ខេត្តមណ្ធលគិរី ៖ ក្រុមមន្ត្រីនាយកដ្ឋានកណ្តាលនគរបាលយុត្តិធម៌របស់ក្រសួងមហាផ្ទៃ រួមជាមួយអង្គរការការពារកុមារ CPU បានធ្វើដំណើរទៅកាន់ទីក្រុងសាយហ្គន
ខេត្តមណ្ធលគិរី ៖ ក្រុមមន្ត្រីនាយកដ្ឋានកណ្តាលនគរបាលយុត្តិធម៌របស់ក្រសួងមហាផ្ទៃ រួមជាមួយមន្ត្រីអង្គរការការពារកុមារ CPU បានធ្វើដំណើរទៅកាន់ទីក្រុងសាយហ្គន ប្រទេសវៀតណាម កាលពីថ្ងៃទី០៩ ធ្នូ ២០១៦ ម្សិលមិញក្នុងគោលបំណងទំនាក់ទំនងស្នើសុំយកជនជាតិវៀតណាមឈ្មោះ ង្វៀន តាំងដុង ដែលជាជនដៃក្នុងការធ្វើទារុណកម្មគួរឱ្យរន្ធត់ខ្លោចចិត្ដមកលើក្មេងប្រុសអាយុ២ឆ្នាំ ជាកូនកម្មករខ្មែរនៅខេត្តមណ្ឌលគិរី វិលត្រឡប់មកកាន់ប្រទេសកម្ពុជា ដើម្បីប្រឈមមុខនឹងការចោទប្រកាន់តាមផ្លូវច្បាប់ក្នុងប្រទេសកម្ពុជា ។
យោងតាមប្រភពព័ត៌មានពីមន្ត្រីអង្គរការការពារកុមារ CPU បានអោយដឹងថា បន្ទាប់ពីទំនាក់ទំនង់ជាមួយនគរបាលក្រុងហូជីមិញ នៅម៉ោង៩ព្រឹកថ្ងៃទី១០ ធ្នូ នេះ ក្រុមការងារបានទៅដល់ពន្ធនាគារក្នុងខេត្តតៃនីញ ប្រទេសវៀតណាម ដើម្បីសួរយកចម្លើយពីជនសង្ស័យ ង្វៀន តាំងដុង ខ្លះថាឈ្មោះ យ៉ុង ថាញ់ ភេទប្រុស ចរិតស្រី(ខ្ទើយ) អាយុ៣៤ឆ្នាំ ជាជនជាតិវៀតណាម ។
ប្រភពដដែលបន្តថា នាយកដ្ឋានកណ្តាលនគរបាលយុត្តិធម៌បានចាត់មន្ត្រីនគរបាលចំនួន០៦នាក់ និងមន្ត្រីអង្គការការពារកុមារ CPU ចំនួន០២នាក់ ដឹកនាំដោយលោកឧត្ដមសេនីយ៍ត្រី សូ សុវណ្ណ ស្នងការរងទទួលផែនព្រហ្មទណ្ឌខេត្តមណ្ឌលគីរី ដើម្បីពង្រឹងដល់ការស្រាវជ្រាវ និងកសាងសំណុំរឿងឲ្យបានរឹងមាំ ពាក់ព័ន្ធធ្វើទារុណកម្មលើកុមារា សូ សៅ នៅខេត្តមណ្ឌលគីរី ។
ប្រភពបន្តអោយដឹងទៀតថា ក្រោយពីទំនាក់ទំនងរួច ភាគីប្រទេសវៀតណាម បានប្រជុំពិភាក្សាចរចាគ្នា ដោយអនុញ្ញាតឲ្យភាគីកម្ពុជាជួបជនសង្ស័យ ង្វៀង តាំងយ៉ុង តែមិនទាន់ប្រគល់ជនសង្ស័យនោះ មកឲ្យភាគីកម្ពុជាយកមកជំនុំជម្រះក្តី នៅតុលាការខេត្តមណ្ឌលគីរី នៅឡើយទេ ដោយរង់ចាំការពិភាក្សាគ្នា និងឲ្យអគ្គស្នងការនគរបាលជាតិកម្ពុជា ចេញលិខិតស្នើសុំជាផ្លូវការ ។ ដោយខាងភាគីវៀតណាមបញ្ជាក់ថា កម្ពុជាធ្វើបត្យាប័នពីក្រសួងមហាផ្ទៃ ដើម្បីភាគីវៀតណាម សុំគោលការណ៍ពីថ្នាក់លើ ។
