សហ​ព័ន្ធ​​​កីឡា​បាល់​បោះ​​​កម្ពុជា​​ធ្វើ​​មហា​សន្និ​​បាត​​បោះ​ឆ្នោត​​​ជ្រើស ​សមា​ជិក​​​គណៈ​​​កម្មា​ធិការ​​​ប្រតិ​បត្តិ​​​​អាណតិ្ត​​​ទី​​6​ឆ្នាំ​​2012-2016​


រា​ជ​ធានីភ្នំ​ពេញ​ ៖ ​​បន្ទាប់​ពី​គណៈ​កម្មា​​ធិការ​ប្រតិ​បត្តិ​​​​អាណត្តិ​​​ចាស់​ទី​​​៥​​​បាន​បញ្ចប់​​​​ទៅ​​​កាល​ពី​ព្រឹក​ថ្ងៃ​​ចន្ទ​​​ទី​​​២១ មករា​ ​នៅ​សមា​គម​​គ្រឹះស្ថាន​​​ឧត្តម​សិក្សា​​​ សហ​ព័ន្ធ​​កីឡា​បាល់​​បោះ​កម្ពុជា​​​ បាន​​រៀប​ចំ​ធ្វើ​​មហា​សន្និ​បាត​​​​បោះ​ឆ្នោត​ជ្រើស​រើស​​​​សមាជិក​គណ​ៈ​កម្មា​ធិការ​​​​ប្រតិ​បត្តិ​​​អាណត្តិ​​​​​​​​​ថ្មី​លើក​​ទី​​៦ ឆ្នាំ​​២០១២-​២០១៦​ របស់​ខ្លួន​ជា​​​បន្ត​ទៀត​​​ ។ ​​

លោក​​​​ស៊ាន​​​ បូរ៉ា​​ត​​ រដ្ឋ​លេខា​ធិការ​​​​ក្រសួង​អប់​រំ យុវជន​ និង​កី​ឡា​ ​ត្រូវ​បាន​​​អង្គ​មហា​សនិ្ន​បាត​​ជ្រើ​ស​រើស​​​ជា​ប្រធាន​​​សហ​ព័ន្ធ​​​កីឡា​បាល់​បោះ​​កម្ពុជា​​​​សម្រាប់​អាណត្តិ​​​​ទី​​៦​​​​ឆ្នាំ​​​​២០១២-២០១៦​​​។ អង្គ​​មហា​សន្និ​បាត​​នេះ​​ ​បាន​ការ​​​​អញ្ជើញ​​ចូល​រួម​​​​​​​​​​​​​ជា​គណៈអធិប​តី​​​​ពី​លោក​ប៊ុន​​​​ សុខ​ រដ្ឋ​លេ​ខា​ធិការ​​​​ក្រសួង​អប់​រំ យុវ​ជន និង​កីឡា​​ ​​និង​លោក​វ៉ាត់ ចំរើន​​ អគ្គ​លេខា​ធិការ​​​​នៃ​គណៈ​​កម្មា​ធិការ​​ជាតិ​អូឡាំ​​ពិក​​​កម្ពុជា​ផង​ដែរ​ ។​​

