ខេត្តបាត់ដំបង ៖ ស្ថានីយ៍ល្អាងស្ពាន ក្នុងខេត្តបាត់ដំបង ស្ថិតក្នុងចំណោមស្ថានីយ៍បុរេប្រវត្តិសាស្ត្រធំៗ នៃតំបន់អាស៊ីអាគ្នេយ៍ដីគោក ត្រូវបានធ្វើកំណាយរកឃើញពីប្រវត្តិដ៏យូរលង់ នៃដំណាក់កាលធំៗរបស់មនុស្សសម័យបុរេប្រវត្តិសាស្ត្រ នៃកម្ពុជា ពោលគឺប្រវត្តិសាស្ត្រប្រទេសកម្ពុជាមុនសម័យអង្គរទៅទៀត…
ខេត្តបាត់ដំបង ៖ ស្ថានីយ៍ល្អាងស្ពាន ក្នុងខេត្តបាត់ដំបង ស្ថិតក្នុងចំណោមស្ថានីយ៍បុរេប្រវត្តិសាស្ត្រធំៗ នៃតំបន់អាស៊ីអាគ្នេយ៍ដីគោក ត្រូវបានធ្វើកំណាយរកឃើញពីប្រវត្តិដ៏យូរលង់ នៃដំណាក់កាលធំៗរបស់មនុស្សសម័យបុរេប្រវត្តិសាស្ត្រ នៃកម្ពុជា ពោលគឺប្រវត្តិសាស្ត្រប្រទេសកម្ពុជាមុនសម័យអង្គរទៅទៀត នេះបើយោងតាមស្ថានទូតបារាំងប្រចាំកម្ពុជា បានផ្សព្វផ្សាយនៅថ្ងៃទី២៤ ខែមិថុនា ឆ្នាំ២០២២នេះ ។
ប្រតិបត្តិការបុរាណវិទ្យា ដឹកនាំដោយបេសកកម្មបុរេប្រវត្តិសាស្ត្របារាំង-កម្ពុជា ស្ថិតក្នុងក្របខ័ណ្ឌ នៃការដ្ឋានអន្តរជាតិ និងមានគោលដៅគូសវាសឡើងវិញ នូវដំណាក់កាលនីមួយ នៃការរស់នៅរបស់មនុស្សសម័យបុរេប្រវត្តិសាស្ត្រ នៃប្រទេសកម្ពុជា រាប់ចាប់ពីមនុស្សយុគថ្មបំបែក ដល់យុគថ្មរំលីង នៃវាលទំនាបបាត់ដំបង ។
ដោយមានការគាំទ្រពីគណៈកម្មការកំណាយបុរណវិទ្យានៅបរទេស នៃក្រសួងអឺរ៉ុប និងការបរទេសបារាំង កំណាយខាងលើ បាននាំទៅរករបកគំហើញ ពុំធ្លាប់មានពាក់ព័ន្ធនឹង ៤សម័យកាល រួមមាន ៖
-យុគថ្មរំលីង ៖ ផ្នូរបញ្ចុះសព ចំនួន៦ ត្រូវបានរកឃើញ ដោយមានភាជន៍ ថ្មរំលីង អលង្ការ និងគ្រឿងលម្អផ្សេងៗ ដែលស្ថិតក្នុងស្ថានភាពរក្សាទុក បានយ៉ាងល្អ ។ មានអាយុកាល ១,៥០០ឆ្នាំ មុនគ្រិស្តសករាជ ផ្នូរទាំងនេះ បង្ហាញឱ្យឃើញថា ល្អាងស្ពានត្រូវបានប្រើប្រាស់ជាច្រើនលើកច្រើនសារ ជាកន្លែងបញ្ចុះសពដោយក្រុមកសិករ ដែលរស់នៅតំបន់វាលទំនាបបាត់ដំបង ។
-យុគថ្មបំបែកចុងក្រោយ ៖ សំដៅលើអ្នកបរបាញ់-អ្នកប្រមូលអនុផលព្រៃឈើចុងក្រោយ នៃតំបន់អាស៊ីអាគ្នេយ៍ (១,១០០ឆ្នាំ ទៅ៥,០០០ឆ្នាំ មុនគ្រិស្តសករាជ)។ បរិមាណដ៏ច្រើន នៃបំណែកឆ្អឹង និងឧបករណ៍ប្រើប្រាស់ធ្វើឱ្យគេស្គាល់កាន់តែច្បាស់ អំពីរបៀបរស់នៅរបស់អ្នកបរបាញ់ សម័យបុរេប្រវត្តិសាស្ត្រ នៅតំបន់ត្រូពិច ។
-យុគសម័យបុរេហាវប៊ីញៀន ៖ គេឃើញមានថ្ម ប្រើប្រាស់បង្កើតផ្លាភ្លើង ដើម្បីបង្កាត់ភ្លើង ដែលមានអាយុកាល ចន្លោះ១១,០០០ឆ្នាំ ទៅ ២៦,០០០ឆ្នាំ មុនគ្រិស្តសករាជ ។
-យុគមុនសម័យកាលបុរេហាវប៊ីញៀន ៖ គេឃើញមានបំណែកថ្ម ប្រើប្រាស់សម្រាប់ពុះច្រៀក ដែលមានលក្ខណៈគ្របទៅដោយផេះ ទំនងបណ្តាលមកពីបន្ទុះភ្នំភ្លើង Toba ។
ស្ថានីយ៍ល្អាងស្ពានបង្ហាញនូវទិដ្ឋភាពវប្បធម៌ នៃរយៈពេលដ៏វែងមួយដែលអាចឲ្យគេកំណត់សារជាថ្មី នូវដំណាក់កាលធំៗរបស់មនុស្សសម័យបុរេប្រវត្តិសាស្ត្រ នៃកម្ពុជា ចាប់តាំងពីពេលកកើត ។ ស្ថានីយ៍ល្អាងស្ពាន ផ្ទុកនូវបណ្តុំព័ត៌មានបុរេប្រវត្តិសាស្ត្រដ៏មានសារសំខាន់ ដោយសារផ្តល់នូវព័ត៌មាន ដែលខ្វះខាតទាក់ទងនឹងប្រវត្តិដ៏យូរលង់ នៃប្រទេសកម្ពុជា ពោលគឺប្រវត្តិសាស្ត្រប្រទេសកម្ពុជាមុនសម័យអង្គរ ៕
ចែករំលែកព័តមាននេះ