ខេត្តកំពង់ស្ពឺ ៖ បន្ទាប់ពីផ្ទុះបាតុភាពរវាងលោកសង្ឃមួយអង្គជាមួយមាតុគ្រាម ដែលឈានទៅដល់ការរួមមេថុនគ្នារហូតមានកូនក្នុងផ្ទៃ៤ខែនោះ ពេលនេះ គណៈកម្មការអាចារ្យវត្តបាននាំគ្នាផ្តិតមេដៃសុំអន្តរាគមន៍ពីថ្នាក់ដឹកនាំហើយ ដើម្បីឱ្យមានចំណាត់ការ ។ លើសពីនេះទៅទៀត លោកតាអាចារ្យ និងគណៈកម្មការវត្តក៏បាននាំគ្នាទៅប្រាប់ឱ្យព្រះសង្ឃ១អង្គនេះត្រូវចាកចេញពីវត្ត ដោយមិនអនុញ្ញាតអោយចាំព្រះវស្សានៅក្នុងវត្តនេះទៀតឡើយ ។
ការនាំគ្នាទៅប្រាប់ឱ្យព្រះសង្ឃ១អង្គនោះ ឱ្យចាកចេញពីវត្តកើតឡើងកាលពីព្រឹកថ្ងៃទី០១ ខែកក្កដា ២០២២ នៅបរិវេណវត្តឥសីគិរីជុំ ហៅវត្តត្រពាំងប្ញស្សី ស្ថិតក្នុងឃុំទឹកល្អក់ ស្រុកគងពិសី ខេត្តកំពង់ស្ពឺ ។ លោកសង្ឃដែលត្រូវលោកតាអាចារ្យ និងគណៈកម្មការវត្តប្រាប់ឱ្យចាកចេញបានស្គាល់ព្រះនាម ម៉ៅ សៀវបុត្រាថានុន អាយុ៤១វស្សា ។
មុនពេលមានរឿងគង់នៅវត្តអីសីគីរីជុំនេះ បើទោះជាលោកតាអាចារ្យគណៈកម្មការនាំគ្នាទៅប្រាប់ឲ្យចេញពីវត្តដោយសន្តិវិធីក្តី ក៏លោកមានសង្ឃដីកាថា លោកមិនទៅណានោះទេ លុះត្រាតែមានលិខិតស្នាមតម្រូវឱ្យលោកចាកចេញទើបលោកចាកចេញ (តែចុងក្រោយលោកមានសង្ឃដីកាយ៉ាងខ្លីថា លោកនឹងចាកចេញពីវត្តនេះមួយរយៈ) ។
តែទោះជាយ៉ាងនេះក្តី ក៏លោកតាអាចារ្យគណៈកម្មការបានប្រាប់ថា គ្រប់គ្នាបានមូលមតិជាឯកច្ឆ័នមិនអនុញ្ញាតឲ្យលោកស្នាក់ ឬគង់នៅវត្តនេះទៀតឡើយ ព្រោះតែលោកសង្ឃអង្គនេះត្រូវបានក្មេងស្រីមួយរូបប្តឹងពីបទរំលោភនិងគំរាមសម្រាប់នាង។
លោកតាអៀង លី ជាប្រធានគណៈកម្មការអាចារ្យវត្តឥសីគីរីជុំបានប្រាប់អ្នកយកព័ត៌មានយើងថា ការបួសរបស់ព្រះសង្ឃអង្គនេះ មិនមានប្រវត្តិច្បាស់លាស់នោះទេ ។ ដំបូងឡើយឮថា គង់នៅវត្តមួយក្នុងស្រុកអង្គស្នួលហើយឆៃយ៉ា ក៏ត្រូវបានអនុគណៈស្រុកដកទុក សង្ស័យប្រព្រឹត្តខុសចាកធម៌វិន័យក្រោយមក ក៏មកសុំវត្តព្រៃ
កន្ទោច ស្នាក់នៅហើយក៏មានរឿងជាមួយមាតុគ្រាម(ស្ត្រីមួយរូប) តែក៏សម្របសម្រួលគ្នាចប់ទៅ ។
បន្ទាប់មក លោកគ្រូចៅអធិការវត្តព្រៃកន្ទោចលែងឲ្យគង់នៅទីនោះទៀត ក៏រត់មកសុំស្នាក់នាក់នៅវត្តឥសីគិរីជុំនេះ ។ ដោយឡែក រឿងទំនាក់ទំនងជាមួយក្មេងៗដែលយកម្ដាយមកមើលជំងឺ ហើយមានសម្ព័ន្ធភាពរហូតមានកូនក្នុងផ្ទៃម្ដងជាពីរដងនេះ គ្មាននរណាដឹងនោះទេ ទើបតែបែកធ្លាយរឿងចរចាលុយគ្នាមិនត្រូវខាងស្រីក៏ដាក់ពាក្យបណ្ដឹងនៅអធិការនគរបាលស្រុកទើបបែករឿងតែម្ដង។
