អង់គ្លេស ៖ ខ្សែប្រយុទ្ធ Cristiano Ronaldo ត្រូវ​បាន​រាយការណ៍​ថា កំពុង​មាន​ឆន្ទៈ​ក្នុង​ការ​កាត់​បន្ថយ​ប្រាក់​ថ្លៃ​ពលកម្ម​របស់​គេ​យ៉ាងច្រើន​។ ដើម្បី​អាច​ចាក​ចេញពី​ក្លិប Manchester United នៅ​រដូវក្តៅ​នេះ​។

យោង​តាម​ប្រភព​ពី Daily Mail បាន​រាយការណ៍​ថា ប្រធាន​ក្រុម​ជម្រើសជាតិ​ព័រ​ទុ​យ​ហ្គា​ល់វ័យ​៣៧​ឆ្នាំ​រូប​នេះ សុខចិត្ត​ទទួលយក​ការ​កាត់​ប្រាក់​ថ្លៃ​ពលកម្ម ៣០% ដើម្បី​ទទួល​បានការ​ផ្ទេរ​ទៅ​ចូលរួម​ជាមួយ​ក្រុម ដែល​មាន​កៅអី​លេង​ពានរង្វាន់ UEFA Champions League រដូវ​កាល​ក្រោយ​។

របាយការណ៍​ជា​ច្រើន​ផ្សេង​ទៀត​បាន​ផ្សាយ​ថា ខ្សែប្រយុទ្ធ​ឆ្នើម​រូប​នេះ អាច​នឹង​ទៅ​ចូលរួម​ជាមួយ​ក្លិប Atletico Madrid ដែល​ជា​គូប្រជែង​អតីត​ក្លិប​ចាស់​របស់​គេ Real Madrid ។ ហើយ​បោះ​ទោះបីជា​មានការ​កាត់​បន្ថយថ្លៃ​ពលកម្ម​៣០%​។ ប៉ុន្តែ​ក្លិប​ដែល​ចង់បាន Ronaldo នៅ​តែ​ត្រូវ​ចំណាយ​៣០​ម៉ឺន​ផោន​ក្នុង​១​ស​ប្តា​ហ៍​លើ​ថ្លៃ​ពលកម្ម​របស់​កីឡាករ​រូប​នេះ​។

Ronaldo បាន​ស្នើ​សុំ​ជា​ចាក​ចេញពី Man Utd នៅ​ដើមខែ​នេះ​។ ប៉ុន្តែ​រហូត​មក​ទល់​ពេល នៅ​មិន​ទាន់​មាន​ក្លិប​កំពូល​ៗ​ណាមួយ ដាក់​សំណើ​ផ្ទេរ​លើ​ម្ចាស់​ពានរង្វាន់ Ballon d’Or ៥​សម័យកាល​រូប​នេះ​នៅឡើយ​ទេ​។ ដូច្នេះ​ហើយ ការ​កាត់​ប្រាក់​ថ្លៃ​ពលកម្ម​អាច​ជា​ជម្រើស​ដ៏​ល្អ​មួយ ដើម្បី​ទាក់ទាញ​ក្រុម​មាន​កៅអី​លេង Champions League​។

គួរ​រំលឹក​ថា Cristiano Ronaldo បាន​សម្រេច​ផ្លាស់​ពី​ក្រុម Juventus មក​ចូលរួម​ជាមួយ Man Utd សារ​ជា​ថ្មី​ម្តងទៀត កាលពី​ចុងខែ​សីហា ឆ្នាំ​២០២១​។ ដោយ​ស៊ុត​បញ្ចូល​ទី ២៤​គ្រាប់​ពី​ការ​បង្ហាញខ្លួន ៣៨​ប្រកួត​គ្រប់​កម្មវិធី កាលពី​រដូវ​កាល​មុន​។ ការ​វិល​ត្រឡប់​របស់​ខ្សែប្រយុទ្ធ​ឆ្នើម​រូប​នេះ មិន​បាន​សមប្រកប​ឡើយ​។ ដោយ Man Utd បញ្ចប់​ទៅ​នៅ​ចំណាត់ថ្នាក់​លេខ​៦ នៅ​ក្នុង​ក្រប​ខណ្ឌ English Premier League និង​បាន​របូត​ឱកាស​លេង Champions League រដូវ​កាល​ក្រោយ​៕