បង្ក្រាបក្រុមផលិតគ្រឿងញៀ.នមេខ្លោងវៀតណាម
រាជធានីភ្នំពេញ ៖ ជនសង្ស័យចំនួន២៥នាក់ដែលបានឃាត់ខ្លួនក្នុងករណីផ្សេងៗគ្នា ត្រូវបាននគរបាលខណ្ឌឫស្សីកែវធ្វើសន្និសីទសារព័ត៌មាន
រាជធានីភ្នំពេញ ៖ ជនសង្ស័យចំនួន២៥នាក់ដែលបានឃាត់ខ្លួនក្នុងករណីផ្សេងៗគ្នា ត្រូវបាននគរបាលខណ្ឌឫស្សីកែវធ្វើសន្និសីទសារព័ត៌មានបង្ហាញមុខជាសាធារណៈ កាលពីវេលាម៉ោង២រសៀលថ្ងៃទី៥ ខែធ្នូ បន្ទាប់ពីឃាត់ខ្លួនក្នុងរយៈពេល៣ថ្ងៃកន្លងមក ។
នៅក្នុងចំណោមនោះ មានជនសង្ស័យ៥នាក់ត្រូវបានសមត្ថកិច្ចឃាត់ខ្លួនកាលពីយប់ថ្ងៃទី៤ ខែធ្នូ និងឈានទៅឆែកឆេរទីតាំងផលិតកែច្នៃគ្រឿងញៀនមួយកន្លែង ចាប់តាំងពីវេលាម៉ោង៩និង៣០នាទីយប់ថ្ងៃដដែល រហូតដល់ម៉ោង១និង៣០នាទីរំលងអធ្រាត្រឈានចូលថ្ងៃទី៥ ខែធ្នូ នៅចំណុចផ្ទះជួលលេខ៩ ផ្លូវលេខ៣BC ក្រុមទី១ ភូមិចម្រើនផល១ សង្កាត់បឹងទំពុន ខណ្ឌមានជ័យ ព្រមទាំងដកហូតបានសម្ភារសម្រាប់ផលិតសារធាតុផ្សំ និងគ្រឿងញៀនមួយចំនួនធំ ។
ក្នុងសន្និសីទសារព័ត៌មានបង្ហាញមុខនេះលោកវរសេនីយ៍ត្រី អុីវ ឈុនផេង អធិការរងនគរបាលខណ្ឌឫស្សីកែវ បានឱ្យដឹងថា ជនសង្ស័យដែលបង្ហាញមុខនៅពេលនេះ ត្រូវបាននគរបាលខណ្ឌឫស្សីកែវស្រាវជ្រាវឃាត់ខ្លួនជាបន្តបន្ទាប់ក្នុងរយៈពេល៣ថ្ងៃ ដោយឃាត់ខ្លួនបានសរុបចំនួន២៥នាក់ក្នុងនោះមានស្រី៣នាក់ក្នុង១១ករណីផ្សេងពីគ្នា រួមមានចោរកម្ម ល្បែងស៊ីសង ជួញដួរ ផលិត និងប្រើប្រាស់គ្រឿងញៀន ។
លោកអធិការរងបន្តថា ក្នុងចំណោមជនសង្ស័យទាំង២៥នាក់ មាន៥នាក់ត្រូវបាននគរបានស្រាវជ្រាវឃាត់ខ្លួនក្នុងបទល្មើសផលិតកែច្នៃគ្រឿងញៀនគឺ ៖
១-ឈ្មោះ យ៉ុង ចាន់ហ៊ូយ៉ុង ភេទប្រុស អាយុ៣៨ឆ្នាំ ជាជនជាតិវៀតណាម ស្នាក់នៅផ្ទះជួល កន្លែងឃាត់ខ្លួនខាងលើ ។ ជននេះជាមេខ្លោងផលិតគ្រឿងញៀន ។
២-ឈ្មោះ នួន ស្រីល័ក្ខ ភេទស្រី អាយុ២៧ឆ្នាំ ស្នាក់នៅផ្ទះជួលកន្លែងឃាត់ខ្លួន
៣-ឈ្មោះ ដួង លីលី ភេទប្រុស អាយុ៤៥ឆ្នាំ មានទីលំនៅផ្ទះលេខ១០ សង្កាត់បឹងព្រលិត ខណ្ឌ៧មករា