លោក​កែវ​ សារ៉េត​​ ​មន្ត្រី​​សម្រប​សម្រួល​​​​នៅ​ក្នុង​​​​កម្មវិធី​រៀប​ចំ​បោះ​​ឆ្នោត​​​​​​​នេះ​បាន​ឱ្យ​ដឹង​​ថា ​​មាន​អ្នក​ចូល​រួម​​​បោះ​ឆ្នោត​​​​ចំនួន​​២៧​​នាក់​ ហើយ​ក្នុង​​នោះ​មាន​អ្នក​​​​ឈរ​​ឈ្មោះ​​ឱ្យ​គេ​បោះ​​ឆ្នោត​​​​២​១​នាក់​​​​ ខណៈ​ពេ​ល​ដែល​​​​គណៈ​កម្មា​ធិការ​​​​ប្រតិ​​បត្តិ​​​​អាណតិ្ត​​ថ្មី​នេះ​​ត្រូវ​ការ​​សមា​ជិក​​​​​បម្រើ​​​​ការ​ងារ​នៅ​ក្នុង​​​​សហ​ព័ន្ធ​​​​ចំនួន​១៩​នាក់​​ ដែល​ចំនួន​នេះ​​​ត្រូវ​​បាន​គេ​​​​ចាត់​ទុក​ថា​​ច្រើន​​​ជាង​បណ្តា​សហ​​ព័ន្ធ​​​​នានា និង​មិន​ធ្លាប់​មាន​ពី​មុន​មក​​​ឡើយ ។​ ក្នុង​ចំណោម​​​​សន្លឹក​ឆ្នោត​ទាំង​​​២៧​​​​​សំឡេង​​នេះ​​​ទៀត​​ គឺ​មាន​​​២​សំឡេង​​​​ត្រូវ​បាន​​គេ​​ចាត់​ទុក​​ថា​មិន​បាន​ការ​ បាន​ន័យ​ថា សំឡេង​​​បាន​​ការ​មាន​​២៥​សំឡេង​​​។​​

លោក​ស៊ាន​​ បូរ៉ាត​​ ទទួល​បាន​​ការ​គាំ​ទ្រ​​​​២៥​សំឡេង​​​​ ហើយ​ត្រូវ​​បាន​អង្គ​​​មហា​សន្និ​បាត​​​​ជ្រើស​រើស​​​​ធ្វើ​ជា​ប្រធាន​​​សហ​ព័ន្ធ​​​​កីឡា​​បាល់​បោះ​កម្ពុជា​​​​អាណត្តិ​​​​​​ទី​​៦​​ ឆ្នាំ​​២០១២-២០១៦​ ។ ចំណែក​​​អនុ​ប្រធាន​​​​​​មាន​ចំនួន​៦​​រូប​​ ហើយ​លោក​​​អ៊ុក​​ សិទ្ធិ​​ជាតិ​ ប្រធាន​​មជ្ឈ​មណ្ឌល​​​​ជាតិ​ហ្វឹក​ហ្វឺន​​​កីឡា​​ត្រូវ​បាន​តែង​តាំង​​ជា​អគ្គ​​ហិរញ្ញិក​​​​ ក្រៅ​ពី​នោះ​​១០​រូប​ទៀត​ គឺ​ជា​​​សមា​ជិក​​​ ។​ ​លោក​ស៊ាន​ បូរ៉ាត​​​ ​ថ្លែង​​​​ថា បើ​ទោះ​​ជា​ចំនួន​​​​សមា​ជិក​​​គណៈកម្មា​ធិ​ការ​​​​​ប្រតិបត្តិ​​​​​​​​​នេះ​​ច្រើន​​​មិន​ធ្លាប់​មាន​ពី​មុន​​មក​​​ក្តី​ ​ប៉ុន្តែ​​​​​លោក​គិត​ថា ​មូល​ហេតុ​ដែល​​​នាំ​​ឱ្យ​​​​លោក​សម្រេច​​​ចិត្ត​ជ្រើស​​រើស​យក​សមា​ជិក​​​ច្រើន​បែប​នេះ​​​ ព្រោះ​លោក​​​​គិត​​​ថា​ជា​រឿង​​ល្អ​ទៅ​វិញ​​ គឺ​វា​​​អាច​សម្រួល​​​កិច្ច​ការ​​​គ្នា​ទៅ​វិញ​ទៅ​មក​​​ ។​

