១-ឧទ្យានជាតិបឹង «ភ្លីទ្វីស» ប្រទេសក្រូអាទ
ឧទ្យានជាតិបឹង Plitvice ស្ថិតនៅក្រុងលីកា ជាបឹងធំ និងមានទឹកជ្រោះហូរលើថ្ម១៦ជាន់ ដោយជាន់ នីមួយៗមានទេសភាពស្រស់ប្រណីត ។
បឹងនោះបានក្លាយជាបេតិកភណ្ឌពិភពលោកពីអង្គការ «យូណេស្កូ» នៅឆ្នាំ១៩៧៩
១-ឧទ្យានជាតិបឹង «ភ្លីទ្វីស» ប្រទេសក្រូអាទ
ឧទ្យានជាតិបឹង Plitvice ស្ថិតនៅក្រុងលីកា ជាបឹងធំ និងមានទឹកជ្រោះហូរលើថ្ម១៦ជាន់ ដោយជាន់ នីមួយៗមានទេសភាពស្រស់ប្រណីត ។
បឹងនោះបានក្លាយជាបេតិកភណ្ឌពិភពលោកពីអង្គការ «យូណេស្កូ» នៅឆ្នាំ១៩៧៩ ដោយនៅក្នុងបឹងមានទឹកជ្រោះ ល្អាង និងសត្វជាច្រើនប្រភេទ រួមមានខ្លាឃ្មុំ ចចក បក្សីកម្រជាដើម ។
២-ស្រែអំបិល «សាឡា ដឺ អ៊ូយូនី» ប្រទេសបូលីវី
«Salar De Uyuni» ស្ថិតនៅភាគខាងលិចឆៀងខាងត្បូងប្រទេសបូលីវី ជាស្រែអំបិលធំបំផុតនៅលើលោក មានក្រឡាផ្ទៃដល់ទៅ១០.៥៨២គីឡូម៉ែត្រការ៉េ ។ នៅរដូវវស្សាទីតាំងនោះបានលាតសន្ធឹងដោយទឹកថ្លានៅពីលើអំបិល ឆ្លុះផ្ទៃមេឃដ៏ស្រស់ស្អាត និងទាក់ទាញអ្នកទេសចរនៅលើពិភពលោកទៅមកទស្សនានៅក្នុងជីវិតរបស់គេ ។
៣-«Cinque Terre» ប្រទេសអីុតាលី
Cinque Terre ជាទីតាំងប្រជុំដោយភូមិចំនួន៥នៅអីុតាលី ក្នុងនោះមានភូមិ Monterosso al mare, Vernazza, Corniglia, Manarola និង Riomaggiore ដោយភូមិទាំងអស់បានចុះបញ្ជីជាបេតិកភណ្ឌពិភពលោក ហើយភាពលេចធ្លោរបស់ភូមិនេះ ស្ថិតនៅលើផ្ទាំងថ្មដែលមានផ្ទះសម្បែងស្រស់ស្អាត ។
៤-«ប៉ាមុកកាឡេ» ប្រទេសតួកគី
«Pamukkale» មានលក្ខណៈជាថ្មកំបោរពណ៌ស កាត់ផ្តាច់ជាស្រទាប់ និងមានទឹកផុសចេញពីដីក្លាយជាអាងទឹកឆ្លុះពន្លឺដ៏ស្រស់ត្រកាល ទាក់ទាញអ្នកទេសចរឱ្យទៅទស្សនា។
៥-ថ្មជញ្ជាំង «អេតត្រេតាត» នៅបារាំង
ជញ្ជាំងថ្មកោងលយចូលសមុទ្រ គឺជានិមិត្តរូបដ៏លេចធ្លោ ក្លាយជា «Etretat» ទាក់ទាញអ្នកទេសចរនៅលើពិភពលោក ស្ថិតនៅលើតំបន់ឆ្នេរ «Pays de Caux» ជាទីក្រុងទេសចរណ៍ដ៏ស្ងប់ស្ងាត់ សមស្របសម្រាប់សម្រាកលំហែកាយ ។ លើសពីនេះជាតំបន់ឆ្នេរដ៏ស្រស់ស្អាត ជាទីពេញនិយមទៅកម្សាន្ត ។
៦-រូងល្អាងពណ៌ខ្មៅ «Jacob’s Well» សហរដ្ឋអាមេរិក
ល្អាងដ៏ជ្រៅ «Jacob’s Well» ទោះបីជាគួរឱ្យភ័យខ្លាចបែបណាក៏ដោយ ក៏មិនអាចរារាំងអ្នកក្លាហានទេ ។ អង្កត់ផ្ចិតនៃមាត់ល្អាងប្រហែល៤ម៉ែត្រ និងជម្រៅ៣០ម៉ែត្រ ។ ជម្រៅនៃល្អាងនោះ គឺជាចំណុចទាក់ទាញចំណាប់អារម្មណ៍របស់អ្នកមុជទឹកទាំងឡាយ ដែលចង់ទៅដកបទពិសោធន៍ ភាពក្លាហាន និងស្វែងរកវត្ថុដ៏អស្ចារ្យនៅបាតទឹកនៃល្អាង ។
