មិនចេះខ្មាសខ្មោច...

មិនចេះខ្មាសខ្មោច…

ថ្ងៃទី ២៤ ខែ ធ្នូ ឆ្នាំ ២០១៦

ម៉ោង ០២:៥៣

ប៉ុន្មានឆ្នាំមុននេះ ផ្អើលឈុល…នៅខេត្តសៀមរាប ដែលអភិបាលខេត្តស៊េរីចាស់បានដោះដូរដោយជោគជ័យ…ទីតាំងសាលាខេត្ត…ទីតាំងបណ្តាមន្ទីរ អង្គភាពក្នុងខេត្តប្រមាណជិត៣០អង្គភាព…ទៅបង្កើតទីតាំងថ្មីចម្ងាយប្រមាណ២០គ.ម ពីទីរួមខេត្ត…ដែលគេឱ្យឈ្មោះថាទីតាំងរដ្ឋបាលខេត្តប្រមូលផ្តុំ…។ គឺប្តូរពីក្នុងទីរួមខេត្តទៅនៅតំបន់វាលខ្មោច…វាលសោះខ្យល់…វាលរហោឋាន…

លទ្ធផលចុងក្រោយ…ឯកជនរឹបយកអស់ទីតាំងត្រូវប៉ាន់កណ្តាលក្រុង…ដេញមន្ត្រីរាជការដ៏ល្ហេមល្ហាមទាំងឡាយឱ្យទៅធ្វើការនៅឆ្ងាយដាច់អាល័យ…។

ទីបំផុត…បរាជ័យទៅហោងដោយសារតែមន្ត្រីរាជការមិនទៅធ្វើការ…ខ្លះទៅដែរ…គឺទៅតែមួយព្រឹកក៏វិលវិញ…ចុងក្រោយបំផុត…គឺបរាជ័យទៅហោង…ដោយសាររាជរដ្ឋាភិបាលបានដោះដូរម្តងទៀត…យកទីតាំងអាជ្ញាធរជាតិអប្សរាក្នុងក្រុងធ្វើទីតាំងប្រមូលផ្តុំសងវិញ…។ ចំណែកទីតាំងដាច់សង្វែងនោះប្រគល់ឱ្យអាជ្ញាធរអប្សរាទទួលយកកម្មលោកិយនេះ…ប្រៀបដូចទទួលយកថ្មបាក់បញ្ចប់រឿងសោកនាដកម្មនេះទៅហោង…។

ស្មានថាមេរៀននេះ ច្បាស់ជាអាជ្ញាធរខេត្តទាំងឡាយ…បានចងចាំ…បានរួមចំណែកថ្កោល…។ ប៉ុន្តែផ្ទុយទៅវិញ បែរជាអាជ្ញាធរខេត្តព្រះសីហនុ លោក យន្ត មីន ដែលជិតរឺត្រែតទៅហើយនោះ…ស្នើសុំដោះដូរបណ្តាទីតាំងរបស់រដ្ឋមួយខេត្តដែលមានជិត៣០អង្គភាព…ទៅបង្កើតទីតាំងថ្មី ឈ្មោះទីតាំងប្រមូលផ្តុំរដ្ឋបាលខេត្ត នៅជាយក្រុងព្រះសីហនុ…ជាតំបន់ព្រៃ…ដែលខ្លះថា តំបន់ខ្មោច…។

ប៉ុន្តែសំណាងធំណាស់…សម្តេចក្រឡាហោម ដែលជាប្រមុខនៃក្រសួងមហាផ្ទៃ…ហៅក្រសួងពោះធំ…មិនឯកភាពទេ…សូម្បីមួយអង្គភាព ឬមួយចានក៏មិនដូរដែរ…
មន្ត្រីរាជការក្រុងព្រះសីហនុ…លើកលែងលោកខេត្តដែលជិតរឺត្រែតចេញ…បានស្រែកជយឃោសកងរំពងថា ជយោ ! សម្តេចក្រឡាហោម…។

ដឹងថាគំរូអាក្រក់នៅខេត្តសៀមរាបមានរួចហើយ…ហេតុអីក៏អន់ម្ល៉េះ ? ហ៊ានសុំដោះដូរសម្បត្តិរដ្ឋមួយខេត្តឱ្យទៅឯកជន…ហេតុអីមិនចេះអៀនខ្មាស ?
សំណើសុំដោះដូរនោះ មិនខុសពីយក«ឆ្នាំងមាស» ដូរយក«ឆ្នាំងដី»ឡើយ…លោកម្ចាស់ !!?
កោតគេមិនចេះខ្មាសខ្មោច…
អាឡេវ