បើទោះជាយ៉ាងនេះក៏ដោយ ក្នុងនាម គណៈកម្មការអាចារ្យវត្តសូមសំណូមពរដល់ថ្នាក់ដឹកនាំ និងស្ថាប័នពាក់ព័ន្ធសូមជួយអន្តរាគមន៍ក្នុងរឿងនេះផង ព្រោះលោកសង្ឃមួយអង្គនេះ ពិតជាមានះរឹងរូសណាស់ ។ ទោះបីជាខាងគណៈសង្ឃនិងអាជ្ញាធរសូត្រវិន័យឱ្យលោកសារភាពកំហុសនៅចំពោះមុខមន្ត្រីសង្ឃយ៉ាងណាក៏ដោយក៏លោកសង្ឃអោយនេះ មិនព្រមធ្វើតាមហើយបដិសេធថា ខ្លួនមិនបានប្រព្រឹត្តដែរ ។
លោកអាចារ្យបន្តទៀតថា ជាក់ស្ដែងកាលពីព្រឹកថ្ងៃទី៣០ មិថុនា ២០២២ មានការជួបជុំដោះស្រាយអធិករណ៍រវាងរូបលោកសង្ឃអង្គនេះនឹងនារីដែលរងនូវការបំពានរាងកាយ ព្រមទាំងមន្ត្រីអាជ្ញាធរគ្រប់ឋានានុក្រម ដើម្បីដោះស្រាយបញ្ចប់ គឺនារីរងគ្រោះបាននិយាយថា មុនដំបូងម្តាយនាងឈឺ ឪពុកនាងនាំមកឱ្យលោកជួយមើលហើយលោកប្រាប់ថា ត្រូវអំពើរបស់គេរួមទាំងនាងផងដែរ បើចង់ឱ្យម្ដាយជា នាងក៏ត្រូវតែមកដោះអំពើដែរ។
ហើយបើចង់ឱ្យឆាប់ជា នាងត្រូវតែបូជាខ្លួនប្រាណនាងដល់លោកសង្ឃនេះ ទើបបានជាសះស្បើយទាំងម្ដាយទាំងកូនបើមិនធ្វើដូច្នេះមើលមិនជាឡើយ ។ នៅពេលដែលក្មេងត្រីនិយាយដូច្នេះ លោកបានបដិសេធថា មិនបានប្រព្រឹត្តដូចការចោទប្រកាន់ឡើយ តែអ្វីដែលម្ដាយក្មេងស្រីរងគ្រោះនិយាយ គឺនៅពេលដែលដឹងថា រឿងនេះ លាក់មិនជិត ម៉ៅសៀវបុត្រាថានុនបាននិយាយថា តើធ្វើយ៉ាងម៉េចញោមជួយគិតអាត្មាផង យើងគួរធ្វើយ៉ាងម៉េចល្អ ហើយកុំឱ្យរឿងនេះបែកខ្ចរខ្ចាយអោយអ្នកផ្សេងដឹង ចាំអាត្មាឲ្យលុយមួយម៉ឺនដុល្លារ។
អ្វីដែលធ្វើឲ្យមានការបែកធ្លាយរឿងនេះដល់មជ្ឈដ្ឋានខាងក្រៅ គឺនៅពេលដែលតៃកុងឡានរបស់លោកបានយកលុយចំនួន5.000ដុល្លារទៅឲ្យម្ដាយក្មេងស្រីរងគ្រោះ ដោយប្រាប់ថាកុំយកច្រើនពេកយកតែ5.000$ បានហើយ ។ នៅពេលដែលចរចាមិនត្រូវគ្នានេះហើយ ទើបបែកការមកមជ្ឈដ្ឋានខាងក្រៅហើយក៏មានការទៅដាក់ពាក្យបណ្ដឹងតែម្ដង។ ក្រោយពីកើតមានរឿងបែបនេះ លោកអាចារ្យបានសម្ដែងនូវក្តីបារម្ភអំពីរឿងនេះយ៉ាងខ្លាំង បន្ទាប់រឿងបានផ្ទុះដល់មជ្ឈដ្ឋានខាងក្រៅធ្វើឲ្យប្រជាពុទ្ធបរិស័ទទាំងក្នុងនិងក្រៅស្រុកដែលធ្លាប់តែទំនុកបំរុងជួយកសាងសមិទ្ធិផលនានា ក្នុងអារាមនេះមានការអាក់អន់ស្រពន់ចិត្តអសទ្ឋាលែងមកធ្វើបុណ្យនៅទីនេះទៀតហើយការកសាងក៏មិនអាចបន្តទៅមុខបានដែរព្រោះតែរឿងលោកប្រព្រឹត្តអំពើមិនគប្បីជាមួយមាតុគ្រាម(ស្ត្រី)បែបនេះ។
