ចាប់ខ្លួនប្រុសស្រី៣នាក់ ក្រោយប្រើល្បិចដកលុយពីធនាគារអស់ជាង៣ម៉ឺនដុល្លារ
- ភ្នំពេញ
មនុស្សប្រុសស្រីចំនួន៣នាក់ ត្រូវបានកម្លាំងសមត្ថកិច្ចកងរាជអាវុធហត្ថរាជធានីភ្នំពេញ ចាប់ខ្លួនបញ្ជូនទៅតុលាការ កាលពី
រាជធានីភ្នំពេញ ៖ មនុស្សប្រុសស្រីចំនួន៣នាក់ ត្រូវបានកម្លាំងសមត្ថកិច្ចកងរាជអាវុធហត្ថរាជធានីភ្នំពេញ ចាប់ខ្លួនបញ្ជូនទៅតុលាការ កាលពីរសៀលថ្ងៃទី២៧ ខែមិថុនា ឆ្នាំ២០២២ ពាក់ព័ន្ធការចោទប្រកាន់ពី បទ «ក្លែងឯកសារសាធារណៈ ប្រើប្រាស់ឯកសារក្លែង អត្តសញ្ញាណបុគ្គលលើអត្តសញ្ញាណប័ណ្ណ ឆបោ.កជាប្រពន្ធ និងសំអាតប្រាក់» ដែលប្រព្រឹត្តនៅធនាគារមួយក្នុងរាជធានីភ្នំពេញ និងខេត្តកណ្តាល ។
មនុស្សទាំង៣នាក់ខាងលើនេះ រួមមាន ៖ ១- ឈ្មោះ សង វ៉ាន់ដេត ភេទប្រុស អាយុ៣៧ឆ្នាំ មុខរបរមិនពិតប្រាកដ ស្នាក់នៅផ្ទះលេខ១២ ផ្លូវលេខ៦A ស្ថិតក្នុងភូមិក្រាំងអង្ក្រង សង្កាត់ក្រាំងធ្នង់ ខណ្ឌសែនសុខ រាជធានីភ្នំពេញ ២- ឈ្មោះ ជុំ ឆេងលី ភេទប្រុស អាយុ៤២ឆ្នាំ មុខរបរមិនពិតប្រាកដ ស្នាក់នៅផ្ទះជួល ក្នុងភូមិដើមឬស ឃុំដើមឬស ស្រុកកណ្តាលស្ទឹង ខេត្តកណ្តាល និង៣- ឈ្មោះ អុល មិថុនា ភេទស្រី អាយុ៤១ឆ្នាំ មុខរបរមិនពិតប្រាកដ ស្នាក់នៅភូមិកំពង់ទួល ឃុំដើមឬស ស្រុកកណ្តាលស្ទឹង ខេត្តកណ្តាល ។
ជនសង្ស័យទាំង៣នាក់ខាងលើនេះ ត្រូវបានកម្លាំងសមត្ថកិច្ចកងរាជអាវុធហត្ថរាជធានីភ្នំពេញ ឃាត់ខ្លួនតាមពាក្យបណ្តឹងរបស់មេធាវីម្នាក់ ពាក់ព័ន្ធករណី «ក្លែងឯកសារសាធារណៈ ក្រោមរូបភាពយកទៅឆបោ.កប្រាក់ពីធនាគារឯកជនមួយប្រមាណ ៣៥ ០០០ ដុល្លារអាមេរិក» ។
អង្គហេតុនៃពាក្យបណ្តឹងបានបញ្ជាក់ថា នៅថ្ងៃទី២៧ ខែមេសា ឆ្នាំ២០២២ ជនសង្ស័យទាំង៣នាក់តាមរយៈប្រើប្រាស់អត្តសញ្ញាណក្លែង ក្លែងឯកសាធារណៈ ក្លែងអត្តសញ្ញាណបុគ្គលលើអត្តសញ្ញាណប័ណ្ណថា ខ្លួនជាម្ចាស់កម្មសិទ្ធិដីធ្លី និងជាមនុស្សនៅក្នុងអត្តសញ្ញាណប័ណ្ណខាងលើពិតប្រាកដ ដែលធ្វើឲ្យធនាគារឯកជនសាខាបឹងកេងកង ជឿទុកចិត្ត ហើយប្រគល់ប្រាក់ឲ្យចំនួន ១៥ ០០០ ដុល្លារអាមេរិក ។ លុះថ្ងៃទី៤ ខែឧសភា ឆ្នាំ២០២២ ជនសង្ស័យទាំង៣នាក់ដដែល បានប្រើប្រាស់អត្តសញ្ញាណក្លែង ទៅឆបោ.កធនាគារឯកជនសាខាខណ្ឌដូនពេញ ដោយដកយកប្រាក់ប្រមាណ ២០ ០០០ ដុល្លារអាមេរិក ។
ប្រភពដដែលបន្តថា ហើយនិងនៅថ្ងៃទី២១ ខែមិថុនា ឆ្នាំ២០២២ ជនសង្ស័យទាំង៣នាក់ ក៏បានប្រើប្រាស់អត្តសញ្ញាណក្លែង ក្លែងឯកសាធារណៈ ប្រើប្រាស់ឯកសារសាធារណៈក្លែង និងក្លែងអត្តសញ្ញាណបុគ្គលលើអត្តសញ្ញាណប័ណ្ណថា ខ្លួនជាម្ចាស់កម្មសិទ្ធិដី បានទៅដាក់សំណើរសុំខ្ចីប្រាក់ចំនួន ៩០ ០០០ ដុល្លារអាមេរិក ពីធនាគារឯកជនសាខាខណ្ឌពោធិ៍សែនជ័យម្តងទៀត ប៉ុន្តែលើកនេះ ពួកគេក៏ត្រូវអស់លក្ខណ៍ ដោយខាងធនាគារបានប្រើប្រាស់សិទ្ធិពឹងពាក់មេធាវីការពារក្តី ប្តឹងសមត្ថកិច្ចកងរាជអាវុធហត្ថរាជធានីភ្នំពេញ ឲ្យចាប់ខ្លួនបុគ្គលទាំង៣នាក់នេះ ចាត់ការតាមផ្លូវច្បាប់ ។
តាមការស្តាប់ចម្លើយរបស់ជនសង្ស័យទាំង៣នាក់ បានសារភាពប្រហាក់ប្រហែលគ្នាថា ពួកគេពិតជាបានធ្វើសកម្មភាពឆបោ.កយកប្រាក់ពីធនាគារឯកជននោះពិតប្រាកដមែន តាមរូបភាពប្រើប្រាស់ឯកសារក្លែងទាំងអស់ ។
សំណុំរឿងនេះ ជនសង្ស័យទាំង៣នាក់ ស្ថិតនៅដំណាក់ស្ថាប័នអយ្យការអមសាលាដំបូងរាជធានីភ្នំពេញ បើកការស៊ើបសួរ និងក្រោយពីសួរចប់ ពួកគេទំនងជាមិនអាចគេចផុតពីការឃុំខ្លួនដាក់ពន្ធគារជាបណ្តោះអាសន្ន ដើម្បីរង់ចាំការកាត់ក្តីទៅតាមបទល្មើសដែលពួកគាត់បានប្រព្រឹត្តនោះទេ៕
ចែករំលែកព័តមាននេះ