តុលាការបដិសេធបណ្តឹងសុំនៅក្រៅឃុំរបស់អតីតលោកផ្កាយ៣ ឌួង ងៀប
- ភ្នំពេញ
ដូចការគ្រោងទុក ចៅក្រមជំនុំជម្រះសាលាដំបូងរាជធានីភ្នំពេញ នារសៀលថ្ងៃ៧ ខែកក្កដា ឆ្នាំ២០២២ បានប្រកាសសាលក្រមលើបណ្តឹងសុំនៅក្រៅឃុំរបស់លោក ឌួង ងៀប ដោយ
រាជធានីភ្នំពេញ ៖ ដូចការគ្រោងទុក ចៅក្រមជំនុំជម្រះសាលាដំបូងរាជធានីភ្នំពេញ នារសៀលថ្ងៃ៧ ខែកក្កដា ឆ្នាំ២០២២ បានប្រកាសសាលក្រមលើបណ្តឹងសុំនៅក្រៅឃុំរបស់លោក ឌួង ងៀប ដោយសម្រេចបន្តការឃុំខ្លួនដដែល រង់ចាំការជំនុំជម្រះលើអង្គសេចក្តី ។
សាលក្រមបានប្រកាសដោយកំបាំងមុខជនជាប់ចោទ(ឌួង ងៀប) ដែលមិនត្រូវបានអនុរក្សពន្ធនាគារនាំមកស្តាប់ការប្រកាសសាលក្រមនេះទេ តែចាត់ទុកចំពោះមុខដោយសារមានមេធាវីការពារក្តីដោយអាណត្តិ បានចូលរួមស្តាប់សវនាការនេះដែរ ។
កាលពីរសៀលថ្ងៃទី៥ ខែកក្កដា ឆ្នាំ២០២២ តុលាការបានលើកយកបណ្តឹងសុំនៅក្រៅឃុំរបស់អតីតផ្កាយ៣ ឌួង ងៀប មកបើកសវនាការតាមការស្នើសុំរបស់ជនត្រូវចោទ មុនជំនុំជម្រះលើអង្គសេចក្តី ប៉ុន្តែចៅក្រមជំនុំជម្រះមិនទាន់ប្រកាសសាលក្រមភ្លាមៗនៅឡើយទេ ដោយបានកំណត់យកថ្ងៃទី៧ ខែកក្កដា ជាថ្ងៃប្រកាសឱ្យនៅក្រៅឃុំ ឬមិនឱ្យ ។
សូមជម្រាបថា លោក អ៊ឹម វណ្ណៈ ចៅក្រមស៊ើបសួរសាលាដំបូងរាជធានីភ្នំពេញ កាលពីរសៀលថ្ងៃទី១៤ ខែកុម្ភៈ ឆ្នាំ២០២២ បានសម្រេចឃុំខ្លួនលោក ឌួង ងៀប ដែលជាអគ្គលេខាធិការរង នៅក្រសួងមហាផ្ទៃ ដាក់ពន្ធនាគារប៉េហ្ស៊ីជាបណ្តោះអាសន្ន ក្រោមការចោទប្រកាន់ពីបទឆបោក និងមិនបំពេញកាតព្វកិច្ចចំពោះឧបករណ៍អាចជួញដូរបាន(សែកស្អុយ) ។
លោកផ្កាយ៣ ឌួង ងៀប បានត្រូវនគរបាលការិយាល័យព្រហ្មទណ្ឌកម្រិតស្រាលរាជធានីភ្នំពេញ ឃាត់ខ្លួននៅមុខសណ្ឋាគារ ដឺគ្រី ផ្លូវឌួង ងៀប សង្កាត់អូរបែកក្អម ខណ្ឌសែនសុខ រាជធានីភ្នំពេញ កាលពីវេលាម៉ោងប្រមាណ៩ និង៣០នាទីព្រឹកថ្ងៃទី១៤ ខែកុម្ភៈ ឆ្នាំ២០២២ តាមដីកាបង្គាប់ឲ្យនាំខ្លួនរបស់តុលាការ ។
ដីកាបង្គាប់ឲ្យចាប់ខ្លួនរបស់ចៅក្រមស៊ើបសួរសាលាដំបូងរាជធានីភ្នំពេញ បានបញ្ជាក់ថា ក្រោយពីបានពិនិត្យលើសំណុំរឿងចប់សព្វគ្រប់ យល់ឃើញថា ជនត្រូវចោទឈ្មោះ ឌួង ងៀប ភេទប្រុស អាយុ៥៥ឆ្នាំ ជាមន្ត្រីរាជការ មានទីលំនៅផ្ទះលេខ០៣ ផ្លូវ ឌួង ងៀប២ កែងនឹងផ្លូវដោនថោន៣ សង្កាត់អូរបែកក្អម ខណ្ឌសែនសុខ រាជធានីភ្នំពេញ ត្រូវបានចោទប្រកាន់ពីបទឆបោក និងបទមិនបំពេញកាតព្វកិច្ចចំពោះឧបករណ៍អាចជួញដូរបាន ប្រព្រឹត្តនៅរាជធានីភ្នំពេញ កាលពីអំឡុងឆ្នាំ២០១៧ និងឆ្នាំ២០១៩ ដែលបទល្មើសមានចែងឲ្យផ្តន្ទាទោសតាមបញ្ញត្តិមាត្រា ៣៧៧ និងមាត្រា ៣៧៨ នៃក្រមព្រហ្មទណ្ឌ និងមាត្រា ២៣១ នៃច្បាប់ស្តីពីឧបករណ៍អាចជួញដូរបាននិងប្រតិបត្តិការទូទាត់សងប្រាក់។ ហេតុនេះ សម្រេចបញ្ជាដល់កម្លាំងសាធារណៈឲ្យចាប់ខ្លួន និងបង្គាប់ឲ្យប្រធានពន្ធនាគារប៉េហ្សុី ទទួល និងឃុំខ្លួនឈ្មោះ ឌួង ងៀប ដើម្បីចាត់ការតាមផ្លូវច្បាប់ ។
ការចាប់ឃុំខ្លួនលោក ឌួង ងៀប គឺបន្ទាប់ពីលោកបានបង្ហោះឃ្លីបវីដេអូមួយ ពាក់ព័ន្ធកាលពីយប់ថ្ងៃទី៧ ខែកុម្ភៈ ឆ្នាំ២០២២ ដោយចោទប្រកាន់សាលាដំបូងរាជធានីភ្នំពេញថា បានចាត់ការសំណុំរឿងរបស់លោកប្រែពីសទៅខ្មៅ និងចោទប្រកាន់លើរូបគាត់ថា បានឆបោកប្រាក់ពីជនជាតិចិនតៃវ៉ាន់ ដែលឃ្លីបវីដេអូនោះត្រូវបានបណ្តាញទំនាក់ទំនងសង្គមយកទៅបង្ហោះ និងមានការចែកចាយតៗគ្នា ៕
ចែករំលែកព័តមាននេះ