រាជធានីភ្នំពេញ ៖ ក្រុមមន្ត្រីក្រសួងសាធារណៈការ និងដឹកជញ្ជូន និងមន្ត្រីមន្ទីរសាធារណៈការរាជធានី ភ្នំពេញ បានកោតសរសើរដល់ម្ចាស់ក្រុមហ៊ុនឃ្វីនលី ហ្គើស៊ីគ្រុប ខូអិលធីឌី
រាជធានីភ្នំពេញ ៖ ក្រុមមន្ត្រីក្រសួងសាធារណៈការ និងដឹកជញ្ជូន និងមន្ត្រីមន្ទីរសាធារណៈការរាជធានី ភ្នំពេញ បានកោតសរសើរដល់ម្ចាស់ក្រុមហ៊ុនឃ្វីនលី ហ្គើស៊ីគ្រុប ខូអិលធីឌី ដែលបានសហការណ៍ និងគោរពតាមការណែនាំរបស់ក្រសួងសាធារណៈការ និងដឹកជញ្ជូនចំពោះការស្មគ្រ័ចិត្ត កាត់ទ្រុងរថយន្តដែលខុសលក្ខណៈបច្ចេកទេសដោយម្ចាស់ក្រុមហ៊ុនបានជួលជាងឲ្យមកផ្សារកាត់ទ្រុងដែលត ខុសបច្ចេកទេសចេញនៅចំពោះមុខមន្ត្រីជំនាញ និងផ្តល់កិច្ចសហការណ៍ល្អប្រសើរជាមួយមន្ទីរសាធារណៈការ និងដឹកជញ្ជូនរាជធានីភ្នំពេញ។
ក្រុមហ៊ុនឃ្វីនលីហ្គើស៊ីគ្រុប ជាក្រុមហ៊ុនដឹកជញ្ជូនមួយដែលមានរថយន្តធុនធំសម្រាប់ ដឹកជញ្ជូនទំនិញចំនួន៧០គ្រឿងដែលមានទីតាំងនៅស្ថិតក្នុងខណ្ឌដង្កោ។ ក្រោយធ្វើការ ត្រួតពិនិត្យ គេឃើញមានរថយន្តតទ្រុងខុសបច្ចេកទេសចំនួន១០គ្រឿងក្នុងចំណោម៧០ គ្រឿង ដោយម្ចាស់ក្រុមហ៊ុនបានជួលជាងឲ្យមកកាត់ទ្រុងដែលតខុសបច្ចេកទេសនោះ ចេញដោយស្មគ្រ័ចិត្ត។ លោកស្រី បុប្ផា ផានី អនុប្រធានមន្ទីរសាធារណៈការ និងដឹកជញ្ជូន រាជធានីភ្នំពេញបានលើកឡើងថា នេះជាគំរូមួយដ៏ល្អប្រពៃសម្រាប់ក្រុមហ៊ុនដទៃទៀតចូលរួមគោរព និងអនុវត្តតាមការណែនាំរបស់ក្រសួងសាធារណៈការ សាលារាជធានីភ្នំពេញ ក៏ដូចជាមន្ទីរសាធារណៈការ និងដឹកជញ្ជូនក្នុងគោលបំណងអនុវត្តឲ្យបានល្អប្រសើរ ការគោរពច្បាប់ចរាចរ កាត់បន្ថយគ្រោះថ្នាក់ចរាចរ និងលើកកម្ពស់សណ្តាប់ធ្នាប់របៀបរៀបរយ សាធារណៈតាមដងផ្លូវផងដែរ។
លោកស្រីអនុប្រធានមន្ទីរបានបន្តថា រយៈពេល៣ខែ នៃការប្រកាសជូនដំណឹងឲ្យម្ចាស់រថយន្តកែឆ្នៃខុសបទដ្ឋានបច្ចេកទេស បានបញ្ចប់ហើយ ពោលគឺជូនដំណឹងតាំងពីខែមិថុនា ឆ្នាំ២០១៦មកម្លេះ ដើម្បីឲ្យម្ចាស់រថយន្តធ្វើការកែលម្អឲ្យបានត្រឹមត្រូវឡើងវិញ។ ផ្ទុយទៅវិញបើម្ចាស់រថយន្តមិនកែតំរូវទេ សមត្ថកិច្ចនឹងមានវិធានការកាត់ទ្រុងរថយន្តនោះចេញ និងផាកពិន័យថែមទៀត ហើយការងារនេះយើងបន្តធ្វើ ថែមទៀត ពិសេសអនុវត្តទៅលើរថយន្តធំចូលក្រុងដែលតែងបង្កឲ្យបាត់សណ្តាប់ធ្នាប់ និងការកកស្ទះចរាចរយ៉ាងខ្លាំងក្នុងក្រុងសព្វថ្ងៃ៕
ចែករំលែកព័តមាននេះ