នៅ​លើ​ពិ​ភព​​​​លោក​គេ​ក៏​មិន​​​ហាម​ឃាត់​​​ដែរ បាន​ន័យ​ថា ​អាស្រ័យ​​​នៅ​លើ​អង្គ​​​មហា​​សន្និ​បាត​​​​តែ​ប៉ុណ្ណោះ​​ ហើ​យ​ចំ​ពោះ​​​​​រូប​​​លោក​ក៏​បាន​​​​ធ្វើ​ការ​​​ប្តេជ្ញា​​​ចិត្ត​នៅ​ចំពោះ​មុខ​​​​អង្គ​មហាសន្និ​បាត​​​ផ​ង​ដែរ​ថា ​​នឹង​មិន​ធ្វើ​​អ្វី​ឱ្យ​ប៉ះ​ពាល់​​​​ដល់​​សេច​ក្តី​​​ថ្លៃ​ថ្លូរ​​ណា​មួយ​​ឡើយ​ ។​​ ​លោក​នឹង​ខិត​ខំ​​​ធ្វើ​ឱ្យ​ដំណើរ​ការ​​​​ការ​ងារ​​​ទាំង​ឡាយ​​​នៅ​ក្នុង​សហ​ព័ន្ធ​​​​មាន​ការ​រីក​ចម្រើន​​​​​​ទៅ​មុខ​ជា​​​លំដាប់​ ។​​ ជា​ពិសេស​​ក្នុង​ការ​​​​រៀប​​​ចំ​​ឱ្យ​មាន​​​ព្រឹត្តិការណ៍​​​​នៃ​ការ​ប្រកួត​​​​​ផ្សេង​ៗ​​​ជា​ច្រើន​ទៀត​​​​​ និង​បណ្តុះ​​​បណ្តាល​​​យុវជន​វ័យ​ក្មេង​​​​ ធ្វើ​​យ៉ាង​ណា​​​​​ឱ្យ​ពួក​គេ​​​​​​ក្លាយ​ជា​ក្រុម​ជម្រើស​​​យុវ​ជន​​​នា​ពេល​​​អនា​គត​​ ។​​

​លោក​​​ស៊ាន​ បូរ៉ាត​​ ក៏​បាន​លើក​ឡើង​​​​ពីការ​យក​ចិត្ត​ទុក​ដាក់​របស់​សម្តេច​​អគ្គ​​មហា​សេនា​បតី​តេ​ជោ​ ហ៊ុន សែន​​ ​នាយក​រដ្ឋមន្ត្រី​​នៃ​ព្រះ​រាជា​​ណា​ចក្រ​កម្ពុជា​​​​​ ដែល​បច្ចុប្ប​ន្ន​​​​​បាន​និង​កំពុង​តែ​​ធ្វើ​​​ពលិកម្ម​​​​គ្រប់​បែប​​យ៉ាង​​ក្នុង​ការ​​តស៊ូ​​​ជម្នះ​​​នូវ​គ្រប់​​​ឧបសគ្គ​​​ទាំង​អស់​​​ ដើម្បី​​បុព្វ​ហេតុ​ជាតិ​​​​ និង​ប្រជា​ជន​​ ។ ក្នុង​នោះ​​​​វិស័យ​កីឡា​​​ក៏​បាន​លើក​​​កម្ពស់​​​​ឱ្យ​កាន់​តែ​​ផុល​ផុស​​​​ផង​ដែរ​​​​តាម​រយ​ៈ​​បំផុត​​​​​​ប្រជា​ពល​រដ្ឋ​​​​ឱ្យ​​​​​លេង​កីឡា​​​​​ដើម្បី​សុខ​ភាព​​​ និង​មិត្ត​​​​ភាព ។​​​​លោក​ប៊ុន​​ សុខ​​​ បាន​​សម្តែង​​​​នូវ​ការ​​កោត​សរសើរ​​​​ និ​ង​គាំ​ទ្រ​​​ចំពោះ​រាល់​ការ​​​​ប្តេជ្ញា​​​​​ចិត្ត​របស់​​​​សមាជិក​គណៈ​​កម្មា​ធិការ​​​​ប្រតិ​បត្តិ​​​​អាណ​ត្តិ​​​ថ្មី​ ហើយ​លោក​​​​សង្ឃឹម​​​​ថា​អ្វី​ៗ​​នឹង​មាន​ភាព​ល្អ​​​​ប្រសើរ​ជាង​មុន ៕   

កីឡាជាតិ

អត្រាប្តូរប្រាក់

អត្រាប្តូរប្រាក់ផ្សេងទៀត

Live

Sponsored News

To Top

ការស្ទង់មតិគេហទំព័រថ្មី




សូម​អរគុណ