ខេត្តឧត្តរមានជ័យ ៖ ព្រះសង្ឃចំនួន១៧អង្គ រួមទាំងភិក្ខុសង្ឃ និងនេន ត្រូវបានបញ្ជូនទៅសង្គ្រោះនៅមន្ទីរពេទ្យបង្អែកស្រុកអន្លង់វែង បន្ទាប់ពីព្រះអង្គមានអាការៈក្អួតចង្អោរ តឹងទ្រូង ថប់ដង្ហើម និងទន់ដៃជើង រហូតដល់មានព្រះសង្ឃខ្លះ បានសន្លប់ទៀត ដែលជំហានដំបូង សង្ស័យអាចមកពីពុលតែគុជ និងស្ករ.ស ។
ហេតុការណ៍នេះបង្កការភ្ញាក់ផ្អើលវេលាយប់ថ្ងៃទី២០ ធ្នូ ស្ថិតនៅវត្តស្រែល្អ ក្នុងភូមិស្រែល្អ ឃុំបាក់អន្លូង ស្រុកត្រពាំងប្រាសាទ ខេត្តឧត្តរមានជ័យ ដែលព្រះសង្ឃចំនួន១៧អង្គបានឆាន់ភេទជ្ជៈតែគុជលាយនឹងស្ករសរ ក៏កើតមានអាការៈពុលជាបន្តបន្ទាប់ រហូតដល់មានព្រះសង្ឃចំនួន១១អង្គ ដែលមានអាការៈពុលធ្ងន់ ត្រូវបញ្ជូនទៅសង្គ្រោះបន្ទាន់ នៅមន្ទីរពេទ្យបង្អែកស្រុកអន្លង់វែង ហើយក្នុងនោះក៏មានព្រះសង្ឃ៣អង្គ មានអាការៈធ្ងន់ធ្ងររហូតដល់សន្លប់ ។
ព្រះសង្ឃមួយអង្គបានមានថេរដីកាថា នៅប្រហែលជាម៉ោង៥ល្ងាចនោះ ព្រះសង្ឃចំនួន១៧អង្គបានជាវតែគុជពីអ្នកភូមិដឹកលក់តាមម៉ូតូ ហើយបានយកទៅឆាន់លាយនឹងស្ករ.ស ហើយក្រោយពីឆាន់រួច ប្រហែលជា១ម៉ោងក្រោយមក ក៏ស្រាប់តែមានលោកនេនតូចៗ២ ទៅ៣អង្គប៉ុណ្ណោះ ដែលមានអាការៈក្អួតចង្អោរ តឹង ទ្រូង ថប់ដង្ហើម និងទន់ដៃ ហើយក្រោយមកទៀត ក៏មានព្រះសង្ឃជាអង្គ នៅក្នុងវត្តទាំងអស់កើតមានអាការៈដូចគ្នា ជាបន្តបន្ទាប់ចំនួន១៧អង្គ និងមានព្រះសង្ឃខ្លះសន្លប់ទៀតផង ហើយមាន ៣អង្គប៉ុណ្ណោះ មិនបានកើតអ្វី ដោយសារគ្មានបច្ច័យជាវតែគុជឆាន់ ។
លោកអ៊ិន កាយ អធិការនគរបាលស្រុកត្រពាំងប្រាសាទ បានប្រាប់តាមទូរស័ព្ទថា ករណីពុលនេះ សមត្ថកិច្ចមិនទាន់រកឃើញ អំពីមូលហេតុបានទេ ពីព្រោះបើមូលហេតុ តែគុជ ដែលព្រះសង្ឃឆាន់បានជាវពីអ្នកជិះម៉ូតូលក់ ក៏ត្រូវតែមានអ្នកភូមិផ្សេងទៀត ទិញហូបពុលដែរ ។ ហើយបើសិនជាមូលហេតុពុល មកពីស្ករ.ស តែព្រះសង្ឃចំនួន៣អង្គ ដែលបានឆាន់ក៏គ្មានអាការៈអ្វីទាំងអស់។
លោកបន្ថែមថា នៅពេលនេះ សមត្ថកិច្ចកំពុងតែប្រមូលតែគុជ និងស្ករ.សយកទៅធ្វើការត្រួតពិនិត្យហើយ ។
ចែករំលែកព័តមាននេះ