៤-ឈ្មោះ ប៉ក់ ស្រីពៅ ភេទស្រី អាយុ២៣ឆ្នាំ ស្នាក់នៅផ្ទះជួលកន្លែងឃាត់ខ្លួនខាងលើ និង
៥-ឈ្មោះ ចាន់ ឆវី ភេទស្រី អាយុ២៧ឆ្នាំ មានទីលំនៅភូមិក្រោលគោ សង្កាត់គីឡូម៉ែត្រលេខ៦ ខណ្ឌឫស្សីកែវ ។
លោកអធិការរង បានឱ្យដឹងថា នៅក្នុងការបង្ក្រាបគ្រឿងញៀននេះ សមត្ថកិច្ចដកហូតបានថ្នាំញៀនមួយចំនួនធំដូចជា មេតាណុលចំនួន១៤ដប សារធាតុផ្សំនិងកែច្នៃសារធាតុញៀនមួយចំនួន ក្រាមពណ៌សថ្លាចំនួន២កញ្ចប់ធំ ថ្នាំពេទ្យសម្រាប់កែច្នៃធ្វើជាសារធាតុញៀនមួយចំនួន សារធាតុញៀនជាគ្រាប់ចំនួន៣កញ្ចប់ធំ សារធាតុដែលផលិតរួចមួយចំនួនធំ រួមមានប្រភេទខេ(សម្រាប់ហិត) ប្រភេទគ្រាប់(គ្រវី) ប្រភេទ wy (យ៉ាម៉ា) ប្រភេទលាយដែលផ្សំរួច(មេតំហ្វេតាមីនមួយចំនួន) ម្សៅកែច្នៃសារធាតុញៀនមួយចំនួន ជញ្ជីងថ្លឹងថ្នាំញៀន១ ឧបករណ៍សម្រាប់ប្រើប្រាស់ថ្នាំញៀនមួយចំនួន និងឧបករណ៍សម្រាប់កែច្នៃសារធាតុញៀនមួយចំនួន ។
លោកអធិការរង បានឱ្យដឹងទៀតថា ដោយមានបទបញ្ជាពីលោកវរសេនីយ៍ឯក ទៀង ច័ន្ទសារ អធិការនគរបាលខណ្ឌឫស្សីកែវ នៅវេលាម៉ោង៤ទៀបភ្លឺថ្ងៃទី៤ ខែធ្នូ សមត្ថកិច្ចបានឃាត់ខ្លួនជនសង្ស័យម្នាក់ឈ្មោះ សេន ដាយូសា ហៅបូ ភេទប្រុស អាយុ២៩ឆ្នាំ តាមដីកាចាប់ខ្លួនលេខ៤១១ រ.ដ.ច.ន ចុះថ្ងៃទី២៣ ខែមិថុនា ឆ្នាំ២០១៦ ពីបទរក្សាទុកដោយខុសច្បាប់នូវសារធាតុញៀន និងបានដកហូតគ្រឿងញៀនចំនួន១កញ្ចប់ ។ តាមចម្លើយសារភាព សមត្ថកិច្ចក៏ឈានទៅបង្ក្រាបទីតាំងផលិតសារធាតុញៀននៅខណ្ឌមានជ័យតែម្តង ។
នៅក្នុងប្រតិបត្តិការនេះ មានការដឹកនាំសម្របសម្រួលពីលោក ស៊ិន វីរៈ ព្រះរាជអាជ្ញារងអមសាលាដំបូងរាជធានីភ្នំពេញ និងមានការចូលរូមពីនគរបាលខណ្ឌមានជ័យផងដែរ។ បន្ទាប់ពីបង្ហាញមុខ ជនសង្ស័យ២០នាក់ត្រូវបាននគរបាលបញ្ជូនទៅកាន់សាលាដំបូងរាជធានីភ្នំពេញ ចាត់ការតាមច្បាប់ ។ ចំណែកជនសង្ស័យ៥នាក់ ដែលកែច្នៃផលិតគ្រឿងញៀន កំពុងសាកសួរនៅអធិការដ្ឋាន និងកសាងសំណុំរឿងចាត់ការតាមច្បាប់ដែរ ៕
ចែករំលែកព័តមាននេះ