ប្រទេសថៃ ៖ ដើម្បីការពារកុំឱ្យតម្លៃដំឡូងមីធ្លាក់ចុះក្នុងពេលរដូវប្រមូលផលនេះ ក្រសួងពាណិជ្ជកម្មនឹងបង្ខំឱ្យឈ្មួញដំឡូងមីរក្សាស្តុកបន្ថែមទៀត ព្រមទាំងកាត់បន្ថយការនាំចេញ ។
ចាប់ពីដើមឆ្នាំថ្មីនេះរហូតដល់ចុងខែមេសា ឈ្មួញនឹងត្រូវរក្សាស្តុកដំឡូងមីខណៈពួកគេនាំចេញដំឡូងមី១០០តោន គឺត្រូវរក្សាក្នុងស្តុក១៥០តោន ។
លោក Duangporn Rodphaya អគ្គនាយកនៃនាយកដ្ឋានពាណិជ្ជកម្មបរទេសរបស់ក្រសួងពាណិជ្ជកម្ម ថ្លែងថា ៖ « វិធានការនេះនឹងជួយឲ្យការផ្គត់ផ្គង់ និងតម្រូវការដំឡូងមីក្នុងអំឡុងរដូវប្រមូលផលមានតុល្យភាព ហើយរក្សាតម្លៃមិនឲ្យធ្លាក់ចុះច្រើនពេក » ។
នាយកដ្ឋាននឹងបញ្ជូនភ្នាក់ងារទៅពិនិត្យឃ្លាំង២ដងក្នុងមួយខែដើម្បីធានាថា ឈ្មួញទាំងអស់គោរពតាមបទប្បញ្ញត្តិនេះ ។ លើសពីនេះទៀត អនុស្សរណៈនៃការយោគយល់គ្នាមួយត្រូវបានចុះហត្ថលេខាដោយសហព័ន្ធអ្នកដាំដំឡូងមី និងសមាគមផលិតអេតាណុលថៃ ដើម្បីធានាថា យ៉ាងហោចណាស់ ដំឡូងមី១.២០០តោនត្រូវបានទិញពីកសិករក្នុង១ថ្ងៃ មានតម្លៃ១.៩០បាតក្នុង១គីឡូក្រាម ។
ក្រសួងពាណិជ្ជកម្មឲ្យដឹងថា អនុស្សរណៈនេះនឹងមានប្រសិទ្ធភាពចាប់ពីខែមករា ដល់ខែមីនា អំឡុងពេលដែលដំឡូងមីមានចំនួនសរុប១០៨ពាន់តោនសម្រាប់ផ្គត់ផ្គង់ក្នុងការផលិតអេតាណុល ។ ក្រសួងព្យាករថា នៅឆ្នាំក្រោយដំឡូងមីសរុបចំនួន៣១លានតោន នឹងត្រូវដាំដុះប្រមាណ១៧លានតោនក្នុងអំឡុងត្រីមាសទី១ ។
នៅអំឡុងពេល១០ខែដំបូងឆ្នាំនេះ ប្រទេសថៃបាននាំចេញផលិតផលដំឡូងមី៨,៩លានតោន ក្នុងតម្លៃ២,៣៨ប៊ីលានដុល្លារអាមេរិក (៨៥,៧ប៊ីលានបាត) ធ្លាក់ចុះ១០,៤%ពីមួយឆ្នាំទៅមួយឆ្នាំនៃបរិមាណ និង២០,២៩%នៃតម្លៃ ៕
ចែករំលែកព័តមាននេះ