កសិករឥណ្ឌូណេស៊ីងាកចេញពីអាជីវកម្មទឹកដោះគោ
ប្រទេសឥណ្ឌូណេស៊ី ៖ សមាគមកសិករទឹកដោះគោ (APSPI) របស់ឥណ្ឌូណេស៊ីព្យាករថា ភាពអន់ថយផ្នែកផលិតកម្មទឹកដោះគោស្រស់ក្នុងស្រុកនឹងបន្តដល់ឆ្នាំក្រោយ ព្រោះកសិករអាចនឹងបញ្ឈប់អាជីវកម្ម
ប្រទេសឥណ្ឌូណេស៊ី ៖ សមាគមកសិករទឹកដោះគោ (APSPI) របស់ឥណ្ឌូណេស៊ីព្យាករថា ភាពអន់ថយផ្នែកផលិតកម្មទឹកដោះគោស្រស់ក្នុងស្រុកនឹងបន្តដល់ឆ្នាំក្រោយ ព្រោះកសិករអាចនឹងបញ្ឈប់អាជីវកម្ម ដោយសារមានការប្រកួតប្រជែងយ៉ាងខ្លាំងពីផលិតផលទឹកដោះគោនាំចូល ។
សមាគមខាងលើព្យាករថា នៅឆ្នាំក្រោយ ផលិតកម្មទឹកដោះគោស្រស់ក្នុងស្រុក នឹងធ្លាក់ពី៧៥ម៉ឺនតោនក្នុងឆ្នាំ២០១៦ មកត្រឹម៧០ម៉ឺនតោនប៉ុណ្ណោះ ។ ទិន្នន័យនេះស្មើតែ២០%នៃតម្រូវការទឹកដោះគោស្រស់សរុបក្នុងស្រុក ខណៈបច្ចុប្បន្ន ស្មើនឹង៣,៨២លានតោន ។
លោក Agus Warsito ប្រធាន APSPI បាននិយាយកាលពីថ្ងៃសុក្រថា ៖ « ក្នុងឆ្នាំ ២០២០ ពួកយើងព្យាករថា ចំនួននោះនឹងស្មើរវាង១២% ទៅ១៣%ប៉ុណ្ណោះ » ។
តម្លៃទឹកដោះគោស្រស់ក្នុងស្រុកបច្ចុប្បន្ន គឺស្មើប្រមាណ៣៣សេនក្នុង១លីត្រ ។
លោកបន្តថា មានកសិករជាច្រើនបានសម្រេចចិត្តលក់គោរបស់ពួកគេ ហើយចាប់ផ្តើមអាជីវកម្មដែលទាក់ទាញជាងនេះ ។
បើមើលពីស្ថានភាពនេះ លោក Agus បានជំរុញដល់រដ្ឋាភិបាលក្នុងការចេញវិធានការគាំទ្រដល់កសិករដូចជា ជំរុញដល់សហគ្រាសប្រើប្រាស់ទឹកដោះគោ ឲ្យទិញផលិតផលក្នុងស្រុកជាដើម ។
ទិន្នន័យពីក្រសួងកសិកម្មរបស់ប្រទេសនេះបានបង្ហាញដែរថា ឥណ្ឌូណេស៊ីមានគោជិត ៥២ម៉ឺនក្បាលក្នុងឆ្នាំ២០១៥ និងកើនឡើងដល់៥៣៥.៨៦០ក្បាលនៅឆ្នាំនេះ ៕
ចែករំលែកព័តមាននេះ