ខេត្តប៉ៃលិន៖ ទឹកចិត្តដ៏សប្បុរសរបស់អភិបាលខេត្តប៉ៃលិន លោកស្រី បាន ស្រីមុំ កើតឡើង ក្រោយពីលោកជំទាវ បានប្រទះឃើញដោយចៃដន្យតាមផ្លូវ ដែលបុរសពិការឯកោម្នាក់ បានប្រើដៃរុញរទេះជនពិការរបស់ខ្លួន ឡើងទួល និងចុះចំណោតជារៀងរាល់ថ្ងៃ ដើម្បីរើសអេតចាយ ដូចជា សំបកដបជ័រ សំបកកំប៉ុងស្រាបៀរ ជាដើម ដែលគេបោះចោលនៅតាមចិញ្ចើមផ្លូវ យកទៅលក់ បានថវិកាបនិ្តចបន្តួច សម្រាប់ទិញម្ហូបអាហារផ្គត់ផ្គង់ជីវភាពប្រចាំថ្ងៃ ខណ:រស់យ៉ាងត្រដាបត្រដួស គួរឱ្យអាណិតពន់ពេក។
នៅរសៀលថ្ងៃទី២១ ខែមិថុនា ឆ្នាំ២០២២នេះ លោកជំទាវ បាន ស្រីមុំ អភិបាលខេត្តប៉ៃលិន បានសម្រេចចិត្តទិញម៉ូតូអគ្គិសនីថ្មីសន្លាង ១គ្រឿង យកទៅប្រគល់ជូនបុរសពិការនោះតែម្តង។
ប្រភពព័ត៌មានបានឱ្យដឹងថា បន្ទាប់ពីលោកជំទាវ អភិបាលខេត្តប៉ៃលិន និងក្រុមការងារ បានធ្វើដំណើរទៅពិនិត្យមើលសកម្មភាពផ្សេងៗ នៅតាមបន្ទាត់ព្រំដែន លុះក្រឡេកឃើញបុរសម្នាក់ ឈ្មោះ ទូច វណ្ណា ពិការជើងទាំងសងខាង កំពុងយកដៃ រុញរទេះយ៉ាងយឺតៗ នៅតាមបណ្តោយផ្លូវជាតិលេខ៥៧ ដើម្បីរើសអេតចាយយកទៅលក់ បានប្រាក់ទិញម្ហូបអាហារ គឺលោកជំទាវអភិបាលខេត្ត ក៏បានឈប់ឡាន ចុះទៅសួរសុខទុក្ខពីជីវភាពប្រចាំថ្ងៃរបស់បុរសពិការនោះ។
ប្រភពបន្តទៀតថា លុះបុរសពិការខាងលើ រៀបរាប់ពីបញ្ហាប្រឈម ក្នុងការប្រើដៃរុញរទេះរើសអេតចាយឡើងចុះទួល មានការលំបាកខ្លាំង លោកជំទាវ បាន ស្រីមុំ ក្រៅពីជូនថវិកាមួយចំនួន ដល់បុរសពិការនោះ លោកជំទាវ ក៏បានសម្រេចចិត្តទិញម៉ូតូអគ្គិសនី ១គ្រឿង ដែលមានការចូលរួមឧបត្ថម្ភពីលោក សេង គឹមឡាក់ ព្រះរាជអាជ្ញាអមសាលាដំបូង ខេត្តប៉ៃលិនផងដែរ។
ប្រភពបញ្ជាក់ថា គ្រាន់តែក្រឡេកឃើញម៉ូតូអគ្គិសនីដ៏ថ្មីសន្លាង ១គ្រឿងនេះ យកទៅដល់ក្បែរខ្លួនភ្លាម បុរសពិការខាងលើ ត្រេកអរពន់ពេកស្ទើរស្រក់ទឹកភ្នែក ហើយក៏លើកដៃសំពះថ្លែងអំណរគុណដល់លោកជំទាវ បាន ស្រីមុំ អភិបាលខេត្តប៉ៃលិន ទាំងអួលដើមក ហើយក៏ជូនពរឱ្យលោកជំទាវ និងក្រុមការងារ មានសុខភាពល្អ កម្លាំងមាំមួន ប្រាជ្ញាឈ្លាសវៃ ក្នុងការបំពេញភារកិច្ចការងារឱ្យទទួលជោ គជ័យផងដែរ។
សូមបញ្ជាក់ថា បុរសពិការខាងលើ បានសុំដីផ្ទះគេស្នាក់នៅបណ្តោះអាសន្ន ក្នុងភូមិអូររអិល ឃុំស្ទឹងកាច់ ស្រុកសាលាក្រៅ ខេត្តប៉ៃលិន ដោយគាត់បានទទួលរងគ្រោះថ្នាក់ពិការជើង ព្រោះតែធ្លាក់ពីលើរថយន្ត ពេលខ្លួនស៊ីឈ្នួលជាកម្មករបេះផ្លែមៀនប៉ៃលិន ហៅ តាង៉ែន ឱ្យថៅកែម្នាក់ កាលពីយូរឆ្នាំមកហើយ។ លុះប្រពន្ធកូនឃើញពីសភាពពិការបែបនេះ លំបាករស់នៅជាមួយ ក៏នាំគ្នារត់ចោល ទុកឱ្យគាត់រស់នៅតែល តោលម្នាក់ឯង។ ប្រពន្ធរបស់បុរសពិការជើងនេះ បានទៅយកប្តីថ្មី នៅខេត្តផ្សេង ធ្វើឱ្យគាត់ឈឺចាប់ខ្លោចផ្សាក្នុងចិត្តក្រៃលែង ហើយបុរសខាងលើ ធ្លាប់ឱ្យភ្នាក់ងារសារព័ត៌មានដឹងថា រូបគាត់ពិតជានឹករលឹកដល់ប្រពន្ធកូនខ្លាំងណាស់ ចង់ជួបមុខពួកគេ ជាលើកចុងក្រោយ បើទោះបីជាមិនបានរួមរស់នៅជាមួយរហូតដល់អស់ជីវិតរៀងខ្លួនក៏ដោយ។ តែរហូតមកដល់ពេលនេះ បុរសពិការជើងទាំងសង្ខាង មិនដែលបានឃើញមុខប្រពន្ធ ឬកូនស្រីទោលរបស់ខ្លួនម្តងណានោះឡើយ៕ នីយ៉ា
ចែករំលែកព័តមាននេះ