អនុប្រធានគណបក្សភ្លើងទៀនលោក សុន ឆ័យ អមដោយលោក ជួង ជូងី មេធាវីការពារក្តី បានចូលខ្លួនកាន់ទៅសាលាដំបូងរាជធានីភ្នំពេញ ដើម្បីឆ្លើយបំភ្លឺជុំវិញលើបណ្តឹងរបស់លោក
រាជធានីភ្នំពេញ ៖ អនុប្រធានគណបក្សភ្លើងទៀនលោក សុន ឆ័យ អមដោយលោក ជួង ជូងី មេធាវីការពារក្តី នាព្រឹកថ្ងៃទី១៥ ខែកក្កដា បានចូលខ្លួនកាន់ទៅសាលាដំបូងរាជធានីភ្នំពេញ ដើម្បីឆ្លើយបំភ្លឺជុំវិញលើបណ្តឹងរបស់លោក គី តិច មេធាវីគណបក្សប្រជាកម្ពុជា ដែលបានប្តឹង លោក សុន ឆ័យ អនុប្រធានគណបក្សភ្លើងទៀន ពាក់ព័ន្ធការចោទ និងបំភ្លៃជុំវិញដំណើរការបោះឆ្នោតជ្រើសរើសក្រុមប្រឹក្សាឃុំ-សង្កាត់ អាណត្តិទី៥ ដែលស្នើសុំឲ្យតុលាការផ្តន្ទាទោសតាមច្បាប់ និងទាមទារសំណងជំងឺចិត្ត៤ ពាន់លានរៀល ។
តាមពាក្យបណ្តឹងដែលបានដាក់ចូលទៅអយ្យការអមសាលាដំបូងរាជធានីភ្នំពេញ កាលពីថ្ងៃទី១៤ ខែមិថុនា ឆ្នាំ២០២២ លោក គី តិច មេធាវីតំណាងឱ្យគណបក្សប្រជាជនកម្ពុជា បានរំលេចនូវពាក្យសម្តីមួយចំនួនរបស់លោក សុន ឆ័យ ក្នុងបទសម្ភាសន៍ជាមួយបណ្តាញព័ត៌មាន ។
សម្តីក្នុងបទសម្ភាសន៍ទាំងនោះ ត្រូវបានលោកមេធាវីចាត់ទុកជាអំពើទុច្ចរិត បំភ្លៃខុសពីការពិត ជាការផ្តល់ព័ត៌មានក្លែងក្លែង ក្នុងចេតនាទម្លាក់កំហុសដោយអសុទ្ធចិត្ត និងមូលបង្កាច់នាំឱ្យប៉ះពាល់យ៉ាងធ្ងន់ធ្ងរដល់កិត្តិយសរបស់គណបក្សប្រជាជនកម្ពុជា ដែលជាគណបក្សឈ្នះឆ្នោត ។
ពាក្យបណ្តឹងលោកមេធាវី គី តិច បានស្នើសុំឱ្យព្រះរាជអាជ្ញា នៃអយ្យការអមសាលាដំបូងរាជធានីភ្នំពេញ ពិនិត្យចោទប្រកាន់ និងផ្តន្ទាទោសលើឈ្មោះ សុន ឆ័យ តាមបញ្ញត្តិច្បាប់ និងទាមទារសងសំណងជំងឺចិត្តនៃការខូចខាតជូនគណបក្សប្រជាជនកម្ពុជា ចំនួន៤ពាន់លានរៀលថែមទៀតផង ។
មកដល់ពេលនេះលោក សុន ឆ័យ បានទទួលរងបណ្តឹងចំនួន២ គឺទី១- បណ្តឹងពីបទ បរិហា.រកេរ្តិ៍ជាសាធារណៈ របស់គណៈកម្មាធិការរៀបចំការបោះឆ្នោត ហៅថា គ.ជ.ប ដែលប្តឹងស្នើឲ្យតុលាការផ្តន្ទាទោសលោក សុន ឆ័យ តាមមាត្រា ៣០៥ នៃក្រមព្រហ្មទណ្ឌ និងស្នើឲ្យលោក សុន ឆ័យ ធ្វើលិខិតសុំទោសជាសាធារណៈ ។ និង បណ្តឹងទី២- គឺប្តឹងដោយលោក គី តិច មេធាវីគណបក្សប្រជាជនកម្ពុជា ប្តឹងពាក់ព័ន្ធការចោទ និងការបំភ្លៃព័ត៌មានជុំវិញដំណើរការ បោះឆ្នោតជ្រើសរើសក្រុមប្រឹក្សាឃុំ-សង្កាត់ អាណត្តិទី៥ ដែលបណ្តឹងនេះមេធាវីបានទាមទារសំណងជំងឺចិត្តចំនួន ៤.០០០ លានរៀល ស្មើ ១លានដុល្លារអាមេរិក ។
នៅព្រឹកថ្ងៃនោះដែរ នៅមុខបរិវេណសាលាដំបូងរាជធានីភ្នំពេញ ក៏មានសមាជិកគណបក្សភ្លើងទៀនប្រមាណ៥០នាក់ ដែលមកពីរាជធានីភ្នំពេញ ខេត្តកណ្តាល បន្ទាយមានជ័យ (នេះបើតាមរបាយការណ៍របស់សមត្ថកិច្ចមូលដ្ឋាន) ដែលបានមកគាំទ្រ និងតាមឃ្លាំងមើលលោក សុន ឆ័យ ត្រូវបានស្ថាប័នអយ្យការកោះហៅមកសាកសួរនោះ ។
សំណុំរឿងនេះ បានស្ថិតនៅលោក ប្លង់ សុផល ព្រះរាជអាជ្ញារង តំណាងអយ្យការអមសាលាដំបូងរាជធានីភ្នំពេញ បើកការស៊ើបសួរ និងក្រោយពីសាកសួរតំណាងអយ្យការ ក៏បានអនុញ្ញាតិឲ្យលោក សុន ឆ័យ វិលត្រឡប់ទៅវិញ ។ លុះពេលចាកចេញលោក សុន ឆ័យ បានផ្តល់បទសម្ភាសន៍ជាមួយអ្នកកាសែតមួយសន្ទុះ ទើបបែកផ្លូវគ្នា ៕
ចែករំលែកព័តមាននេះ