បើតាមការសួរចម្លើយជនខ្ទើយនេះសារភាពថា ខ្លួនពិតជាបានប្រព្រឹត្តដូចសកម្មភាពមានក្នុងវីដេអូឃ្លីប ដែលបង្ហោះនៅលើហ្វេសប៊ុកពិតប្រាកដមែន ដោយជនសង្ស័យសំអាងថា រូបគេញៀនថ្នាំ(គ្រឿងញៀន) ។
នៅក្នុងករណីនេះ បើយោងតាមប្រភពព័ត៌មានពីនគរបាលបានបង្ហើបឲ្យដឹងថា បើកាត់ទោសនៅប្រទេសវៀតណាមវិញ ជនសង្ស័យអាចជាប់ឃុំពន្ធនាគាររយៈពេលប្រហែល៣ឆ្នាំប៉ុណ្ណោះ ។
យ៉ាងណាក៍ដោយ បើតាមអ្នកច្បាប់មួយចំនួនបានលើកឡើងថា ជនដៃដល់បើទោះបីជាជាតិសាសន៍ផ្សេង ក៍គួរតែយកមកអនុវត្តន៍ច្បាប់នៅក្នុងប្រទេសខ្មែរ ព្រោះការធ្វើសកម្មភាពប្រព្រឹត្តបទល្មើស នៅលើទឹកដីខ្មែរ ហើយជនរងគ្រោះទៀតសោត ក៍ជាជនជាតិខ្មែរដែរ ។ ម្យ៉ាងទៀត កម្ពុជា-វៀតណាមមានបត្យាប័នប្តូរអ្នកទោសជាមួយគ្នា ដែលកន្លងមក មានជនជាតិខ្មែរមួយចំនួនតូច បានទៅប្រព្រឹត្តបទល្មើសនៅក្នុងប្រទេសវៀតណាម ក៍ត្រូវសមត្ថកិច្ចវៀតណាមចាប់បញ្ចូនប្រគល់មកឲ្យអនុវត្តន៍ច្បាប់ខ្មែរ ហើយខ្មែរក៍ធ្លាប់ចាប់ជនល្មើសជនជាតិវៀតណាមប្រគល់ឲ្យអាជ្ញាធរវៀតណាមយកទៅអនុវត្តន៍តាមច្បាប់របស់គេដែរ តែករណីខាងលើទំនងជាអាជ្ញាធរវៀតណាម បារម្ភខ្លាច ប្រជាពលរដ្ឋខ្មែរកាត់ទោសក្រៅប្រព័ន្ឋតុលាការ បណ្តាលឲ្យស្លាប់ ព្រោះតែកំហឹងចំពោះអំពើដ៍ឃោរឃៅអមនុស្សធ៌មរបស់ជននេះ ទើបអាជ្ញាធរវៀតណាមមិនទាន់ប្រគល់ឲ្យកម្ពុជា ។
សូមរម្លឹកថា វីដេអូឃ្លីបពីសកម្មភាពប្រើប្រាស់ឧបករណ៍ឆក់ធ្វើទារុណកម្មលើក្មេងប្រុសឈ្មោះ សូ សៅ អាយុ២ឆ្នាំ បានកើតមានតាំងពី២ខែមុនមកម្ល៉េះ នៅលើទឹកដីខេត្តមណ្ឌលគិរី ប្រទេសកម្ពុជា ប៉ុន្តែទើបតែបែកធ្លាយដោយសារមានការបង្ហោះចែកចាយតៗគ្នា តាមបណ្តាញសង្គមហ្វេសប៊ុក ទើបឈានដល់ការចាប់ខ្លួនចាប់ខ្លួន ង្វៀន តាំងដុង នៅខណ្ឌលេខ៧ ក្រុងហូជីមិញ ប្រទេសវៀតណាម នៅវេលាម៉ោង៨យប់ថ្ងៃទី០៧ ខែធ្នូ ឆ្នាំ២០១៦ បន្ទាប់ពីជនល្មើសរូបនេះបានរត់គេចខ្លួនទៅទីនោះបានមួយថ្ងៃ ៕
ចែករំលែកព័តមាននេះ