បន្ទាប់ពីផ្ទៃមេឃប្រែពីពណ៌ខៀវថ្លា ទៅទៅជាងងឹតស្លុប និងមានខ្យល់បោកបក់យ៉ាងខ្លាំងមកពីទិសខាងលិច បង្កឱ្យក្លាយទៅជាភ្លៀង១មេយ៉ាងធំលាយឡំទៅដោយខ្យល់កន្ត្រាក់ប៉ើងអស់ដំបូលផ្ទះប្រជាពលរដ្ឋ រលំដួល ព្រមទាំងទ្រេតផ្ទះប្រជាពលរដ្ឋជាច្រើនខ្នង ធ្វើឱ្យម្នាក់ៗ
ខេត្តប៉ៃលិន ៖ បន្ទាប់ពីផ្ទៃមេឃប្រែពីពណ៌ខៀវថ្លា ទៅទៅជាងងឹតស្លុប និងមានខ្យល់បោកបក់យ៉ាងខ្លាំងមកពីទិសខាងលិច បង្កឱ្យក្លាយទៅជាភ្លៀង១មេយ៉ាងធំលាយឡំទៅដោយខ្យល់កន្ត្រាក់ប៉ើងអស់ដំបូលផ្ទះប្រជាពលរដ្ឋ រលំដួល ព្រមទាំងទ្រេតផ្ទះប្រជាពលរដ្ឋជាច្រើនខ្នង ធ្វើឱ្យម្នាក់ៗមានការភ័យខ្លាចយ៉ាងខ្លាំង ខណៈដែលមានផ្គររន្ទះបាញ់ទៅលើដើមឈើទៀតផង។
តែទោះបីជាយ៉ាងណា មិនបណ្តាលឱ្យប្រជាពលរដ្ឋរស់នៅក្នុងភូមិ ឬសត្វចិញ្ចឹមណាមួយទទួលរងគ្រោះថ្នាក់នោះទេ។ ហេតុការណ៍ភ្លៀងលាយខ្យល់កន្ត្រាក់នេះ បានកើតឡើងកាលពីវេលាម៉ោង០២និង០០នាទីរសៀល ថ្ងៃទី២២ ខែមិថុនា ឆ្នាំ២០២២ ស្ថិតនៅក្នុងភូមិបាយសី និងភូមិភ្នំព្រាល ឃុំស្ទឹងត្រង់ ស្រុកសាលាក្រៅ ខេត្តប៉ៃលិន។
បើតាមប្រភពព័ត៌មានពីនគរបាល នៃអធិការស្រុកសាលាក្រៅ បានឱ្យដឹងថា ៖ ផ្ទះប្រជាពលរដ្ឋដែលទទួលរងខូចខាតមានចំនួន២ភូមិ គឺ ៖ ភូមិបាយសី រងផលប៉ះពាល់ចំនួន២១ខ្នង និងភូមិភ្នំព្រាលចំនួន០៤ខ្នង ស្ថិតក្នុងឃុំស្ទឹងត្រង់ ស្រុកសាលាក្រៅ ខេត្តប៉ៃលិន។
ប្រភពដដែលបន្តថា ផ្ទះប្រជាពលរដ្ឋដែលទទួលរងគ្រោះដោយសារខ្យល់កន្ត្រាក់មានដូចជា ៖ រលំដួលផ្ទះទាំងស្រុងចំនួន០៥ខ្នង បណ្តាលឱ្យខូចខាតសម្ភារ: បែកពាង បែកចានឆ្នាំង និងរបស់របរប្រើប្រាស់មួយចំនួន។ ហើយផ្ទះប្រជាពលរដ្ឋទទួលរងគ្រោះប៉ើងស័ង្កសីចំនួន១៨ខ្នង ដោយខ្យល់បក់ទាញនាំទៅធ្លាក់នៅវាលស្រែ ធ្វើឱ្យម្នាក់ៗភ័យព្រលឹងចុងសក់។ ចំណែកឯផ្ទះប្រជាពលរដ្ឋចំនួន០២ខ្នងទៀត ទទួលរងការទ្រេត តែមិនដួលរលំឡើយ ខណៈម្ចាស់នាំគ្នារត់ចេញពីផ្ទះរកកន្លែងសុវត្ថិភាពក្បែរៗនោះ ដោយខ្លាចក្រែងផ្ទះរលំសង្កត់ពីលើ។
ប្រភពដដែលបញ្ជាក់ទៀតថា ក្រោយមក ក៏មានក្រុមការងារខេត្ត បានចុះទៅដល់កន្លែងកើតហេតុ ដើម្បីត្រួតពិនិត្យពីស្ថានភាពដែលទទួលរងផលប៉ះពាល់ ដើម្បីរៀបចំអំណោយសង្គ្រោះជូនដល់ប្រជាពលរដ្ឋខាងលើផងដែរ៕
ចែករំលែកព័តមាននេះ