៧-«ហ្សាងយ៉េ តានសៀ» ប្រទេសចិន
ហ្សាងយ៉េ តានសៀ ជានិមិត្តរូបធរណីវិទ្យា ស្ថិតនៅប្រទេសចិន ។ ជ្រលងភ្នំដ៏ស្រស់ស្អាតនោះ មានរហស្សនាមថា «ជ្រលងភ្នំឥន្ទធនូ» ឬឧទ្យានជាតិធរណីវិទ្យា «Zhangye Danxia» នៅប៉ែកខាងជើងខេត្តគាន់ស៊ូ ព្រោះតំបន់នោះរំលេចដោយពណ៌ចម្រុះនៅលើផ្ទៃដី និងធ្វើឱ្យអ្នកទេសចរភ្លេចមិនបាន ។ បាតុភូតផ្នែកធរណីវិទ្យានេះកើតពីថ្មខ្សាច់ និងរ៉ែ ផ្សេងៗ ដែលពុកផុយ និងគ្របដណ្តប់លើរ៉ែប្រភេទ ផ្សេងអស់រយៈពេលជាច្រើនរយឆ្នាំ ទើបធ្វើឱ្យវាមានភាពស្រស់ស្អាតប្រៀបដូចជាប្រើជក់ផាត់ចេញជាពណ៌ចម្រុះ ។ ចំពោះទេសភាពល្អបំផុត គួរឱ្យចង់ទស្សនា គឺស្ថិតក្នុងអំឡុងខែមិថុនាដល់ខែកញ្ញា ។
៨-ឋានសួគ៌នៅប្រទេសក្រិក
«Meteora» ជាឋានសួគ៌នៅលើវេហាស៍ ជាទីតាំងដ៏សក្តិសិទ្ធិអណ្តែតលើដុំថ្មដ៏ធំ នៅភាគកណ្តាលប្រទេសក្រិក មានកម្ពស់៣១០ម៉ែត្រ ធ្លាប់ជារាជដំណាក់របស់អ្នកកាន់និកាយ «អូតូដុក» ព្រោះពួកគេមានជំនឿថា ការសង់ប្រាសាទនៅទីខ្ពស់ នឹងស្ថិតនៅជិតបង្កើយនៃឋានសួគ៌ ។ នៅឆ្នាំ១៩៨៨ អង្គការយូណេស្កូ បានចុះបញ្ជីទីតាំងនោះជាបេតិកភណ្ឌពិភពលោក ។
៩-វាលខ្សាច់ពណ៌សនៅប្រេស៊ីល
វាលខ្សាច់ពណ៌ស គ្របដណ្តប់លើក្រឡាផ្ទៃប្រហែល១.៥០០គីឡូម៉ែត្រការ៉េ ស្ថិតនៅក្នុងឧទ្យានជាតិ «Lencois Maranhenses National Park» រដ្ឋម៉ារ៉ានហាវ នៅភាគខាងកើតឆៀងខាងជើងប្រទេសប្រេស៊ីល ។ លក្ខណៈរបស់វា គឺជាទីទួលខ្សាច់ដ៏ធំ រួមទាំងមានអាងទឹកក្នុងតំបន់មួយចំនួន ហើយភ្ញៀវទេសចរគួរទៅទស្សនាក្នុងអំឡុងពីខែឧសភាដល់កញ្ញា ព្រោះទឹកបឹងដែលកើតពីទឹកភ្លៀងមានពណ៌បៃតង និងមានទេសភាពស្រស់ស្អាតតាមបែបធម្មជាតិ ។
១០-រូងរណ្តៅទឹកពណ៌ខៀវនៅប្រទេសបេលី
រណ្តៅទឹកពណ៌ខៀវនៅបាតសមុទ្រ បើបានឃើញគួរឱ្យចង់គយគន់ ដោយរណ្តៅនោះស្ថិតនៅខាងក្រៅតំបន់ឆ្នេរប្រទេសបេលី ក្បែរប្រជុំកោះថ្មប៉ប្រះទឹករាងជារង្វង់មូល មានអង្កត់ផ្ចិតជាង៣០០ម៉ែត្រ និងជម្រៅប្រហែល១២៤ម៉ែត្រ ។
តាមការវិភាគលើថ្មដុះ ដែលប្រទះឃើញនៅក្នុងរណ្តៅពណ៌ខៀវ បង្ហាញថា មានការកកើតជាថ្មជាង១៥៣.០០០ឆ្នាំ និងចុះបញ្ជីជាបេតិកភណ្ឌពិភពលោក ៕
ចែករំលែកព័តមាននេះ