ករណីនេះដែរ មន្ត្រីនៃការិយាល័យប្រឆាំងការជួញដូរ និងការពារអនីតិជនខេត្តបានប្រាប់ផងដែរថា បន្ទាប់ពីបែកខ្ចរខ្ចាយរឿងខាងជំនាញបានទៅសួរនាំលោកនៅឯមន្ទីរធម្មការ និងសាសនាខេត្តកំពង់ស្ពឺ ដោយពុំបានទទួលសេចក្តីរាយការណ៍ពីស្រុកថា មានរឿងបែបនេះកើតឡើងនោះទេ នៅពេលដែលថ្នាក់ដឹកនាំសួរនាំទៅស្រុកលោកអធិការបានឆ្លើយថា ភាគីក្មេងស្រីមិនបានដាក់ពាក្យបណ្ដឹងនៅអធិការដ្ថាននគរបាលស្រុកឡើយតែនៅពេលដែលរឿងនេះ បែកខ្ចរខ្ចាយកាន់តែធំទៅធំទៅ លោកអធិការក៏ប្រាប់ថា ក្មេងស្រីបានដាក់ពាក្យបណ្ដឹងនៅស្រុកទៅវិញ។
មន្ត្រីជំនាញបាននិយាយថា អាជ្ញាធរមូលដ្ឋានមិនគួរមើលរំលង ឬទុករឿងចោលបែបនេះនោះទេ ព្រោះរឿងអស់នេះវាពាក់ព័ន្ធទៅនឹងសាសនា បើកាលណាមានរឿងកើតឡើង ហើយលោកអធិការត្រូវរាយការណ៍មកថ្នាក់ដឹកនាំដើម្បីអោយជ្រាបពីបញ្ហា និងសុំយោបល់ដើម្បីដោះស្រាយមិនមែនលាក់រឿងទាល់តែរឿងបែកធ្លាយមកដល់ខេត្តទើបឆ្លើយម្តងថាគ្មានពាក្យបណ្ដឹងម្ដងថាមានពាក្យបណ្ដឹងបែបនេះឡើយ តែទោះជាយ៉ាងណាសមត្ថកិច្ចជំនាញនៃការិយាល័យប្រឆាំងការជួញដូរបានកសាងសំណុំរឿងនេះរួចរាល់ហើយ។
សូមរំលឹកថា ករណីព្រះសង្ឃវត្តឥស្សីគិរីជុំនេះ ផ្អើលអស់ខ្មោចនរកហើយ គឺក្រោយកើតហេតុ ជនរងគ្រោះនិងសង្ឃជាជនសង្ស័យ បានធ្វើការសម្របសម្រួលគ្នានៅទីតាំងវត្ដ ប៉ុន្តែដោយសារតែមិនអាចដំណើរការទៅបានទើបកើតជាការអន្ដរាគមន៍ផ្អើលដល់សមត្ថកិច្ចនគរបាលប៉ុស្ដិ៍ និងស្រុកគងពិសីបានចុះទៅដល់ទីតាំងវត្ត។
តាមការអះអាងពីប្រភពក្រៅផ្លូវការ គឺសង្ឃដែលជាតួអង្គប្រុសមិនព្រមទទួលយកការសំណូមពររបស់នារីនិងគ្រួសារឡើយ ។ លើសពីនោះ មានការគៀបបង្ខំពីមជ្ឈដានខាងក្រៅ និងបានរុញច្រានសភាពការណ៍ឱ្យកាន់តែជ្រៅដូចទឹកសមុទ្រ រហូតនារីរងគ្រោះនិងក្រុមគ្រួសារបានរត់មកប្ដឹងសុំអន្ដរាគមន៍អោយឯកឧត្ដមអភិបាលខេត្ដជួយដោះស្រាយ និងបានមកដល់សាលាខេត្ដកំពង់ស្ពឺ កាលពីថ្ងៃទី២៩ ខែមិថុនា ឆ្នាំ ២០២២ ។
ព័ត៌មានលម្អិតនឹងមានផ្សាយជូនបន្តលើកាសែតកោះសន្តិភាព ។
ចែករំលែកព័តមាននេះ