ព័ត៌មាន​ជាតិ » បរិយាយថ្ងៃនេះ

គោ​ដំបៅ​ខ្នង ?

ដោយ ៖ សហការី   

ថ្ងៃពុធ ទី២១ ខែធ្នូ ឆ្នាំ២០១៦ ម៉ោង ១០:០៧   (21-12-2016 10:07)

កន្លង​មក​មាន​អ្នកកាសែត​ច្រើន​នាក់​មក​ហើយ​...​ច្រើន​តែ​ជា​អ្នកកាសែត​ដែល​គេ​មិនសូវ​ស្គាល់​...​កាសែត​មិនសូវ​ឃើញបោះពុម្ពផ្សាយ​...​មានទោស​ត្រូវឃាត់ខ្លួន​...​ជាប់ចោទ​រឿង​ដាក់កុងត្រូល​ត្រូ​ត​ពិនិត្យ​...​បទល្មើសនានា​តាម​ផ្លូវគោក ផ្លូវទឹក​...ជំរិត​ទារប្រាក់​ជា​ថ្នូរ​មិន​ចុះផ្សាយ​...​។ មានអី​ផ្សាយ បើ​កាសែត​មាន​តែ​ឈ្មោះ​...​។

អ្នកកាសែត​ខ្លះទៅ​ដាក់កុង​ត្រូល​ខ្លួនឯង​...​ជួនកាល​បើករថយន្ត​ដេញចាប់​...​ដេញ​ស្ទាក់​...​ដេញ​ថត​នូវ​សកម្មភាព​បទល្មើស​...​ដែល​ពួក​គេ​យល់​ថា​...​ដឹក​ជញ្ជូន​ដោយ​ខុសច្បាប់​...​ដូច​ជា​ដឹកឈើ​...​ដឹក​ទំនិញ​សំពីងសំពោង​គេចពន្ធ​...​ដឹក​ជ្រូក គោ ក្របី​...​ដឹក​ម៉ូតូ​ជជុះ​គេចពន្ធ ។​ល​។

មាន​អ្នកកាសែត​ខ្លះ​ទៀត​មិន​ទៅ​ដាក់កុង​ត្រូល​ខ្លួនឯង​ទេ​...​ច្រើន​តែ​ចូលរួម​ជាមួយ​បណ្តា​កុងត្រូល​របស់​រដ្ឋ​...​កុងត្រូលជជុះ​របស់​មន្ត្រី​...​ដើរ​ស្រប​ជាមួយ​មន្ត្រី​កុងត្រូល​...​បើ​មន្ត្រី​កុងត្រូល​បាន​ស៊ី​ចុក​បុក​ទំពា​...​អ្នកកាសែត​នោះ​ក៏​មិន​អត់​ដែរ​...​គេ​ហុច​ខ្លះ​គ្រាន់​ទិញ​ប្រេងសាំង បាន​បាយ​កញ្ចប់​...​បាន​ទាំង​រូបថត​...​បាន​ទាំង​ដំណឹង​ឬ​អត់​...​គឺ​មាន​គ្រប់​ស្រមោល​...​។

បើ​ទៅ​ដាក់កុង​ត្រូល​ស្ងាត់​ៗ​ខ្លួនឯង​...​មន្ត្រី​កុងត្រូល​ម្ចាស់​ទឹកដី​មិន​សប្បាយចិត្ត​ទេ​...​ព្រោះ​គេ​រត់ការ​បើកផ្លូវ​ហើយ​...​ឯង​អី​ក៏​ថ្លើមធំ​ម្ល៉េះ ហ៊ាន​មក​រំខាន​ម៉ូយ​អញ​...
បើ​ទៅ​ដាក់កុង​ត្រូល​លាយ​ជាមួយ​មន្ត្រី​...​ពេល​ខ្លះ​ក៏​គេ​មិន​ពេញចិត្ត​ដែរ​...​ព្រោះ​អ្នកកាសែត​ច្រើន​តែ​មាត់ដាច​...​បាន​គេ​ឱ្យ​ស៊ី​ឱ្យ​ចុក​បុក​ទំពា​ហើយ​...​មិន​នៅ​ស្ងៀម​ទេ​...​យក​មក​ផ្សាយ​ឱ្យ​ខូច​ឈ្មោះ​គេ​អស់​...​ព្រោះ​ពេល​ខ្លះ​គេ​ស៊ី​...​ពេល​ខ្លះ​គេ​ចាប់​យក​ស្នាដៃ ។

