹងធ្វើម៉េចដែរ តែបើអ្នកស្រុកនាំគ្នាធ្វើដោយខ្លួនឯងក៏ល្អដែរ យ៉ាងហោចណាស់ក៏បានប្រើមួយរយៈពេលដែរ ទោះមិនបានយូរក៏ដោយ ។
រីឯលោក គីម ហេង មេឃុំមេសរប្រចាន់បានឲ្យដឹងថា រឿងផ្លូវខូចក្នុងភូមិលើនេះ លោកបានដឹងហើយ ឯសំណើរបស់ពលរដ្ឋលោកក៏បានទទួលដែរ តែរឿងខូចផ្លូវនេះវាមិនមែនខូចតែភូមិលើទេ ភូមិផ្សេងៗជាច្រើនទៀតក៏ខូចដូចគ្នាដែរ ។ លោកធ្វើមេឃុំនៅឃុំមេសរប្រចាន់ជិត២៧ឆ្នាំហើយ រឿងអីផ្លូវខូចប៉ុណ្ណឹងលោកមិនដឹង ឯរឿងមិនទាន់បានជួសជុលគឺដោយសារតែថវិកាឃុំអស់ហើយ តែលោកអាចនឹងដាក់ចូលក្នុងផែនការឃុំសម្រាប់់ជួសជុលនៅឆ្នាំក្រោយ ៕
ចែករំលែកព័តមាននេះ