ជាច្រើនលើក រឿងដែលល្អនៅក្នុងជីវិត ទោះជាបានមកដោយទទេៗក្តី ប៉ុន្តែក៏មិនមានន័យថា មិនត្រូវការប្រើពេលវេលា និងសេចក្តីព្យាយាមសម្រាប់ប្តូរជាមួយរឿងទាំងនោះឡើយ ជាពិសេស គឺការរៀននូវជំនាញផ្សេងៗ
ជាច្រើនលើក រឿងដែលល្អនៅក្នុងជីវិត ទោះជាបានមកដោយទទេៗក្តី ប៉ុន្តែក៏មិនមានន័យថា មិនត្រូវការប្រើពេលវេលា និងសេចក្តីព្យាយាមសម្រាប់ប្តូរជាមួយរឿងទាំងនោះឡើយ ជាពិសេស គឺការរៀននូវជំនាញផ្សេងៗដែលសំខាន់ក្នុងជីវិត ទោះបីជាហត់នឿយច្រើនប៉ុនណា ប៉ុន្តែក៏ចាត់ទុកថា ជាការវិនិយោគដែលសមនឹងតម្លៃ ។ សំណួរ តើជំនាញដែលលំបាកនឹងរៀន ប៉ុន្តែបង្កើតប្រយោជន៍ និងមានតម្លៃពេញមួយជីវិតនោះ គឺអ្វីខ្លះ ?
១-ការគ្រប់គ្រងពេលវេលា ៖
មួយក្នុងចំណោមជំនាញទាំងនេះ ដែលមានតម្លៃខ្ពស់បំផុតសម្រាប់អ្នក និងអ្នកជំនួញលំដាប់ពាន់លាននោះ គឺការគ្រប់គ្រងពេលវេលាឱ្យមានប្រសិទ្ធភាពខ្ពស់បំផុត ព្រោះគ្រប់វិនាទីរបស់ពួកគេ គឺជាមាសប្រាក់ ។ ជំនាញទាំងនេះនឹងមកជាមួយការហ្វឹកហាត់វិន័យក្នុងជីវិតរបស់ខ្លួន ដោយដាក់ផែនការអ្វីដែលត្រូវធ្វើតាំងពីរឿងតូចតាចឡើងទៅ រហូតដល់មុខជំនួញនានាថា តើធ្វើដូចម្តេចដើម្បីចាត់ការរឿងដែលត្រូវធ្វើឱ្យសម្រេចក្នុងពេលកំណត់ទុក ។
២-គិតវិជ្ជមានជាមួយខ្លួនឯង ៖
មិនសំខាន់ទេថា អ្នកណានឹងមើលមកអ្នកដូចម្តេច ប៉ុន្តែអ្វីដែលសំខាន់ គឺអ្នកមើលលើខ្លួនឯងបែបណា ។ ជំនាញនេះអាចប្រើដើម្បីបង្កើតភាពជឿជាក់លើខ្លួនឯង សម្លឹងទៅរឿងល្អៗដែលកំពុងមាន ដោយប្រើអ្វីវាជាកម្លាំងរុញច្រាន និងតស៊ូជាមួយបញ្ហា ។ ចុងក្រោយបំផុត នឹងគ្មានបញ្ហាអ្វីមកបំផ្លាញអ្នកយ៉ាងពិតប្រាកដ ។
៣-យល់ពីគំនិតអ្នកដទៃ ៖
ការឈ្វេងយល់ពីអ្នកដទៃចាត់ទុកជារឿងមួយទៀតនៃសមត្ថភាពរបស់បុគ្គល មិនថាអ្នកដទៃមានអារម្មណ៍បែបណា ឬត្រូវការអ្វី ។ ប្រសិនបើអ្នកជាអ្នកដឹកនាំ ការដែលបានយល់ពីកូនចៅនៅក្នុងក្រុម នឹងជួយដល់ក្រុមនោះឱ្យមានភាពម៉ឺងម៉ាត់ រួមទាំងជំរុញដល់បុគ្គលិកក្នុងក្រុមអាចព្យាយាមធ្វើរឿងផ្សេងៗបានកាន់ល្អឡើងផងដែរ ។
៤-សុំជំនួយ ៖
នៅពេលកើតបញ្ហា ឬត្រូវការការជួយសង្គ្រោះពីអ្នកណាម្នាក់ មនុស្សជាច្រើនតែងតែមិនហ៊ានប្រាប់ ។ អ្នកខ្លះខ្លាចត្រូវគេមើលថា ជាមនុស្សទន់ជ្រាយ ឬខ្វះសមត្ថភាព ។ ប៉ុន្តែតើដឹងឬទេថា ការពិត ការសុំឱ្យមានការជួយ គឺជារឿងល្អ ដែលអ្នកអាចរៀនពីសមត្ថភាព ភាពឈ្លាសវៃ និងជំនាញរបស់ពួកគេដែលផ្ទេរមកឱ្យអ្នក ដើម្បីឱ្យអ្នកបានរៀនសូត្រនូវអ្វីថ្មី ។ ការសុំជំនួយសង្គ្រោះ គឺជាជំនាញមួយទៀតដែលអ្នកគួរតែមានជាប់ខ្លួន និងមិនចាំបាច់ខ្មាសអៀន ។
៥-ដឹងថានៅពេលណាគួរនិយាយ ៖
មួយក្នុងចំណោមរឿងដែលពិបាកបំផុត គឺការរំងាប់ភាពក្រេវក្រោធ ។ មនុស្សខ្លះតែងនិយាយនូវអ្វីដោយមិនបានគិតពិចារណាឱ្យល្អជាមុន ខណៈកំពុងមានអារម្មណ៍ខឹង និងមិនពេញចិត្ត ។ ការនិយាយអ្វីមួយក្នុងពេលនោះអាចធ្វើឱ្យមានផលអាក្រក់តាមមកជាច្រើន ។ ដូច្នេះ ការលាក់ទុកនូវរឿងដែលត្រូវនិយាយជាមុន និងឱ្យពេលវេលាជួយសម្រេចចិត្តថា គួរតែនិយាយរឿងនោះចេញមកឬទេ ។ វានឹងល្អជាងការដែលអ្នកនិយាយចេញមក ហើយសោកស្តាយនៅពេលក្រោយ ។ ជំនាញនេះ ទោះបីជាធ្វើដោយលំបាក ប៉ុន្តែប្រសិនបើអ្នកធ្វើបាន វានឹងអាចជួយចាត់ការជាមួយអារម្មណ៍ផ្សេងៗយ៉ាងល្អបំផុត ៕
ចែករំលែកព័តមាននេះ