អ្នកកាសែត​ចាំតែ​ខុស​...​ចាំតែ​ត្រូវ​គេ​ជេរ​ប្រមាថ​...​បើ​គេ​ស៊ី គេ​មិន​ឱ្យ​នៅ​ក្បែរ​ទេ​...​គេ​អត់​ហៅ អត់​ប្រាប់​ឱ្យ​ដឹង​ទេ​...​តែបើ​គេ​ចាប់​យក​ស្នាដៃ គេ​តែងតែ​ហៅ​...​ហៅ​ហើយ​ហៅ​ទៀត​...​ឱ្យទៅ​ចូលរួម​ដើម្បី​ថត​ជួយ​ផ្សាយ​យកឈ្មោះ យក​ស្នាដៃ​...​ហេ ! ហេ !

សម្តេច​តេ​ជោ​ស្រែក​ប៉ុណ្ណេះ​ហើយ​...​គឺជា​សំឡេង​រាជសីហ៍​...​សូមអ្នក​កាសែត​ដាច់ដាប​...​អ្នកក្រ​សែត​ទាំងឡាយ​...​ប្រយ័ត្ន​ប្រាណ​ឱ្យ​ហើយ​...​ជា​ពិសេស​នៅ​ព្រំដែន​វៀតណាម ស្រុក​ស្នួល ខេត្តក្រចេះ ។

បើ​គេ​ធ្លាប់​ស្រឡាញ់​រាប់អាន​...​ទោះ​ខុស​ក៏​គេ​មិន​យកទោស​ពៃរ៍​អី​ដែរ​...​ក៏​គេ​មិន​តាម​ចងកម្ម​ដែរ​...​ប៉ុន្តែ​បើ​កន្លង​មក​ធ្លាប់​ធ្វើ​ឱ្យ​គេ​ខូច​ឈ្មោះ​...​ធ្លាប់​វ៉ៃ​ចាន វ៉ៃ​ឆ្នាំងបាយ​គេ​...​សូមកុំ​ប្រហែស​...​បើ​ហ៊ាន​ទៅ​ថត ទៅ​ជិត​គេ​...​សូម​ប្រយ័ត្ន​ជាប់ចោទ​...​ព្រោះ​រឿង​វ៉ៃ​ខ្នោះ​ផុយ​ណាស់ ! មាន​ម្ចាស់​ទឹក ម្ចាស់​ដី​...​ម្ចាស់​ព្រៃឈើ​ខ្លះ​នោះ​...​ប្រៀប​ដូច​គោ​ដំបៅ​ខ្នង​...​។

រីឯ​អ្នកកាសែត​ខ្លះ​ទៀត​...​ប្រៀប​ដូច​ក្អែក​...​ប្រៀប​ដូច​រុយ​...សូម​ផ្តាំ​ទុក បើ​ទីណា​មាន​គោ ក្របី​ដំបៅ​ខ្នង​...​មាន​ដង្កូវ​ចោះ​ហើយ​...​ក្អែក​រុយ​ទាំងឡាយ​កុំពូកែ​ហើរ​ហោះ​ទៅ​ទីនោះ​...​ប្រយ័ត្ន​គោ​ធាក់ គោ​វ៉ៃ​កន្ទុយ​...​ព្រោះ​គេ​មាន​ខ្នោះ​...​ទុក​ឱ្យ​ពុកផុយ​ទៅ​ចុះ គ្មាន​ពេទ្យ​ណា​ព្យាបាល​ទេ​...​ទុក​ឱ្យ​រលាយ​ទាំងអស់​គ្នា​ទៅ​ហោង​...​ហេ ! ហេ !
            អា​ឡេវ