ខេត្តកំពង់ចាម ៖ កូនក្រមុំដែលទើបនឹងពេញវ័យ១៨ឆ្នាំ ឈ្មោះសាន ចិន្តា រស់នៅភូមិរោងចក្រ ឃុំរោងចក្រ ស្រុកចំការលើ ដែលបានបាត់ពីក្នុងផ្សារធំ ក្រុងកំពង់ចាម កាលពីវេលាម៉ោង១០ និង៣០នាទីព្រឹកថ្ងៃទី៣០ វិច្ឆិកា ២០១៦ បង្កឱ្យមានការភ្ញាក់ផ្អើលនោះ ត្រូវបានត្រឡប់មកផ្ទះវិញហើយ កាលពីរសៀលថ្ងៃទី៤ ធ្នូ ដោយអះអាងថា នាងត្រូវថ្នាំសណ្តំពីស្ត្រី២នាក់ ប៉ងយកទៅលក់ឆ្លងដែន
ខេត្តកំពង់ចាម ៖ កូនក្រមុំដែលទើបនឹងពេញវ័យ១៨ឆ្នាំ ឈ្មោះសាន ចិន្តា រស់នៅភូមិរោងចក្រ ឃុំរោងចក្រ ស្រុកចំការលើ ដែលបានបាត់ពីក្នុងផ្សារធំ ក្រុងកំពង់ចាម កាលពីវេលាម៉ោង១០ និង៣០នាទីព្រឹកថ្ងៃទី៣០ វិច្ឆិកា ២០១៦ បង្កឱ្យមានការភ្ញាក់ផ្អើលនោះ ត្រូវបានត្រឡប់មកផ្ទះវិញហើយ កាលពីរសៀលថ្ងៃទី៤ ធ្នូ ដោយអះអាងថា នាងត្រូវថ្នាំសណ្តំពីស្ត្រី២នាក់ ប៉ងយកទៅលក់ឆ្លងដែននៅប្រទេសវៀតណាម ។
អ្នកស្រី ឃីន ផល្លា អាយុ៤៥ឆ្នាំ ត្រូវជាម្តាយរបស់កូនក្រមុំបានរៀបរាប់ប្រាប់តាមទូរស័ព្ទឱ្យដឹងនៅរសៀលថ្ងៃទី០៦ ធ្នូ នេះថា កាលពីព្រឹកថ្ងៃទី៣០ វិច្ឆិកា កន្លងទៅ កូនស្រីទី៣ដែលត្រូវរៀបការ បាននាំគ្នាជិះរថយន្តឈ្មួលចេញពីស្រុកចំការលើ មកកាន់ក្រុងកំពង់ចាម ដើម្បីយករូបថតសម្រាប់តាំងនៅមុខរោងការដែលថតអស់តម្លៃ១៧០ដុល្លារនោះ ។
ដំបូង កូនមិនបានប្រាប់ថា នាំគ្នាមកក្រុងកំពង់ចាមនោះទេ ទាល់តែបាត់កូនស្រីឈ្មោះចិន្តា ទើបកូនស្រីបងឈ្មោះដានី បានទូរស័ព្ទប្រាប់គាត់ថា បានបាត់កូនប្អូនស្រី ក៏ប្រញាប់ប្រញាល់តាមរកក្នុងផ្សារ តែមិនឃើញនោះទេ ក៏មកប្តឹងប៉ុស្តិ៍រដ្ឋបាលសង្កាត់កំពង់ចាម ដើម្បីឱ្យជួយអន្តរាគមន៍ តាមរកនៅតែមិនមានពន្លឺទៀត ។
អ្នកស្រីឃីន ផល្លា ជាម្តាយកូនក្រមុំបានប្រាប់បន្តថា មានមនុស្សស្រី២នាក់ បានចាប់កូនស្រីរបស់គាត់ពីក្នុងផ្សារធំក្រុងកំពង់ចាម ដើម្បីយកឆ្លងដែនទៅលក់នៅប្រទេសវៀតណាម នៅពេលដែលកូនស្រីចិន្តា ត្រូវបានគេជូនតាមម៉ូតូ១គ្រឿង ស្របពេលដែលអ្នកឌុប បានដើរទៅទិញសំបុត្រនោះ កូនស្រីគាត់បានដឹងខ្លួនឡើងវិញ ក្រោយពីត្រូវថ្នាំសណ្តំ ក៏រត់ចុះពីលើម៉ូតូទៅបុកនិងម៉ូតូរបស់ស្ត្រីម្នាក់ក៏ប្រាប់គេឲ្យជួយផងព្រោះនាង ត្រូវបានគេចាប់ដើម្បីយកទៅលក់ ។
សំណាងល្អ ត្រូវស្ត្រីរូបនោះជួយសង្គ្រោះ ដោយនាំមកផ្ទះមួយកន្លែង តែគាត់មិនបានបញ្ជាក់ថា នៅស្រុកណាទេគ្រាន់ តែដឹងនៅជាប់នឹងប្រទេសវៀតណាម ។ ក្នុងពេលនោះ កូនស្រីបាននិយាយទូរស័ព្ទសន្ទនាជាមួយនឹងគាត់ជាម្តាយ ដោយកូនបានយំបង្ហូរទឹកភ្នែកថែមទៀត ហើយប្អូនថ្លៃប្រុសនៅរាជធានីភ្នំពេញ បានឱ្យអ្នកជួយសង្គ្រោះនោះ បាននាំកូនស្រីមកជិះរថយន្ត ឆ្ពោះមកកាន់រាជធានីភ្នំពេញ ។
រហូតមកដល់រសៀលថ្ងៃទី៤ ធ្នូ ទើបកូនបានធ្វើដំណើរមកដល់ផ្ទះ ដោយប្អូនថ្លៃជាអ្នកនាំមក ។ ចំណែកកូនកម្លោះ ក្រោយពីបានដឹងថា កូនក្រមុំដែលបាត់បានវិលត្រឡប់មកដល់ផ្ទះវិញនោះ ក៏បាននាំចាស់ទុំមកនិយាយពិភាក្សា ដោយភាគីកូនកម្លោះជាមនុស្សដែលមានចិត្តធម៌បានសុំមិនរៀបការទេ នៅថ្ងៃទី២២ ធ្នូ ខាងមុខ គឺសុំយកថ្លៃបណ្ណាការតែ៤,២៩០ដុល្លារវិញ ដើម្បីបញ្ចប់រឿង និងសុំរាប់អានគ្នាជាមិត្ត ។
អ្នកស្រីឃីន ផល្លា ម្តាយកូនក្រមុំបញ្ជាក់ថា នៅថ្ងៃអាទិត្យកន្លងទៅ កូនស្រីមិនបាននៅផ្ទះទេ គឺដោយសារតែឥទ្ធិពលថ្នាំសណ្តំមិនទាន់អស់ជាតិ ត្រូវបានប្អូនថ្លៃយកទៅព្យាបាល ដើម្បីបន្សាបនៅរាជធានីភ្នំពេញបន្តទៀត នៅពេលដែលនិយាយជួនកាលកូនស្រីត្រូវយំបង្ហូរទឹកភ្នែកផងដែរ ។
កូនស្រីគាត់ដែលរងគ្រោះនេះ នឹងឱ្យស្នាក់នៅភ្នំពេញបន្តទៀត ហើយគាត់ក៏មិនប្តឹងអ្នកដែលចាប់កូនស្រីគាត់ដែរ ព្រោះបានឃើញកូនស្រីវិញ មានចិត្តសេចក្តីត្រេកអរណាស់ ។
ចែករំលែកព័តមាននេះ